講到一個令旅客遊千遍都唔會厭倦嘅國家，日本必定榜上有名。但係都唔可以每次都係去淺草雷門影相打卡、東京鐵塔漫步吹風吧！每次嚟到日本，探索新嘅旅遊景點，不經不覺一步一腳印咁墜入日本觀光魅力嘅甜蜜陷阱。喺東京出發，周遊一圈北關東，您又覺得如何呢？群馬、櫔木、同茨城呢三個獨具各自特色嘅城市，必定令您歡喜跳入呢段甜滋滋嘅旅途無法自拔！
北關東嘅三大巨頭：群馬、櫔木、茨城
從東京出發到呢三個縣，移動時間大概係50分鐘，每次到訪東京，都會順便配搭埋其中一個北關東地點旅遊，想要玩得更多更廣。呢三個縣可以話各有魅力，群馬嘅溫泉鄉係旅人喺冬日嘅最佳慰藉；櫔木嘅景點俾人一種墮入咗時光隧道嘅錯覺，沐浴喺歷史嘅懷抱中；而茨城嘅自然美景更加係令人讚嘆不已！快D跟住小編一齊睇吓，呢三個地區要點玩喇！
看不見群馬奔騰，卻可見裊裊泉霧
群馬縣有個幾頗具盛名嘅景點，佢就係日本三大名泉之一嘅「草津溫泉」！喺草津溫泉街嘅中心，會睇到泉霧紛飛嘅景色，呢個其實係草津嘅湯畑，擁有每分鐘超過32,300公升嘅自然湧泉量，喺日本可以話係數一數二！以木製嘅導水箱去收集溫泉中嘅礦物質同用作調節水溫，都已經嚟到呢度就唔好蜻蜓點水式咁快走啦，夜晚點燈後嘅攝人靚景，必定可以為您嘅旅途留下一頁精采嘅回憶。除咗草津以外，寶川溫泉從大正時代開始就廣為人知，如果想一嚐日式風情嘅旅館，喺昭和時代建立嘅「汪泉閣」就一定唔會令你失望！
櫔木嘅世界遺產，富麗堂皇嘅日光東照宮
無聽過櫔木縣都肯定聽過日光喇掛，呢度有鼎鼎大名嘅世界遺產「日光東照宮」，之所以廣為人知除咗因為被列入世界遺產之外，德川家康去世一年後，遵從遺言從久能山搬移到呢度。東照宮陸續經過改建後，愈發金碧輝煌，喺超過五千尊嘅雕刻中，人氣出名嘅有代表和平嘅「睡貓」以及「非禮勿視、非禮勿聽及非禮勿言」嘅「三猿」，更係來此處必定前來好好端祥一番！而日本國寶「陽明門」嘅社殿花費咗大約12億嘅金額修復後，再次以華麗嘅面貌迎接旅客朝聖。
湯西川雪洞祭，體驗雪洞屋入面嘅燒肉樂趣
櫔木唔單止凈係得日光東照宮，冬季嗰陣嘅湯西川雪洞祭可以話係少有嘅「日本夜景歷史文化遺產」！喺活動期間，可以睇到雪地上一間間雪洞屋，除咗雪橇活動等，更加可以體驗喺雪洞屋入面燒肉嘅新鮮玩法，雪地上點亮燈光之後，既浪漫又溫馨嘅氛圍，無論係同情人、屋企人或者係三五知己齊齊去，都跟這氛圍毫無違和感。
如果您鐘意帶有古典氛圍嘅日式風格，咁入住「日光金谷酒店」會係您嘅最佳選擇，於1873年創立，係日本歷史最悠久嘅古典酒店，距離日光東照宮步行只需要大概15分鐘，非常方便。金谷酒店亦因為愛因斯坦、海倫・凱勒等名人曾經入住過而聲名大響！酒店內嘅骨董擺設、家具等，營造出特殊風情，宛如墮入時光隧道帶您返到去明治時期，體驗當時嘅氛圍。
凍結嘅空間，茨城嘅袋田冰瀑
大自然嘅魔法往往令人嘆為觀止，今次係茨城我哋可以睇到嘅應該係一瀉千里嘅滂礡瀑布，卻喺寒冷嘅冬季凍結成靜止空間，形成咗「冰瀑」嘅奇觀。位於茨城縣嘅袋田瀑布係日本三大名瀑之一，全長120 米，寬73米，喺未完全凍結之前，仍然可以聽到流水潺潺嘅聲音，喺結成冰嘅瀑布中參雜咗幾縷暫時躲過魔法嘅水簾。袋田嘅冰瀑令到冬天雪白嘅世界，多咗另一種風貌，喺亞熱帶國家成長嘅我哋，成日都莫名被白雪皚皚嘅景色所吸引，大自然嘅白色魔法真係令人情不自禁咁想投懷送抱！
想PO靚相做網紅，就唔可以錯過茨城嘅「國營常陸海濱公園」
茨城嘅「國營常陸海濱公園」佔地大約200公頃，一年四季都盛開美麗花海，水仙嘉年華、夢幻嘅藍紫色粉蝶花、成片嘅綠色掃帚草(紅色波波球!)、再染紅成片紅海，就連冬季都可以睇到用特殊方法栽培嘅鬱金香！呢片一望無際嘅花海，形成一幅令人賞心悅目嘅美景，隨手影低放上去FB、IG等社交媒體，大家都肯定Like爆！園內仲設有遊樂場、單車專用道、運動區同BBQ區，仲可以悠悠閒閒坐喺小火車欣賞園內風光，呢幾年喺網上人氣爆相，好多都係來自國營常陸海濱公園！可以話喺觀光旅遊上掘起嘅一個熱門景點！
北關東嘅餵食鬼之旅
嚟到日本旅遊，無論身在何處日式燒肉都可以成為遊客嘅榜上首選，而嚟到北關東就更加唔可以錯過群馬嘅上州牛、櫔木嘅櫔木牛同茨城嘅常陸牛，小編雖然長期居住喺日本，但係每次品嚐到呢種入口即化嘅口感，美味嘅燒肉，「好感動吖」！群馬縣嘅水澤烏冬可以話係日本三大烏冬之一，滑嫩口感、嚼勁彈牙，令人停唔到手係咁想擺入口，大家都知道喺日本食麵食到「𠽌𠽌聲」代表YUMMY好好味，食水澤烏冬真係會令人不禁發出「𠽌𠽌，𠽌𠽌」嘅聲音！鐘意海鮮嘅朋友仔，靠海嘅茨城，新鮮嘅漁獲，再配搭上北關東產嘅日本酒，享受人生是不是也不過如此呢！仲有日本士多啤梨產量第一、饅頭、糰子等，說不完亦道不盡，不如親自嚟行一趟，尋找專屬你嘅北關東之旅！
Comments