仲未出世前, 喺媽媽個肚裡面, 我哋就沐浴喺媽媽嘅羊水中成長, 近年來似乎都有好多人提倡水中生產。「水」對於人類嚟講, 係不可或缺嘅重要元素。身體有百分之七十係水份, 幾日滴水不沾嘅話, 有可能會導致死亡添。種種證據支持下, 「水」應該係我哋最好嘅朋友喇。咁喺水入面游水, 無疑係最佳運動啦!
同「游泳」初次見面
現今嘅小寶寶, 出世後都好忙。除咗最基本嘅飲奶, 大小便, 瞓覺同哭鬧之外, 好多家長們仲會安排BB仔喺寶寶專用泳池中游泳。以目前嘅研究顯示,BB仔從細細個就開始學游水, 可以促進觸覺嘅發展, 訓練四肢嘅活動量, 同時又可以減少嬰幼兒哭鬧同促進親子交流呢啲益處呢! 無論你係幾歲開始接觸游泳都好, 我諗第一次嘅經驗都一定會令你又驚又期待啦係咪? 第一次學游水, 如果遇到好嘅啓蒙老師, 長大成人後都會繼續keep住游水。而大人持續游水嘅習慣都係好處多多㗎。唔單只可以強身健體, 對於心肺功能嘅訓練都係好有幫助。因為游泳係全身肌肉都會好均衡咁用到, 仲保持到均稱嘅身材添。睇比賽除咗可能欣賞到選手們精湛嘅水準之外, 身材都好有睇頭添。
愛上游泳就好似染上戒不掉的癮
現代人嘅運動意識開始強咗, 好多人會利用返工前, 放工後, 或者係放假時運動嚟健身。而各式各樣嘅健身房都好蓬勃發展, 但係唯一游泳呢個基本運動, 仲係喺運動項目中人氣不減。其中一個主因就係因為游水唔會受到年齡規限, 玩呢項運動受傷嘅機會比起其他運動又少好多。成日都會喺泳池見到好多長輩們喺水中仍然老當益壯, 後生仔都未必追得上佢哋嘅速度呢! 而游班課程方面, 除咗提供基本嘅游泳教學之外, 都經常會安排一啲有趣嘅水上活動, 例如喺水中利用一啲小道具嚟進行復健運動, 配搭音樂喺水中運動, 或者係玩遊戲等等都有。而且而家嘅游泳池大部份都配備SPA, 蒸氣室等設備, 等你喺運動後都可以作適度放鬆呢。
淨係游水都唔夠
當你愛上呢項運動, 除咗追求技術上嘅進步之外, 其實仲可以去玩埋其他同游水相關嘅運動項目添。例如跳水, 或者係結合咗游泳, 藍球, 足球同欖球嘅水球運動。仲有鍾意體操, 音樂同舞蹈嘅朋友仔, 都可以試吓水上芭蕾, 都有好多游泳愛好者會挑戰公開水域嘅競泳, 甚至挑戰三項鐵人或者兩項鐵人賽事添。呢啲運動項目都係以游泳作為基礎, 再嚟個進階發長。你話一旦愛上游泳呢個運動, 係咪會令你愈陷愈深吖?
一個同世界游泳好手交流嘅機會
想知道全世界有幾多人同你一樣熱愛游泳嘅話, 咁你就絕對唔可以錯過2021年喺日本關西舉辦嘅「World Masters Games」喇。每四年舉辦一次, 2017年第9屆啱啱喺紐西蘭舉辦完。嚟自全世界超過100個國家嘅運動好手, 參賽選手約有2萬8千人, 只要係年滿30歲以上, 都可以參賽! 而游泳相關競技項目係喺關西嘅兵庫縣舉辦, 有游泳賽, 跳水, 水球, 韻律泳呢幾項。 鍾意游水嘅你, 呢個係你絕佳嘅舞台, 唔單只可以測試睇吓自己嘅技術水平, 仲有機會將獎牌贏返屋企添! 唔好淨係同「游泳」談戀愛喇, 係時候要俾返個「名份」佢啦!
更多「World Masters Games2021關西」嘅資訊，請睇呢邊 👉👉👉 https://www.wmg2021.jp/en/
Comments