北海道位於日本最北端。觀光景點散布係呢個廣闊嘅土地上，有神秘嘅湖泊、周圍都有靚靚嘅大花田等，有好多可以欣賞自然風光嘅景點。另一方面，札幌亦有日本著名嘅紅燈區，可以喺呢度享受都會嘅娛樂。
關於北海道
北海道係日本47個都道府縣中最大。面積佔咗日本國土嘅約22％，其中山地就佔咗一半。全年氣溫都偏低，氣候同日本其他地區有啲分別，亦因為呢個原因，喺北海道可以見到好多獨特嘅動植物。
北海道歷史概要
北海道嘅原住民係「阿伊努族（Aynu）」。去到17世紀左右，日本人（大和族）先進入北海道，仲同阿伊努族之間發生戰爭。之後，阿伊努族文化逐漸衰落，而北海道嘅商業亦開始發展。去到19世紀，日本因美國要求而開放箱館（即現今嘅函館）港口，現代化亦隨之而來。
遊北海道要玩幾多日？
北海道地大物博，觀光景點多，但分布喺唔同地區。北海道入面都可以分成幾個觀光區，但就無可能可以短短一日時間玩一個地區，所以建議規劃行程時，要縮細想遊嘅區域或者景點範圍。如果想要巡遊北海道入面嘅各地區，建議最少要安排一個星期。
北海道旅遊出發前實用資訊
北海道面積廣大，分成幾個唔同區域，觀光景點亦好多，想去唔同景點時會需要好多交通移動。所以事前做足功課，準備好唔同嘅資訊，就會令成個旅程更多省時順暢。
邊到可以領取北海道觀光地圖？
札幌、函館同旭川市內嘅酒店或者旅遊諮詢中心，都會有提供北海道觀光地圖。特別推薦札幌車站西口驗票閘門前嘅「北海道札幌旅遊諮詢處」，呢度提供北海道道內所有地區嘅旅遊小冊子，有好豐富嘅旅遊資訊。
或者，亦可以由北海道觀光振興機構嘅網站「GoodDay北海道」下載北海道觀光地圖。
北海道有邊到可以寄存行李？
北海道嘅主要JR車站、機場都會有投幣式儲物櫃(Locker)。但除咗大型車站之外，其他車站嘅儲物櫃並唔多，有啲甚至無儲物櫃設施。因此，建議盡量喺規模較大嘅車站先搵儲物櫃。
儲物櫃嘅數量方面，例如JR札幌站（驗票閘門外）有大約1,150個，JR小樽站有大約220個，JR旭川站約有150個，JR函館站約有500個。
另一方面，主要觀光景點嘅旅遊資訊中心，或者一啲觀光設施都有提供臨時行李寄放服務。甚至會有部份札幌市內嘅酒店，提供行李寄放服務畀非住宿客人。
以下係部份北海道可以存寄放行李嘅設施同地點。
- JR北海道：札幌站、函館站等大型車站嘅投幣式儲物櫃
- 新千歲機場：投幣式儲物櫃及行李寄放服務
- 函館機場：投幣式儲物櫃（54個）
- 登別市：行李寄放服務
- 小樽市：旅遊諮詢處提供行李寄放服務
- 旭川市：雅瑪多運輸永旺夢樂城旭川站前
- 北斗市：北斗市旅遊諮詢處
- 富良野市：JR富良野站旁的觀光諮詢中心
- 札幌市：飯店GARDENS CABIN（需預約）
- 札幌市：飯店Stripe 札幌（需預約）
投幣式儲物櫃費用約300～800日圓；行李臨時寄放費用約為300～840日圓。（截至2020年1月資訊）
北海道氣候
北海道位於日本列島最北方，全年氣溫偏低。由於寒暖溫差大，而且四季分明，所以因應唔同嘅季節，可以欣賞到嘅景色亦好唔同。
另外，北海道一日內嘅冷暖溫差都可以好大。所以建議去旅行嘅朋友，要帶多幾件薄嘅衣物，以便應付溫差。
北海道嘅春天（3～5月）
北海道嘅春天係千變萬化嘅季節。3月份仲有冬季嘅痕跡；進入4月後，雪總算會融。
春天嘅睇頭係各式各樣嘅花卉。4月下旬可賞櫻花；5月有梅花、鬱金香同紫丁香。
