最近我喺屋企成日都遇到好多超自然現象嘅怪事，搞到我好想搞清楚究竟屋企係咪有污糟嘢…所以今日就想介紹一下，用日本人用嘅方法，去測吓有無鬼喺你身邊！夠膽就用佢嚟試吓，再同我哋分享你嘅經驗呢！
注意：要小心進行
喺日本都有好多唔同種類嘅超自然現象，當中可能嚟自仁慈嘅神明，邪惡嘅魔鬼，或者係變態跟蹤狂嘅舉動。要知道如果你用以下方法搵出「事實」，可能會好危險，甚至會令你受到傷害。不過如果你真係確信嗰啲奇怪事唔係自己幻想出嚟，而係真實喺你屋企發生過嘅話，咁就繼續睇落去啦！最後唔好彩發現到嘅話，記住要搵相關專業人士幫你驅鬼呀。以下內容唔建議膽小嘅人去做，驚得濟喺黑暗中逃走都好易受傷㗎！
提高感官敏銳度
「第六感」唔只得一種感官可以感受到。例如有啲人「睇」唔到鬼，但有啲可以「聽」到或者「聞」到，甚至可以「feel」到有啲唔妥。所以睇唔到，都唔代表你無第六感。雖然睇唔到鬼，但話唔定你已經被賜予各種第六感能力呢！
如果你曾經試過聽到有竊竊私語嘅聲，或者被自己發開口夢整醒，可能你已經遇上鬧鬼問題喇。呢個時候可以試吓用拜祭嘅香，煙霧，臭蛋，鐵（生鏽嘅物品或含鐵質嘅血液）去分辨自己屋企有無「嘢」存在。如果你突然感到有寒意或有種唔尋常嘅恐怖感，又或者成日「形」住被人望住，可能就係「佢哋」想話你知自己嘅存在！
一啲科學現象
鬼魂可能有時會想整蠱你，例如令屋企嘅物品無端端自己郁，或擾亂電子無線電波等超自然現象。不過其實寵物喺呢方面會比人類更敏感。而被鬼壓又係好可怕，但一旦你已經適應咗呢種感覺，話唔定喺出現之前你已經預先感受到。
查一下間屋嘅過去
日本會將一啲曾經喺該單位死過人，無論係自殺，謀殺，病死定係意外死，都稱為「事故物件」(Jikobukken)或有意外發生過嘅樓房，甚至有一個網頁可以查到該地區有無任何「事故物件」。
但即使佢唔係事故物件，都有可能前身係墳墓或者「霊道」(reidō)，即係幽靈會通過嘅地方，但呢啲資料都唔會喺網頁上紀錄。咁呢個情況，你可能就要靠其他方法分辦喇。
日本傳統方法：靈魂出竅
呢個喺日本電視節目上有介紹過。首先，閉上眼睛，幻想自己身處屋嘅門外。然後想像自己打開大門進入屋內，再打開屋內每一道房門去check吓每間房。Check完之後再返返去大門，再張開雙眼。幻想期間唔好開眼。
聽聞如果喺你幻想當中，有人行過或者見到一啲好奇怪嘅影像，咁即係表示你間屋入面有鬼…不過呢個方法可能只適用於日本人，因為喺日本實在有無數隔空嘅鬼異例子，例如「生霊」 (Ikiryō)，即在生嘅人靈魂出竅；或者「轆轤首」(Rokurokubi)，即長頸妖怪；仲有利用詛咒嚟搞到人厲鬼纏身等等。
現代利用科技嘅方法
以下係日本網站上流傳緊嘅一啲方法。
攝錄機或手機拍片
去一間你覺得有唔妥或者有超自然現象發生嘅房，開著部攝錄機拍片，合埋雙眼，拎住攝錄機對外影同時慢慢轉一個圈。之後再將攝錄機鏡頭對住自己，拍埋後面背景，再轉多個圈。最後，做好心理準備先睇返段片…不過呢個方法可能對一啲唔想現身嘅鬼魂無乜用，例如一啲只係想保護你嘅靈魂，除非佢哋想現身要你提防一啲事。
臉部識別功能
智能手機嘅相機或webcam都有臉部識別功能，甚至而家發展到可以喺臉上加可愛兔耳等QQ效果。但如果你發現個功能喺無人嘅地方識別到一張臉！咁最好要搵吓道師等專門驅鬼人士喇…
今日就講到呢度先，有膽量嘅就試吓用以上嘅方法去拆解你遇到嘅超自然現象啦！
Comments