歷史悠久嘅廣島福山城

福山城，又名久松城，係位於日本廣島縣福山市嘅一座城堡。福山城天守閣內現今為福山城博物館，展示藝術品同歷史文物，成為歷史同藝術愛好者嘅熱門景點。

歷史迷會鐘意嘅地方：福山城

福山城建於17世紀初，係喺封建領主水野勝成嘅指揮下建造而成。佢係江戶時代完成嘅最後一座城堡之一，並被當做保護日本西部嘅基地。

唔好彩嘅係，明治維新後，福山城被廢棄，建築物喺19世紀後期被拆除。喺第二次世界大戰空襲期間又再度受到毀壞。

目前嘅主要建築於1960年代重建，而家嘅天守閣作為博物館，展示城市嘅歷史以及城堡本身。其中一個參觀焦點係可以從天守閣頂層欣賞到全景。

更重要嘅係，城堡周圍係一個寬敞嘅公園，種植咗500棵櫻花樹，喺春天變成一個燦爛嘅櫻花觀景點。

福山城公園內仲有好多博物館，例如係廣島縣歷史博物館，精彩展示出日本封建時期嘅歷史；福山美術館展示當地同國際藝術家嘅藝術品；福山文學館內仲有一個介紹當地作家嘅常設展覽。

相關資訊

想喺參觀福山城時體驗傳統日本文化？可以去「福壽會館」！唔單止可以著美麗嘅日本和服參加茶道，亦有機會學習如何彈奏古箏。

呢啲活動由福山嘅教師親自指導，包你擁有充實嘅文化體驗。仲有其他活動可以參加，例如書法、插花、能樂劇等等！每個體驗項目約1個鐘，有英語解說。如果想參加，請務必提前一個禮拜進行預約。