北海道嘅夏天（6～8月）
初夏仲係新綠嘅季節。初夏日本雖然係梅雨季節，但北海道基本上無雨季。進入7月份，氣溫有時會超過攝氏30度，但係北海道嘅夏天季較短，到咗8月份左右，涼爽嘅日子就會漸漸增加。
夏季最精彩嘅要數薰衣草。喺北海道各地，盛開嘅薰衣草會將大地染成一片夢幻嘅紫色。
北海道嘅秋天（9～11月）
秋天係一個充滿變化嘅季節。進入9月份，炎熱嘅日子仍然會持續，但係山區就會開始落雪。
9月下旬，北海道嘅紅葉就開始登場，比起其他地區會早人一步感受到秋意。
北海道嘅冬天（12～2月）
北海道嘅冬季嚴寒，最高氣溫有時甚至會係零度以下。所以一定要做好防寒措施喔。
冬季特色係有好多以冰雪為主題嘅活動。例如可以觀賞雪雕、冰雕，仲可以享受冰上迷你游戲等等嘅特別體驗。
北海道體驗活動
北海道可以體驗嘅活動，根據唔同地區會有分別，下面列出喺唔同地區可以體驗嘅活動。
- 美景景點眺望雄偉壯麗嘅大自然（洞爺・登別地區）
- 喺歷奇公園(Adventure Park)體驗森林空中散步（小樽・新雪谷地區）
- 喺動物園睇活蹦亂跳嘅動物（旭川周邊地區）
- 企喺睇似無邊際嘅花田嘅中心（富良野・美瑛地區）
- 輕鬆體驗豪華露營（十勝・帶廣地區）
- 由山頂欣賞日本三大夜景之一（函館地區）
- 登上日本嘅最北端（稚內・利尻・禮文地區）
- 可以見識到罕見又不可思議嘅綠球藻（釧路・根室地區）
札幌・定山溪地區
札幌同定山溪地區位於北海道嘅西南面。札幌係北海道道廳所在地，係北海道嘅政治、經濟同文化中心。景點類型豐富，由薄野鬧市紅燈區到可以體驗大自然嘅景點都有。
定山溪距離札幌車站約一個小時路程。溫泉、泛舟同騎馬等體驗都好吸引。
| 知名景點 | 特色 |
| 札幌電視塔 | 可以眺望札幌地標 |
| 札幌市鐘樓 | 被指定為重要文化財嘅資料館 |
| 大通公園 | 由東至西橫貫札幌市中心嘅公園，園內有好多雕刻 |
| 白色戀人公園 | 著名朱古力主題公園 |
| 札幌啤酒博物館 | 可以認識札幌啤酒嘅歷史同試飲 |
| 札幌中央批發市場 | 有新鮮豐富嘅海產，係食嘢買嘢嘅好地方 |
| 溫泉湯煙夜間點燈 | 定山溪地區嘅夜間點燈活動 |
| 北國優駿公園 | 以馬為主題嘅公園 |
| 阿伊努族文化交流中心 | 可以了解北海道原住民「阿伊努族」嘅文化 |
小樽・新雪谷(二世古)地區
小樽・新雪谷(二世古)地區位於北海道嘅西南部。可以遊覽港口都市「小樽」，同埋欣賞周圍廣闊雄偉嘅大自然景式，仲有各式各樣嘅體驗。
| 知名景點 | 特色 |
| 小樽運河 | 搭船遊覽小樽運河 |
| Kiroro Resort | 喺夏季同冬季都有豐富活動可以體驗高原度假村 |
| 小樽港Marina | 可以乘搭遊艇或巡航船 |
| NAC自然戶外探索公園 | 可以體驗爬樹同高空彈跳嘅歷奇公園 |
| 小樽天狗山纜車 | 可以由空中欣賞小樽夜景 |
洞爺・登別地區
洞爺・登別地區位於北海道嘅西南部。有曾經以製造業而繁榮嘅工業大城市「室蘭」、日本第三大破火山口湖「洞爺湖」、北海道著名「登別溫泉」等等，好多著名觀光景點。
| 知名景點 特色 | 特色 |
| 洞爺湖觀光遊覽船 | 可由湖面上近距離欣賞破火山口湖 |
| 室蘭夜景 | 夜晚點燈後嘅工廠夜景如夢幻一樣 |
| 登別地獄谷 | 見證溫泉由火山口遺跡湧出嘅壯觀景象 |
| 登別伊達時代村 | 以武士同忍者為主題嘅樂園 |
