日文嘅「年末年始」代表新舊年交替嘅呢段期間，雖然開始日子各地可能會有不同，但大致可以以12月31日「大晦日」嚟簡單區分：大晦日之前係「年末」，1月1日起則係「年始」。由於年末年始期間要食嘅食物、要做嘅事、習慣…等都同其他國家略有不同，究竟喺外國人眼中，日本年末年始期間有啲乜事係你想像唔到嘅呢？一齊嚟睇睇啦！
1、年尾期間買彩券大排長龍！
唔知大家喺日本街頭行街嗰陣，有無曾經注意過街上有好多彩券行呢？日本購買彩券嘅風氣盛行，特別係11月至12月期間發行嘅「年末JANBO彩券」（年末ジャンボ宝くじ）。年末JANBO彩券上面有一組6位數號碼，得獎號碼會喺12月31日抽出；頭獎金額高達7億日圓，加上前後連號亦有獎金可領，合計最高獎金10億日圓！日本全國各地據聞都有「中獎率超高」嘅彩票行，好似係東京銀座、有樂町，大阪車站南側嘅第四大樓…等，各個熱門地點屢屢都會造成排隊盛況，亦成為年末時期最特別嘅一頁風景。
2、12月31日前同1月1日之後嘅祝賀用語唔一樣！
喺年底最後幾日，如果你遇見某位朋友，並確定喺新一年之前都唔會再見到對方的話，喺講拜拜嗰陣可以講「よいお年を」（yoi-otoshi-wo）。「よいお年を」係「良いお年をお迎えください。」嘅簡稱，意思係「預祝」對方可以迎來平平安安、健健康康、幸福美滿嘅一年。而過咗1月1日之後則係已經踏入新嘅一年，呢個時候要講「明けましておめでとうございます。」(akemashite-omedeto-gozaimasu)，意思係祝賀對方「已經」平安無事咁迎來新年。雖然講法唔同，但都蘊含滿滿祝福！
3、年末年始必食嘅料理！
喺12月31日大晦日呢一日，日本人一定要食蕎麥麵！大晦日嘅蕎麥麵有個特別名稱「跨年蕎麥麵」（年越しそば），由於蕎麥好容易切斷，代表將過去一年嘅厄運斬斷，另一方面蕎麥麵又細又長，亦有延年益壽嘅含意，係帶有好兆頭嘅食物。
新年食嘅料理稱為「御節料理」（おせち），唔單止要用多層精美餐盒盛裝，而且每一道食材都有帶有吉祥寓意，內容物仲要兼顧美觀同美味，整上嚟可以話係非常嘥時間！ 而新年唔少得嘅仲有「年糕湯」（お雑煮），日本各地年糕湯嘅整法略有不同。有趣嘅係，東日本大多數使用方形年糕，而西日本則常用圓形年糕。另外，放有烤年糕嘅紅豆湯（ぜんざい）亦都係非常有新年氣氛嘅料理。1月7日朝早，則係要食七草粥，畀腸胃舒緩休息一吓，係日本人獨有嘅養生之道！
4、以精美新年裝飾品嚟迎接神明嘅到來！
就好似聖誕節要有聖誕樹一樣，新年亦唔少得精美裝飾品。各地裝飾品可能略有不同，但最基本嘅係：門松、注連繩同鏡餅。「門松」以松同竹製成，日本人會根據住宅形式同空間，選擇合適大小嘅門松擺放於門口。「注連繩」係日本常見嘅神器，區分神域同人域，亦有趨吉避凶嘅效果，新年用嘅注連繩通常會加上桔、花、扇…等華麗裝飾。「鏡餅」係供奉畀神明嘅年糕，因為圓圓嘅形狀好似日本三大神器之一嘅八咫鏡因而得名。
無論係門松、注連繩同鏡餅，都必須喺12月28日之前就擺放好。如果喺12月29日至12月31日先至放嘅話反而唔吉利！裝飾期間最好喺「松之內」過後就要拿落嚟，關東嘅松之內多指1月1日至1月7日，關西嘅松之內則多指1月1日到1月11日，少數地區會到15日。而卸落嚟嘅鏡餅會喺1月11日「鏡開之日」製作成年糕湯或年糕紅豆湯。
5、1月1日一定會收到賀年卡明信片！
日本至今仍然保留著寄賀年卡明信片呢個傳統習慣，喺文具店可以購買到各式各樣精美嘅賀年卡明信片，或者精心挑選一張相印製成獨一無二嘅款式，並且只要喺指定時間之前寄出，對方就可以準時喺1月1日當日收到你嘅新年祝賀。更有趣嘅係，有啲賀年卡明信片上面仲有兌獎號碼！喺社交媒體、email非常發達嘅現代，可以收到親筆寫嘅賀年卡明信片，可以話係非常珍貴啊！（備註：喺1月1日當日收到嘅僅限居住喺日本嘅人。）
6、同公司同事一齊參加初詣！
同屋企人一齊參加初詣（新年參拜）祈求闔家平安，喺新年期間係輕鬆平常嘅事。而喺日本職場文化當中，同事們會一齊到公司附近嘅寺廟、神社參加初詣，上至社長、下至每位職員都會著上西裝，行入主殿內接受神職人員祈福，亦都係一項特別嘅體驗呢！
Comments