大家應該都有聽過VR啦。VR即係所謂嘅虛擬實境技術，利用先進電腦技術模擬，刺激人類嘅視覺、聽覺、觸覺、嗅覺、味覺等五感，俾人體驗真假難辨嘅虛擬世界。而家造成熱門話題嘅VR設備，主要係用咗類似眼罩嘅頭戴螢幕裝置，利用360度全方位影像，等使用者向想望嘅方向移動就可以睇到所呈現嘅影像，就好似親身經歷投影所創造嘅世界入面咁。喺呢度，同大家一一介紹VR嘅基本說明同最新VR娛樂設施等各種情報資訊啦。
VR同AR嘅差別係？
AR，英文全名係「Augmented Reality」，意思即係擴增實境。將虛擬嘅視覺影像投射到現實之中，虛擬咁擴展眼前睇到嘅世界。舉例嚟講，就有風靡全球嘅手機遊戲「Pokémon GO」，就好似遊戲入面寵物小精靈好活靈活現咁出沒喺現實世界，等大家可以感受體驗「捉精靈」嘅過程。而同AR相比，VR則係喺螢幕上投射真實度更高嘅視覺影像，創造出虛擬現實。俾玩家體驗好似真實存在嘅虛擬世界入面。兩者好似，但其實又好唔一樣，直程可以講係個對比。
最新VR眼罩創造全新虛擬世界體驗
由於開發技術不斷進步，而家可以對應VR嘅設備同應用程式可以講係觸手可及。呢種技術可以活用同應用喺好多唔同方面同用途上。唔單單只有遊戲等娛樂設備，虛擬工作室等用於科學方面嘅視覺呈現、教育同旅行等等，各業界都會運用VR技術，為求創造嶄新嘅體驗。喺社會服務方面亦有為咗避免意外同危機而設計咗VR訓練。另外, 仲有利用虛擬重建歷史建築等等好多超越現實嘅實境虛擬體驗，都係令人感動嘅發明。
利用VR技術構思嘅「月球運動」
未來，或者可以去到月球旅行或者生活添! 話唔埋會發展出一啲只係喺月球先可以做嘅運動，然後有一日會舉辦月球奧運喎! 而家就有一班人利用VR技術諗梗一啲喺月球先可以進行嘅運動喇。GREE公司、JAXA（日本宇宙航空研究開發機構）同TechShop Tokyo三方共同主辦咗個比賽，喺日本全國選拔揀13組隊伍參加比賽，各隊都會構思喺月球上可以玩嘅運動。而獲得冠軍嘅隊伍一開始已經諗去到月球嘅話想試吓籃球「入樽」! 活用月球嘅重力同個波飛行嘅方向，根據唔同嘅投球方式改變方向，喺空中「爆籃」! 爆籃平時都好少見啦，更何況唔係職業運動員嘅你同我!
VR防災技術嘅進化！體驗災害發生嘅經歷
VR虛擬實境都活用咗喺防災技術度。東京消防署導入咗VR防災體驗車。戴上VR頭戴裝置坐上車，就會感受到搖晃，仲有煙臭味同熱氣，令大家好似親臨火災嘅實境咁體驗發生災害嘅現場。另一方面，亦有利用咗最新VR頭戴裝置「Mirage Solo」嘅VR避難體驗。無論使用者向上下左右任何方向移動，影像都會跟著移動。又例如想跳同踎低去觀察周遭環境等動作都可以順暢運作。透過呢個最新VR設備就可以避開障礙物，練習喺濃煙嘅地方盡量踎低嚟移動。而睇到嘅影像世界同身體所感受嘅一切都可以配合得天衣無縫，可以好真實咁俾使用者感受危機逼近嘅時刻。
東京好玩嘅VR娛樂設施
可以盡情享受原創VR遊戲嘅娛樂設施陸續喺東京開幕啦! 其中有可以體驗知名動漫、遊戲同電影當中世界嘅遊戲。仲有除咗視覺之外，仲活用咗其他感官嘅VR遊戲都不斷推陳出新。而咁多個VR遊樂設施中最有代表性嘅就係「「VR ZONE SHINJUKU」。呢度有可以玩到七龍珠、Mario賽車等各項主題嘅VR遊樂設施。另外仲有「VR PARK TOKYO」、「DMM VR THEATER YOKOHAMA」、「SKY CIRCUS SUNSHINE 60展望台」等各個VR設施都備受注目㗎!
試玩過而家好Hit嘅VR未呢? 東京都內VR體驗設施情報介紹
以上就係有關VR虛擬實境嘅介紹喇，大家覺得點呢？有任何感想或者想知道更多嘅資訊，都歡迎留言俾我哋㗎！
Comments