今次會介紹有關日本童謠之謎！你知唔知有一系列嘅短篇恐怖故仔，都係來自於日本童謠呢？今次我地將會介紹一首睇起嚟簡簡單單，但足以令你你心慌慌嘅童謠！
童謠《通過吧！》
《通過吧》，日文叫《通りゃんせ》，係類似《有隻雀仔跌落水(London Bridge is falling down)》嘅遊戲。喺日本版，企喺兩側嘅唔係人，而係代表神社鳥居。歌詞裡面含有七五三嘅句子。
通りゃんせ 通りゃんせ
Tooryanse tooryanse
ここはどこの 細道じゃ
Koko wa doko no hosomichi ja
天神さまの 細道じゃ
Tenjin-sama no hosomichi ja
ちっと通して 下しゃんせ
Chitto tooshite kudashanse
御用のないもの 通しゃせぬ
Go-you no nai mono tooshasenu
この子の七つの お祝いに
Kono ko no nanatsu no o-iwai ni
お札を納めに まいります
O-fuda wo osame ni mairimasu
行きはよいよい 帰りはこわい
Iki wa yoi yoi kaeri wa kowai
こわいながらも
Kowai-nagara mo
通りゃんせ 通りゃんせ
Tooryanse tooryanse
意思直譯
通過吧！通過吧！
呢度係往邊度嘅小路呢？
係往天神神社嘅小路
快啲俾我通過吧
無正當理由嘅人唔可以通過
為咗慶祝呢個小朋友成長到七歲
我準備咗禮物前往參拜
去程容易，回程可怕
可怕還可怕
通過吧，通過吧
*こわい [kowai] 喺部分方言入面有 "好攰"嘅意思， 但怖い [kowai]亦指 "驚".
短篇驚慄故事：《通過吧》
話說有一日，一位母親揸車載個仔出市鎮，一齊行山去山中嘅神社。 當駕駛至路口等紅燈嗰陣， 佢話俾個仔知，而家為失明人士而設嘅輔助聲音變咗剩係得嗶嗶聲。 個仔就好奇咁問，咁之前係咩聲呢？跟住媽媽就唱咗首童謠《通過吧》俾個仔聽，係以前過馬路會聽到嘅音樂。個小朋友似乎幾鐘意呢首歌。
當時母親嘅手機突然響起，於是佢地就停咗落嚟，媽媽離開架車，同電話另一頭嘅年輕人傾電話，仲問「件事完咗之後」佢哋之間有無機會復合，同埋佢係咪會履行承諾嚟幫手。當母親上返車，繼續揸車前進時，嗰仔似乎已經電話嘅另一邊係母親嘅年輕愛人。
當佢哋抵達山頂，媽媽再打電話畀年輕愛人，問佢而家喺邊度。出乎意料嘅係對方並無嚟到約定之地，所以母親只好自己進行計劃：同個仔一齊爬山。個仔一路唱住童謠《通過吧》，直到有個奇怪嘅婆婆同佢哋搭話。
嗰婆婆問個小朋友點解咁鐘意呢首歌嘅？個小朋友就回答好符合而家呢個情況；小朋友就嚟七歲，而往神社嘅小路又似歌詞，但佢就唔明白點解回程會好 [kowai] (可怕)。婆婆就話，呢首歌係關於一啲人將嬰兒遺棄喺山林之中，恐怖部分係指父母如果回頭望，小朋友嘅靈魂會跟住佢哋返去。個媽媽聽咗之後，就話個婆婆有無搞錯，同小朋友講埋啲咁恐怖嘅故事，然後就同拖走個仔繼續同佢一齊繼續去到山頂。
正當個小男孩喺山頂欣賞緊風景嘅時候，媽媽趁個仔唔注意，慢慢靠近佢…然後下定決心。
「Toru! 請安息啦! 你已經唔再屬於呢個世界！請過去對面嘅世界，咁我先可以重新開始！你唔記得舊年你已經嚟過呢度嗎？請同神明留喺同一個地方，唔好跟我返屋企！」
個媽媽一路無回頭，係跑落山，然後匆匆忙忙揸車返屋企。當佢以為自己終於成功時，先發現年輕愛人喺佢屋企度吊頸自殺。呢個時候，佢先察覺自己喺中途一定有唔小心回頭。但一切已經太遲。有把熟悉嘅聲音打亂佢嘅思緒。
「歡迎你返嚟啊, 媽媽. 唔好再丟低我啦，好唔好。」
點解叫天神?
天神係日本嘅學問之神，現今好多人前來祈求小朋友學業有成。但好似「平將門」咁，天神亦被視為日本三大怨靈之一。天神嘅前世名叫菅原道真，係一位卓越嘅太宰府副統帥，同時係學者，亦係一個精通漢詩嘅詩人。等我地下次有機會再深入探討關於「天神」嘅事跡吧。
Comments