| SAIRO展望台 | 俯瞰洞爺湖美景嘅絕佳位置 |
函館地區
函館位於北海道西南部，係北海道嘅最南端，面向日本本州。函館係北海道嘅主要觀光地點之一，自從北海道新幹線開通後，前往函館觀光嘅交通就變得更加方便。
| 知名景點 | 特色 |
| 函館朝市 | 可以品嘗使用新鮮食材製作嘅海鮮丼 |
| 函館山 | 由山頂觀景台可眺望被評選為米滋連三星景點嘅夜景 |
| 湯之川・熱帶植物園 | 最出名嘅就係冬天浸溫泉嘅猴子 |
| 五稜郭塔 | 五角星形狀嘅城郭 |
| 大沼國立公園 | 欣賞山岳景觀同埋橋樑，仲可以划獨木舟或體驗用雪鞋於雪地上步行 |
| 舊相馬邸 | 一座擁有百年以上歷史嘅富商豪宅 |
旭川周邊地區
旭川周邊地區位於北海道嘅中心位置。最出名係有日本最大嘅國立公園「大雪山國立公園」嘅大自然美景。另外，旭川的冬天仲有好多活動，可以帶畀嚟好多珍貴體驗
| 知名景點 | 特色 |
| 旭川市旭山動物園 | 園內採取獨特嘅「行動展示」方式，畀參觀者可以見到動物們喺大自然中展現出嘅本能同習性。 |
| 大雪山層雲峽・黑岳纜車 | 只要短短7分鐘就可以攀升至黑岳五合目 |
| 大雪山旭岳纜車 | 日本最遲開嘅櫻花點，亦係每年最早有紅葉嘅景點 |
| 北海道 冰之美術館 | 體驗零下41度嘅世界 |
| 旭川拉麵村 | 匯集咗8間著名嘅旭川拉麵店 |
富良野・美瑛地區
富良野・美瑛地區位於北海道嘅中心位置，喺札幌同旭川之間。係呢個地區最大吸引遊客嘅地方，應該要數周圍都有嘅薰衣草田，6月至7月係最佳觀賞薰衣草嘅時期。
| 知名景點 | 特色 |
| 日出公園薰衣草田 | 由觀景台可以俯瞰薰衣草田 |
| 星野TOMAMU度假村 | 雲海平台/霧冰平台 夏天可以欣賞雲海，冬天可觀霧冰 |
| 白金青池 | 枯落松葉倒影喺湛藍色嘅湖水上，呈現仙境般嘅美景。 |
| 富良野芝士工房 | 可以參觀芝士製造過程 |
| 富良野玻璃森林工房 | 可以體驗製作玻璃工藝品 |
| 千代田農場 | 可以品嘗品牌牛肉「美瑛和牛」；亦可以同小馬或綿羊等動物互動 |
稚内・利尻・禮文地區
稚内・利尻・禮文地區位於北海道北部，亦係日本嘅最北端。有好多旅遊景點，遍布喺稚内市周邊嘅島嶼。
| 知名景點 | 特色 |
| 禮文島 | 日本最北端嘅島嶼，有海岬同岩石景等 |
| 利尻島 | 擁有豐富海產嘅島嶼 |
| 日本最北端之地碑 | 位於日本最北端海岬「宗谷岬」紀念碑 |
| 野寒布寒流水族館 | 日本最北嘅水族館 |
| 佐呂別濕原 | 可以見到好多稀有嘅動植物 |
網走・紋別地區
網走・紋別地區位於北海道東面，係一個面向鄂霍次克海嘅沿海地區。主要觀光景點都係同海洋相關嘅設施。
知名景點 特色
博物館 網走監獄 呢個監獄遺跡，除咗可以參觀外，仲可以體驗試下食囚犯午餐
冰海展望塔「鄂霍次克塔」 日本唯一可以眺望流冰嘅展望塔
鄂霍次克海豹中心 可以睇到受保護海豹，亦有人工飼養嘅海豹
OMUSARO原生花園 夏天可以睇原生花草，冬天就可以睇流冰
鄂霍次克流冰館・天都山展望台 可以同時欣賞海洋生物同埋山景
十勝・帶廣地區
十勝・帶廣地區位於北海道南部。呢到無高山，只有一望無際嘅平原。有好多可以欣賞大自然嘅觀光景點。
| 知名景點 | 特色 |
| 十勝 中札內農村度假村 豪華露營區 | 輕鬆體驗豪華露營 |
