定山溪係日本著名嘅溫泉度假勝地，每年約有240萬遊客到訪，為北海道三大溫泉鄉之一，另外兩個分別係登別溫泉及湯之川溫泉。本文將介紹該地區，以及一些溫泉酒店。
去定山溪溫泉放鬆一下
定山溪溫泉此名字來源於一位名叫美泉定山嘅僧侶，於1866年發現咗定山溪溫泉。美泉定山發現呢度嘅水具有治療效果。所以開咗一個溫泉水療中心，將病患帶到此治療。
定山溪溫泉有56個溫泉源，可為各種室內及室外浴池提供8,600升溫泉水。除咗溫泉，定山溪仲係戶外活動嘅好去處，自然景觀豐富。遊客可以享受散步、遠足、踩單車甚至划船。定山溪擁有眾多樹木，係秋季賞紅葉嘅好地方。
定山溪溫泉喺邊度？距離札幌約一小時車程，甚至仲有從新千歲機場出發嘅巴士。靠近城市嘅定山溪獲得「札幌後花園」嘅別稱。
入住於定山溪嘅酒店
作為札幌嘅主要度假勝地，定山溪有多種住宿選擇。該地區嘅酒店規模從小到大，提供各種設施。部分為日式旅館（或傳統日式旅館），亦有比較現代嘅西式房間。
定山溪翠山亭酒店 (Jozankei Daiichi Hotel Suizantei)
定山溪翠山亭酒店成立於1957年，坐落於能俯瞰定山溪溫泉嘅山丘上，享有迷人美景。非常適合想體驗傳統日式旅館嘅客人。酒店亦提供日式及西式客房。
酒店設有露天溫泉、桑拿及按摩浴缸。其他娛樂選擇包括遊樂廳、卡拉OK、酒吧、藝術與手工藝品展覽以及茶室。客人可以喺客房內或酒店嘅餐廳用餐。
相關資訊
- 名稱: 定山溪翠山亭酒店 (Jozankei Daiichi Hotel Suizantei)
- 地址: 北海道札幌市南區定山溪溫泉西3丁目105
- 交通:
- 從札幌乘搭免費接駁巴士※需預約
- 出發／抵達地點：札幌市中央區大通西5丁目昭和大樓前（大通公園側／地下鐵大通站 出口1）
- 出發／抵達時間：（去程）大通西5丁目14:30發車→酒店；（回程）酒店10:00發車→大通西5丁目
- 從JR札幌站南口巴士總站12號乘車處，乘搭定鐵巴士「定山溪溫泉行」約75分鐘，於「第一飯店前」落車。
定山溪山亭俱樂部酒店 (Suizantei Club Jozankei)
定山溪山亭俱樂部酒店僅提供14間客房，係一間舒適嘅小型日式旅館，非常適合尋求寧靜與隱私嘅客人。寬敞嘅客房面積介乎56至110平方米之間。客房配有榻榻米及障子紙屏風，擁有傳統日式風格。
部分客房配有日本檜木浴缸及淋浴間。客人可以喺大型公共浴池或室內浴缸內享受溫泉水。酒店提供晚餐套餐，包括北海道各地嘅新鮮海鮮及時令蔬菜。
相關資訊
- 名稱: 定山溪山亭俱樂部酒店 (Suizantei Club Jozankei)
- 地址: 札幌市南區定山溪溫泉西2丁目10
- 交通:
- 從札幌乘搭免費接駁直達巴士 ※需預約
- 出發／抵達地點：札幌市中央區大通西5丁目昭和大廈前
- 出發／抵達時間：大通西5丁目14:30發車→旅館／旅館09:50發車→大通西5丁目
- 從札幌乘搭路線巴士
- 從札幌車站南口乘搭「定鐵巴士」 約50分
- 從地下鐵南北線真駒內車站乘搭「定鐵巴士」 約30分
定山溪豪景酒店 (Jozankei View Hotel)
