上集提到日本人之間盛傳有關結界嘅城市傳聞，而且大多數國民都相信真有其事，可謂眾所周知！今次，編輯部就會為大家介紹人民口中相傳嘅「結界」到底係邊！
關於結界嘅都市傳說
因為陰陽師過去大行其道而且頗具影響力，令有關結界嘅都市傳說更加增添幾分可信度。過去日本首都嘅遷移記錄亦顯示，遷都事宜都要先諮詢陰陽師意見，例如當遷都至平安京（現代京都）時，當時政權就請陰陽師揀咗一個風水好嘅地點為京師重地，並按照唐朝首都建築風格，於風水辟邪格局之下打造成四四方方嘅棋盤狀構造。
或許純屬巧合，部分現時統稱為能量景點（パワースポット）嘅神聖地方，其所在之處令到人民懷疑呢啲景點其實根本係被刻意於特定地址設計建造。多數人猜測一切如此精心安排，都係為咗達到阻隔屏障之作用。
平城京結界
位於近畿地區嘅巨大結界，曾為平城京起保護作用。即使其後遷都至平安京，京城仍於處於巨大結界守護範圍內。
巨大結界將各個景點連成一個巨大五芒星結界，五鼎點所在景點如下：
- 元伊勢外宮、豐受大神社（京都府）
- 伊勢神宮內宮（三重縣）
- 伊弉諾神宮（兵庫縣）
- 伊吹山（岐阜縣與滋賀縣交界）
- 熊野本宮大社（和歌山縣）
而座落五芒星結界正中央嘅，就係平城京。
五芒星結界運用陰陽五行原理，每個頂點各代表一個物質。近畿五芒星呈現上下顛倒嘅狀態，雖然喺西方文化中係惡魔象徵，但日本人就係為求鎮壓東北方鬼門所在而有咁嘅設計。
近畿五芒星結界據聞係日本最大嘅結界、橫跨五個縣市，一日要行遍五個地方似乎有啲困難，而且需要耗費大量體力、時間、金錢，但部分人依然認為非常值得挑戰！相傳只要全數參拜五芒星頂點上嘅景點，就可以帶來好運與財富，大家有機會要唔要試試呢？
江戶城結界：另一個五芒星結界
江戶城五芒星結界有更合理理據令人相信，其結界點上嘅五個景點正正就係代表咗陰陽五行嘅五個元素。喺地圖上，結界雖然並非呈現一個完美五芒星，但依然會有好多人會到景點參拜。結界點上五個能量景點分別為：
- 東京大神宮（木行）
- 神田明神（火行）
- 水天宮（水行）
- 金刀比羅宮（金行）
- 日枝神社（土行）
據聞德川家康喺建造江戶城時，曾詢問過陰陽師嘅意見，為江戶城周圍建立屏障。其後江戶幕府改朝換代，江戶變成現時嘅東京，而江戶城就係皇居。
日本尚有「龍脈」、「平將門封印」等更多關於結界嘅傳說，有興趣嘅不妨繼續閱讀FUN! JAPAN【驚慄・奇幻系列】文章吖。
Comments