| 銀河森林天文台 (陸別宇宙地球科學館) | 可以用大型望遠鏡進行觀星 |
| 十勝HILLS | 以花卉、農產同美食為主題嘅公園 |
| 十勝千年之森 | 用電動Segway代步逛園區 (需預約) |
| 十勝Nuppuku花園 | 可以欣賞約4公頃的人工庭園 |
釧路・根室地區
釧路・根室地區位於北海道東端。有許多美麗的自然景點，例如有登錄於《拉姆薩爾公約》嘅釧路濕原、阿寒湖同摩周湖等美麗湖泊。
| 知名景點 | 特色 |
| 阿寒湖 | 綠球藻棲息地 |
| 摩周湖 | 全世界數一數二透明度嘅湖 |
| 屈斜路湖 | 日本最大嘅破火山口湖，景色宏偉有魅力 |
| 釧路市濕原展望台 | 可以眺望釧路濕原嘅觀景台 |
| 阿寒湖愛努村 | 可以觀賞北海道原住民阿伊努族嘅傳統舞蹈表演同祭典儀式 |
北海道推薦購物點
如果想喺北海道購物嘅話，推薦您前往百貨公司、購物中心等大型設施。
| 店名 | 特色 |
| 千歲Rera Outlet Mall | 集結大約100間時裝、飾物等專門店 |
| JR札幌站內 | 有好多買手信嘅舖頭 |
| 丸井今井百貨公司 札幌本店 | 有好多以20～40歲為對象嘅時裝飾店，全館提供電話傳譯服務 |
| 札幌PARCO百貨 | 豐富嘅休閒服飾品牌，地下2樓有手信舖 |
| Feeeal旭川 | 集結咗時尚、生活雜貨同埋各款特色手信 |
| 藤丸百貨 | 有好多價格合理嘅休閒服飾品牌 |
| 函館Pole Star購物中心 | 由時尚服飾到雜貨都一應俱全嘅購物中心 |
| SAPPORO FACTORY札幌工廠購物中心 | 利用札幌啤酒工廠改建而成，有大概160間店舖嘅大型商業設施 |
| 釧路漁人碼頭MOO | 有豐富嘅北海道同釧路手信（土產） |
北海道各區域雖然都有小型嘅購物中心，但是最方便嘅購物地點都喺札幌車站附近。匯集咗好多著名品牌專門店，同埋有發售唔同地區嘅特色甜品、零食同手信等嘅商店。
其中，「丸井今井札幌本店」同「大丸札幌店」等百貨公司，仲提供咗完善服務畀外國旅客。例如，運用電話或平板電腦嘅傳譯服務、免稅退稅等。
北海道嘅祭典・活動
喺北海道，除咗夏日祭典之外，仲有好多寒冷地區特有嘅冰雪、冬季主題嘅祭典同活動！
| 知名祭典活動 | 舉辦時間 | 特色 |
| 札幌雪祭 | 2月 | 可以喺大通公園欣賞巨大冰雪雕像 |
| YOSAKOI索朗祭 | 6月 | 以北海道民謠為基礎發展出來嘅舞蹈祭 |
| 小樽雪燈之路 | 2月 | 燭光會點亮小樽市內各處街道 |
| 然別湖Kotan | 1～3月 | 喺結冰嘅湖上，可以飲冰咖啡，仲有冰上酒吧、冰上露天浴池同足湯等，仲有以冰磚起嘅建築物群 |
| 洞爺湖長期花火大會 | 4～10月 | 喺呢期間，洞爺湖畔每晚都會施放煙花 |
| 五稜星之夢點燈活動 | 12～2月 | 五棱郭星形城牆嘅護城河，會以繽紛燈飾點綴 |
其中唔少得著名嘅「札幌雪祭」。大通公園入面會有好多冰雪雕像林立，魄力十足又充滿神秘感，令人睇到入迷。
另外仲推薦，只有北海道先體驗到嘅「YOSAKOI索朗祭」，可以近距離欣賞充滿活力嘅舞蹈表演！
北海道嘅夜生活
如果要享受北海道嘅夜生活，可以前往薄野（ススキノ）。北海道道內約有250間酒吧，其中約有90間都集中喺札幌市紅燈區—薄野，呢一區仲有好多CLUB。
北海道晚上安全嗎?
