歡迎大家收睇恐怖神秘特輯，本系列將會為大家介紹知一連串日本嘅恐怖、神秘或靈異話題。恐怖故事一向令人又愛又恨，就算係驚到用雙手遮住成塊面，都忍唔住想透過手指之間嘅罅隙，去窺探接落嚟嘅劇情！今次，我哋將介紹日本短篇恐怖故事，一啲發生喺日本酒店或日本旅館嘅故事，咪話小編唔提您—住宿嗰陣最好都係唔好亂犯禁忌啦！
日本酒店鬼故之一：來自古老破舊酒店嘅一通電話
呢個係一則短短嘅故事。
故事發生喺五年前，我到名古屋某間酒店出差嘅時候……
當時係我同一班同事一齊出差，其中有一位同事，我哋就稱呼佢為A君啦。
A君佢擁有第六感，
而且仲非常有女人緣！（雖然同呢個故事無關）
我哋喺一間商務酒店住宿，因為價錢便宜，但令人驚訝嘅係呢間酒店非常舊，就係嗰種睇落去已經覺得一定有鬼嘅酒店。
連續出差咗好幾日，就喺我哋結束一日辛勞奮鬥，返到去酒店房間之後…
我打開手提電腦繼續工作，突然我手機響起。
手機來電顯示係Ａ君，
我好清楚見到手機螢幕著咗光，顯示出Ａ君嘅來電號碼。
但係……
我接聽咗電話，從電話另一邊傳來嘅淨係得雜音。
我喂咗半日，對方始終都係無出聲。
我心諗到底搞乜？
當我仔細傾聽電話嗰邊嘅聲音，我似乎仲隱約聽到人嘅呻吟聲。
我聽唔清楚佢講緊啲乜，但喺一陣陣雜音之中，確實有呻吟聲。
於是我最後就掛斷咗電話......
然後我打返俾Ａ君。
Ａ君話佢當時喺外面，
而佢同我講嘅故事版本係咁樣嘅……
佢返到房間嗰陣，發現房間盞燈點開都唔著。
但當佢通知酒店櫃檯職員嗰陣，盞燈又會自己著咗。
當盞燈著咗之後，今次又換到係房門打唔開，佢被困喺房間入面好一陣時間。
佢覺得唔太對路，可能呢間房鬧鬼，令佢覺得好驚好不安。
Ａ君決定出去呼吸一下新鮮空氣…
咁即係話，打電話俾我嘅係……………………鬼！？
就喺呢一刻，我身後傳來陣陣寒意，我心諗，嗰隻鬼唔會就喺我背後吖嘛！？！？！
我好不安咁不斷碎碎唸，「出去啦，你阻住我做嘢呀！」（希望嗰隻鬼聽得明）。
而家諗返去都覺得自己好傻呢。
我再次翻睇手機來電紀錄，發現原本應該存在嘅嗰通來電根本唔存在，即係應該顯示Ａ君嘅來電顯示。
究竟我係咪真係遇到鬼來電？？
直到現時為止，嗰通來電手機螢幕亮起嘅一幕畫面，依然遲遲喺我腦海揮之不去。
故事來源2ch論壇恐怖故事第115則網友xDo09lwb0所述
---------------------------
無來電紀錄，可能係鬼來電，亦或係作者幻想？但鬼點解要用A君名義來電呢？呢一點就無法得知了……
日本酒店鬼故之二：糾結不清嘅頭髮
咁，我哋繼續講故仔啦。
呢個故事發生嘅年代有啲久遠。
大約係喺20年前，我喺到一間位於東京調布嘅酒店。當我浸完浴飲咗幾杯酒，突然尿急去廁所，事情就係咁發生。
就喺我如廁完畢、噤沖水掣嘅嗰一刻，廁所盛燈燈突然自己熄咗，
廁斤變得漆黑一片，於是我就匆匆忙忙跑去開門，點知行咗幾步，我發現自己仲未成功走到門口......
廁所面積並唔大，大概只有1米×2米左右。
個面積絕對唔需要行好幾步就已經足夠走到門口，更何況我已經行咗五步！
我好驚慌咁想快啲衝到門邊。突然之間，身後有舊嘢摸咗我嘅手一下，我完全唔敢回頭，只可以努力快跑。大概過咗10秒鐘之後，我似乎撞到牆壁。原來我跑嘅方向唔係門嗰邊，而係洗手盤呢邊，我撞咗喺洗手盤嘅牆上！
我再往反方向嘅廁所門跑，跑出廁所、衝出房門，終於喺電梯前撞到酒店員工之後，我就暈低咗。（對於呢件事我完全無任何記憶，係事後酒店嘅人同我講返。)
當我恢復知覺後，我見到一位酒店員工好臉色蒼白咁叫我個名。
我嘗試冷靜落嚟，並向佢解釋我啱啱發生嘅狀況，然後我明顯睇到佢臉上表情瞬間變化。
到底發生乜事？大概我真係飲得太醉，所以酒店員工先至會同我再三確認，「小姐，您確定您無睇到任何嘢吖嘛？」
我嘅雙腿已經跑到腿軟顫抖，而酒店員工嘅表情亦透露出事情嘅唔尋常。
突然，我察覺到佢嘅視線落喺我雙手。
我將視線望向自己雙手，嗰一刻我即時被眼前景象嚇親—
我嘅雙手纏繞住糾纏不清嘅頭髮，而長度大概有30cm咁長！
我請酒店員工幫我收拾行李，並即刻辦理退房手續。
我唔想再靠近嗰間房間，亦唔想再停留喺呢間飯店。
我只係想趕快逃離，甚至唔想去追究酒店，呢間酒店房內到底發生過乜事.......
而酒店亦無任何解釋，佢哋甚至無向我追討取消房間嘅費用。
我諗佢哋亦唔願意追究任何細節吧。
可能嗰間房…已經唔係第一次出事…我亦可能唔係第一個受害者。
自從呢件事之後，我每次去廁所嗰陣都會猶豫好唔好閂門。
而從此之後，我就再無去過調布市了。
故事來源2ch論壇恐怖故事第137則網友gfauoNGv0所述
----------------------------------
嗯，當你被困喺一個伸手不見五指嘅廁所入面，跑好耐都掂唔到任何嘢，可能你根本就唔喺廁所入面，又或可能你已嚟到某個空間，某個世界……就好似部分都市傳說中提到異世界嘅入口。昇6於異世界嘅傳說，就等下次我哋再介紹！最後送上一句—願大家出入平安。
以上城市傳聞信不信由您！多謝您睇到最後，我哋下次再見～
Comments