自古以來，日本正月（新年）流行各種傳統小遊戲，而其中一種就係「羽根つき（打羽毛毽子）」，有睇開日本嘅電影或者係動漫等等嘅人可能唔多唔少都見過。打羽毛毽子可以去除厄運，被深信為祝福女仔可以健健康康咁成長嘅吉利小遊戲。而今次我哋就要介紹有關打羽毛毽子嘅歷史同規則，想知道更多日本毽球板嘅讀者就繼續睇落去啦～
打羽毛毽子嘅歷史
羽毛毽子嘅歷史，起源自古時日本人透過裝飾咗彩線嘅棒同波，透過撞擊、將波打入去對方陣地嘅小遊戲「毬杖（擊木球槌）」。呢支棒即係現時嘅「毽球板」，而波則係由附加咗羽毛嘅無患子屬植物果實演變而成。呢款小遊戲從室町時代朝廷開始流行，嗰陣據聞仲有打羽毛毽子嘅比賽㖭。
其後，到咗江戶時代，小遊戲就喺平民百姓之間逐漸廣泛傳開。毽球板喺每年年尾嗰陣會被當做幸運符，贈送俾屋企有細路女嘅家庭，因此亦延伸至喺正月期間求好運嘅小遊戲。喺元旦嗰陣透過撞擊羽毛球而發出「吭吭」聲響，有去除厄運，驅魔嘅意思。
用嚟打羽毛毽子嘅「毽球板」同「羽毛球」
打羽毛毽子嘅所需物品，係一塊連著手柄嘅長方形板塊、猶如球板嘅「毽球板」（圖上左方）同附有黑色圓球嘅「羽毛球」（圖上右方）。附加咗羽毛嘅黑色圓球，其實係無患子屬植物嘅果實，ムクロジ嘅漢字寫做「無患子」，有「孩子唔會患病」嘅意思。
毽球板上無任何裝飾物，只係一個簡簡單單嘅板狀物體，一般可分為祈願細路女可以健健康康成長嘅「邪氣彈走板（邪気を跳ね返す板）」同裝飾用嘅2種類。後者係商鋪為咗繁榮昌盛而裝飾喺商店嘅吉祥物，稱作「押絵羽子板（貼畫毽球板）」。
貼畫毽球板由將厚身紙張上嘅布料延伸，將棉花塞入去以保持立體感而成，江戶時代，古人會喺板面貼上人氣歌舞伎演員嘅相片，久而久之，貼畫毽球板就係咁誕生咗。
貼畫毽球板係由3塊板合一而組成，背面繪畫咗梅花以及代表吉祥嘅畫等等。貼畫毽球板埼玉縣春日部市係一大特產，製作貼畫毽球板嘅手藝職人仲一代傳一代，將技能流傳至今。
遊玩用途嘅毽球板同羽毛球套裝價錢約為1000～2000日圓前後左右，而貼畫毽球板嘅價錢則係由1000日圓左右到價錢昂貴嘅6萬日圓左右都有。喺每年12月17日、18日、19日期間，淺草寺範圍內仲會開設專賣毽球板嘅市場。十幾間一排過嘅貼畫毽球板商鋪，每年都吸引無數觀光客，款式由描繪咗藝人嘅肖像畫同當年做成人氣話題嘅關聯事件同人物為題材嘅貼畫毽球板應有盡有。
打羽毛毽子嘅遊玩方法
遊戲方法有兩種。一種係2人對打嘅「追羽根（板羽球）」，另一種係個人較量擊球次數多寡嘅「揚羽根」，玩板羽球嗰陣如果邊個接唔到就面臨被對方將自己塊面用墨汁塗黑嘅命運。覺得咁慘啊？其實用黑色塗黑，仲有代表驅魔嘅意思！
板羽球嘅玩法
- 兩人各手持1塊板羽球，面向對方
- 開波，然後往返擊球
- 持續擊球，直到羽毛球跌落地代表比賽結束
- 將接唔到球嘅人嘅面塗上墨汁
揚羽根嘅玩法
- 拎起毽球板同羽毛球
- 唔好俾羽毛球跌落去，睇下用塊毽球板可以將羽毛球打到幾多次上去。1人遊戲，根據唔同地方，仲會一邊唱歌一邊玩。
只要有毽球板同羽毛球，唔單止喺正月，隨時隨地都可以玩，大家不妨試吓啦！
Comments