雖然北海道嘅犯罪數量逐漸減少，但外國觀光客比較常遇到嘅搶劫案數量就無乜點變。北海道嘅紅燈區薄野，曾經以良好治安著稱，但近年來犯罪率高於北海道其他地區，因此必須特別小心。
北海道嘅知名手信特產同美食
北海道農業興盛，有好多多農作物特產。喺北海道可以品嚐到各式各樣嘅新鮮蔬菜、水果、海鮮、乳製品嘅農產品。
北海道牛奶
北海道有好多牧場，因此乳製品相當豐富。特別係根室到釧路地區，生鮮牛奶產量係日本第一。其中，四葉牛乳(よつば牛乳)就特別出名。
另外，北海道各地都有好多使用新鮮牛奶製作嘅食品。例如，想食牛奶麵包嘅話，就推薦札幌「MARUMUGI Moon Bakery」(円麦ムーンベーカリー)；牛奶雪糕就推薦旭川機場附近嘅「ICE工房 田村農場 Clover」(アイス工房 田村ファーム Clover)。
另外，芝士製品亦唔好錯過。其中，口碑幾好嘅有札幌「KINOTOYA白石本店 KINOTOYA café」(きのとや白石本店KINOTOYA café)嘅烤芝士撻、富良野「Furano Delice」(フラノデリス)嘅雙層芝士蛋糕等。
北海道海鮮與壽司
北海道四面環海，漁業興盛。有著名嘅海膽、螃蟹等高級食材，仲有烏賊、一夜干等特產。 可以食到好多種海鮮，而且價格實惠，真係好吸引力要食多啲！
如果想品嚐新鮮海鮮製作而成嘅壽司或丼飯，可以前往北海道各個地區嘅市場。其中知名度較高嘅有札幌「二條市場」、「札幌市中央批發市場 場外市場」、函館「函館自由市場」(はこだて自由市場)、小樽「三角市場」同「南樽市場」。
北海道拉麵店
北海道嘅拉麵店依地區唔同會有唔同特色。札幌、函館同旭川嘅拉麵唔同，有北海道三大拉麵之稱。
札幌主要係味噌口味，知名度高嘅拉麵店有「Sumire」(すみれ)。另一方面，函館就係鹽味拉麵，「麵廚房繡球花」(麺厨房あじさい)嘅口碑唔錯。 旭川拉麵主要係醬油味。代表者有創業約75年嘅老店「旭川拉麵青葉」(旭川らうめん青葉)。
北海道任食餐廳
北海道有好多可以任食海鮮嘅餐廳。例如，札幌嘅「難陀」餐廳提供100分鐘任食螃蟹。但係需要預約，所以唔好忘記事先訂位。
小樽嘅「小樽運河食堂」亦提供包含海鮮在內嘅各式料理，共80種食物嘅任食。另外，十勝佐幌度假酒店嘅「北海道BUFFET」除咗海鮮外，其他菜式都非常豐富。價格（任食自助餐）大概係5,000～6,000日圓之間。（截至2020年1月資訊）
北海道哈密瓜
北海道係著名嘅哈密瓜產地。有好多款唔同品牌嘅哈蜜瓜。其中最有名可算係「夕張哈密瓜」。價格較貴但香軟多汁，係日本國內嘅頂級品牌。
另外仲有兼具甜度同香味嘅「雷電哈密瓜」(らいでんメロン)，同埋甜度爆表嘅「富良野哈密瓜」。
又香又甜嘅哈密瓜，既可以直接食用，亦可以用嚟整芭菲、年輪蛋糕、蛋糕等等哈密瓜加工食品。
去北海道旅遊，要點選擇住宿？
北海道約有950間住宿設施，有將近五分之一都位於札幌地區，其次係函館近郊同富良野附近。由於喺唔同區域間嘅移動並唔係咁近，所以先決定好旅行嘅目的地，再搵附近嘅住宿比較好。
北海道嘅酒店
北海道嘅酒店，大致上分為都市入面嘅經濟型酒店，近觀光地嘅度假酒店。不過，觀光地附近亦有一啲平價酒店。
北海道五星級、四星級酒店
北海道內嘅五星級、四星級飯店比較少。但係都有幾間豪華檔次嘅酒店，標準房一晚大約6萬日圓起。（截至2020年1月資訊）
| 酒店名 | 特色 |
| The Vale Niseko | 毗鄰滑雪場，前往滑雪非常方便嘅公寓式酒店 |
