先人靈魂會保佑在生嘅後人？神明能夠帶嚟財富？今次【驚慄・奇幻系列】所介紹嘅內容，主要圍繞著江戶時代嘅東京、以及於古時江戶城發生嘅城市傳聞！如果各位下次有機會到下文提及嘅地方，切忌要小心、唔好犯禁忌啊！
江戶結界：四神相應
話說德川家康稱霸關原之戰後，喺僧侶天海提供嘅智謀下成立江戶幕府，坐上征夷大將軍之位。作為天台宗僧侶，天海懂風水方位之術，並擁有陰陽道相關知識。經過天海一番調查，最終擇定江戶為新幕府將軍政權中心地，而其判斷江戶適合建立首都嘅標準，正正就係從參考「四神相應」嘅關係得來。
- 東方—青龍之川
- 西方—白虎之道
- 南方—朱雀之水
- 北方—玄武之山
中國於建造長安城時曾參考同樣準則，而日本平安京（京都）亦係同樣建立於四神相應之地。江戶所建之地嘅四神所在方位如下：
- 江戶東方—平川
- 江戶西方—東海道
- 江戶南方—江戶灣
- 江戶北方—富士山
事實上，富士山距離正北方有112度之差。惟當時頒布嘅地圖將富士山當作北方，江戶人人深信四神偉大守護力量。
東京結界：北斗七星
千祈唔好以為係≪北斗神拳≫裡面嘅「北斗七星傷痕」啊！呢到所講嘅係屬於大熊座一部分嘅北斗七星。好多古代奇觀都由天文星相而生，例如埃及吉薩金字塔嘅三座金字塔，就係按照獵戶星座排列而成；又例如吳哥窟遺址，就與天龍座星互相呼應。身處東京內，以下七個位置都可以窺見大熊座嘅樣貌：
- 平將門首塚
- 鳥越神社
- 兜神社
- 神田明神
- 筑土八幡神社
- 水稻荷神社
- 鎧神社
有別於其他城市傳聞，以上七個景點係為安撫平安時期武將平將門嘅怒氣而興建。傳說中，平將門被斬首之後，其首級被帶往京都示眾。有一日，首級突然衝天飛起，怒氣衝移地往東方飛去尋找自己嘅身軀，因而喺東京一帶造成大亂。以上七個景點除咗同傳說有關之外，更巧合嘅係佢哋更剛好形成北斗七星形狀。
為咗避免平將門嘅力量危害到周遭民眾，因此古人就喺以下五個地點興建各大景點。
- 靖國神社
- 谷中靈園
- 雜司谷靈園
- 築地本願寺
- 青山靈園
從地圖所見，靖國神社位於正中央，其他地方則如一道封印之門般圍繞著靖國神社。巧合嘅係每個地方幾乎都係墓地，令人不禁聯想係咪想藉死者嘅力量嚟對抗平將門呢！
日本流傳著多個有關結界嘅城市傳聞，部分可能只係巧合，又或由後人穿鑿附會。但對於未知嘅世界，正所謂「寧可信其有，不可信其無」，只要唔好刻意或非刻意觸犯禁忌，抱持著敬意的話應該就可以平安渡過吧！
Comments