對於想要多啲嘢玩嘅人嚟講，16層樓高嘅「定山溪豪景酒店」，係一流選擇，因為佢擁有大量豐富設施。共有五個溫泉浴池：室內大公共浴室Yusuigo、露天浴池、景觀室內浴池「Seiten」、景觀露天浴池及泡泡浴池。
「定山溪豪景酒店」設有一個遊樂廳、私人卡拉OK室、一個可坐低享用飲品嘅優雅休閒俱樂部，以及一個充滿各式手信禮、糖果及北海道特產嘅大型商店。若要喺Jozankei View餐廳用餐，可以享用高級自助餐或選擇傳統餐廳。
此酒店特別適合攜帶小朋友嘅客人，因為佢擁有一個4000平方米嘅大型水上公園「水上王國Lagoon」。喺呢度可以體驗人工造浪沙灘。或係更刺激嘅滑水道、水槍等，甚至仲有海盜船！
相關資訊
- 名稱: 定山溪豪景酒店
- 地址: 北海道札幌市南區定山溪溫泉東2丁目
- 交通:
- 從札幌市乘搭免費接駁巴士
- 出發／抵達地點：札幌市中央區大通西4丁目道銀大樓１樓後方（南側）
- 出發／抵達時間：大通西4丁目14:00發車→酒店／酒店10:00發車→大通西3丁目
從札幌車站南口乘搭「定鐵巴士」約66分，於定山溪溫泉東2丁目落車。
定山溪大酒店瑞苑
「定山溪大酒店瑞苑」建於高台上，可以俯瞰溪谷。對於享受溫泉並欣賞風景嘅客人，佢係理想嘅選擇。
酒店內嘅日式及西式客房寬敞，房內有溫泉，可以從大窗戶欣賞定山溪嘅景色。對於家庭或大型團體，家庭房有4張床及3張榻榻米，最多可容納7人。
「定山溪大酒店瑞苑」提供眾多娛樂設施。如果唔浸溫泉，亦可以喺酒店嘅休息室、游泳池、居酒屋風格小酒館、美容護理、按摩、乒乓球室、遊戲區或卡拉OK酒吧裡消磨時間。
如果肚子餓，有Food Factory Grandeur餐廳提供各種日式、西式及中式菜餚。對於希望嘗試更傳統或更正宗日本料理嘅人，仲有間「Bisen Yuzen」日式餐廳。
相關資訊
- 名稱: 定山溪大酒店瑞苑
- 地址: 北海道札幌市南區定山溪溫泉東4丁目328
- 交通:
- 免費接駁車: 從JR札幌站北口乘搭免費接駁車 (需事先預約)。 札幌站出發14:00開車；酒店出發9:50開車。
- 巴士:JR札幌站南口巴士總站12號乘車處，乘搭定鐵巴士「定山溪溫泉行」，約90分鐘於定山溪車庫前落車。
定山溪萬世閣酒店Milione
關於「定山溪萬世閣酒店Milione」嘅名稱，喺義大利語中「Milione」係指百萬，同時亦係義大利探險家馬可孛羅嘅綽號。呢個命名並非巧合，因為呢間酒店嘅東方主題設計靈感嚟自馬可孛羅所走過嘅絲綢之路。酒店提供日式及西式客房。
於溫泉中放鬆身心後，可以喺酒店嘅Marco Polo自助式餐廳中享受美食。然後喺夜總會或其中一間卡拉OK房間娛樂一下。
相關資訊
- 名稱: 定山溪萬世閣酒店Milione
- 地址: 北海道札幌市南區定山溪溫泉東3丁目
- 交通:
- 免費接駁車: 從JR札幌站北口乘搭免費接駁車 (需事先預約)。札幌站出發14:30開車；酒店出發10:00開車。
- 巴士: JR札幌站南口巴士總站12號乘車處，乘搭定鐵巴士「定山溪溫泉行」或「豐平峽溫泉行」，約60分鐘於定山溪車庫前落車。
Comments