| Suiboku Hirafu | 擁有10間簡約洗鍊風格房間嘅公寓式酒店 |
北海道經濟型酒店・膠囊酒店
北海道嘅經濟型旅館同埋膠囊酒店，數量最多係札幌，其次係函館。兩個城市入面嘅經濟型・膠囊酒店都集中喺市中心，交通方便。另外，富良野、新雪谷亦有一啲經濟型住宿。經濟型酒店住一晚約5,000～6,000日圓；而膠囊酒店就大概一晚2,500～3,000日圓。（截至2020年1月資訊）
北海道度假酒店
北海道嘅度假酒店，主要位於KIRORO、新雪谷（NISEKO/二世古）、TOMAMU等度假村滑雪場。寬敞嘅Apartment式酒店，又或者係夏季有好多活動可以體驗嘅酒店等等，即使喺非滑雪季時期去到呢啲住宿，都可以享受好多設施。住宿價位依酒店類型而異。
北海道著名嘅溫泉地同溫泉旅館
北海道嘅溫泉泉質種類相當豐富，每一種溫泉都各有特色。以下表格總括咗北海道嘅主要溫泉區。
| 溫泉地 | 特色 | 推薦住宿 |
| 十勝川溫泉 | 世界上罕見，含植物性有機物質嘅「MORU溫泉」 | 三余庵 |
| 阿寒湖溫泉 | 可以一邊浸溫泉一邊賞湖景 | 阿寒鶴雅別莊鄙之座 |
| 定山溪溫泉 | 位於札幌市內，交通方便 | 翠山亭俱樂部定山溪 |
| 登別溫泉 | 泉質種類多達9種，有「溫泉百貨公司」之稱 | 望樓NOGUCHI登別 |
| 湯之川溫泉 | 距離函館市區好近，交通方便 | 割烹旅館若松 |
北海道交通資訊
北海道的觀光區散布於道內各處，依觀光地的不同，交通方式也不同。以下簡單介紹北海道的交通方式。
搭飛機前往北海道好方便！
前往北海道嘅話，搭飛機好方便。北海道道內共有9個主要機場：新千歲、函館、旭川、稚內、十勝帶廣、丹頂釧路、根室中標津、女滿別、鄂霍次克紋別機場。
新千歲機場係重要嘅交通樞紐，有飛往日本各地主要機場，同北海道道內各地區機場嘅直飛航班。飛往日本國內機場，大約1至2個小時。另外，雖然航班較少，但係新千歲機場都有國際線航班，可以直飛曼谷、台北、香港等地。
由東京前往北海道嘅交通方式
由東京前往北海道嘅交通方式有兩種。首先，搭乘飛機嘅話，由東京羽田機場飛往北海道道內嘅地區機場，大約1小時30分至2個小時。另一方面，如果乘搭JR東北、北海道新幹線嘅話，由JR東京站前往新函館北斗站，車程約4個小時。
由札幌前往北海道道內主要觀光地嘅交通方式
由「北海道玄關」嘅札幌前往道內觀光地嘅交通方式如下。
| 主要站名 | 交通工具及路線 | 所需時間 |
| 小樽 | JR快速 / 北海道中央巴士 | 約35分 / 約1小時10分 |
| 旭川 | JR函館本線特急 / 北海道中央巴士 | 約1小時25分 / 約2小時 |
| 新雪谷 (二世古) | JR快速與函館本線 / 北海道中央巴士 | 約2小時 / 約3小時 |
| 帶廣 | JR千歲線 / 北海道中央巴士 | 約2小時25分 / 約3小時30分 |
| 釧路 | JR千歲線 / 北海道中央巴士 | 約4小時 / 約5小時30分 |
| 函館 | JR千歲線 / 北海道中央巴士 | 約4小時10分 / 約5小時45分 |
北海道道內觀光，使用「JR北海道鐵路周遊券」非常方便！
想要巡遊北海道道內嘅觀光景點，推薦使用JR北海道「北海道鐵路周遊券」。周遊券票種類有分連續3日、5日、7日，又或者隨意4日嘅暢遊券。可以用嚟搭JR北海道道內嘅所有列車（新幹線除外）。「北海道鐵路周遊券」可以喺日本國外嘅指定代理店，或者JR北海道道內主要車站售票處購買。
Comments