今次日本驚慄・奇幻系列，換個話題，唔講鬼故，講日本嘅神秘傳說吧！今次我地將會介紹陰陽術，一齊探究呢個日本古代嘅神秘之術。
陰陽術
乜嘢係陰陽術？
陰陽術奉行陰陽道，一陰一陽之道，亦包括觀星、睇相、測方位、除靈祈福、占卜祭祀。
陰陽起源
相信陰陽術最初係嚟自中國嘅陰陽五行，喺公元5、6世紀傳入日本。之後日本獨自發展演變成，加上咒術同占卜術，直至平安時代先發場成陰陽術，陰場術仲被編入政府體制之下，成立咗陰陽寮，分為陰陽道、天文道、曆道，為求得知吉凶、觀測天文、管理曆法，陰陽師喺呢個時代開始就逐漸大放異彩。
陰陽師：天文觀測、治訂曆法、占卜問卦
日本帝王為咗掌權管治天下，將陰陽道編入律令制，成立咗陰陽寮，而陰陽師就係於陰陽寮任職嘅官員。陰陽師呢個頭銜，要專精陰陽道之材，先有機會獲得。
陰陽師嘅工作係好專業，除咗觀測天文，制定曆法之外，仲有神秘嘅占卜、問良辰吉日，甚至到保護皇宮唔受邪惡入侵。而當中最具代表嘅就係，連遷宮咁大件事，都係要先問過陰陽師先至可以決定。
著名陰陽師：安倍晴明
安倍晴明，喺日本無人不知無人不曉，佢個名字出現喺好多漫畫、動畫、小說同都市傳說之中。喺公元10世紀末左右，佢真係非常有影響力。據說佢可以占星準確咁預測一啲事件，例如未出生嬰兒嘅性別、搵返失物。而他在世嘅平安時代，稱得上太平盛世。有人認為係因為安倍晴明為平安京辟邪除惡，保護咗平安京。部分傳說中，指安倍晴明甚至可以操控式神，命令式神聽佢嘅指令為佢辦事。
而且安倍晴明出乎意料咁長壽、健康、甚至好少病痛，所以有啲人甚至認為佢唔係一般普通人。有些傳聞話佢嘅母親係一隻法力高強嘅狐狸，可以化身成人。喺安倍晴明過世後，喺京都建立咗一間晴明神社供奉佢，至今都有好多人去參拜，求財求好運，非常受歡迎。
陰陽道嘅廢除
隨住改朝換代，陰陽道失去咗國家朝廷勢力保護，逐漸式微，而陰陽師嘅地位就唔再突出。權力由天皇朝廷手上轉移到去戰國大名、甚至後嚟嘅江戶幕府將軍。但仍然有好多大名或者將軍會去尋求陰陽師嘅力量，或者係防止其他人去操控陰陽師。據說安倍嘅後代土御門一族，後來就喺德川幕府嘅庇護之下，得以生存落去。
到咗19世紀中期，政府認為陰陽道係一種迷信，因此廢止咗。
陰陽道流傳落嚟嘅習俗：求好運、占星以及結界
雖然陰陽道被廢止咗，亦禁止使用陰陽術，但有好多關於陰陽道嘅習俗流傳至今。呢啲流傳落嚟嘅習俗，包括為求令生活過得更好而求好運，占星希望知道未來運勢，甚至利用結界遠離唔好嘅事物。
良辰吉位：惠方卷
本來惠方卷只係喺關西流行，演變至今，喺節分當日，要向住嗰年嘅吉位直視，一口氣食完成個惠方卷，中途唔停得，亦唔可以講嘢，安安靜靜咁食完，一邊食一邊諗住想求嘅願望，為求新一年心想事成。每年嘅吉位都唔同，要睇掌管福德嘅歲德神嗰年喺邊個方向。
黃道吉日：當日吉凶禍福
日本人亦都似香港一樣，會睇黃道吉日，邊日宜嫁娶、邊日宜搬家，佢地稱為「六曜」。喺「友引」日唔適宜辦喪事，而「佛滅」就唔適宜結婚嫁娶，嫁娶喜事最好揀喺「大安」之日舉行。
犯太歲：厄年
仲有一個習俗都係香港都有，就係「犯太歲」嘅概念，日本稱之「厄年」。雖然無人可以證明呢個習俗係唔係源自陰陽道，但由平安時代起就有呢個習俗嘅存在。厄年係容易發生災禍嘅年份，依性別唔同厄年亦唔同，男性要避開25、42、61歲，而女性就要避開19、33、37歲。喺呢三個年最好小心疾病同災難。為求一年平安順利，日本人會去神社寺廟參拜，喺神社寺廟進行消災解厄嘅儀式。另外，仲會買護身符，隨身攜帶幸運小物。
首都結界嘅都市傳說
雖然無任何官方文件記載或證明，但都幾多人相信呢個都市傳說。有啲人甚至會行哂呢啲結界上嘅景點，祈求帶嚟好運。
起初大家相信東北方係鬼門（外鬼門），而其對角線嘅方向（西南）就係內鬼門，既然叫做鬼門，就表示兩個鬼門都係凶位，唔吉利，而結界嘅出現就係為咗封住鬼門，以防懷事發生。為了封住鬼門，以防壞事發生。
想知道更多結界相關內容…請看下回分解！敬請期待～
Comments