我成日都會去漁村。原因好簡單，就係鍾意漁村嘅氣氛同埋住喺嗰度嘅漁民。
曾經都有人問過我，漁村有地方俾你住咩？有吖，仲幾住得幾開心添! 其實嗰度都有唔少Guest House㗎。
今次我就介紹一下有位識講英文嘅漁民最近開嘅一間Guest House啦。
影得到靚相嘅阿曾浦
因為有啲事去咗一趟伊勢神宮，而阿曾浦就响伊勢神宮附近，揸車過去約1個鐘鬆啲。
揸住車沿途欣賞個好靚嘅海岸，過埋啲彎路就可以見到條漁村喇。
目的地南伊勢町嘅阿曾浦係一個總人口唔過一千人嘅小小漁村。
漫步喺漁村狹小嘅街巷之間，我發現......
呢度有好多古舊嘅民房，而間間都好colourful (色彩繽紛)。
而且，令人印象深刻嘅係由志摩伸延到南伊勢附近漁村嘅屋都多數係用水泥嚟建造。
感覺隨處飄盪異國風情, 但又莫名其妙地有種好熟悉嘅感覺喎。
忍唔住要影低一張又一張咁靚嘅風景照。
一個充滿人情味嘅地方
散完步就去今晚住嘅民宿MARUKINMARU喇。
喺度可以攤喺個吊床度hea吓，又可以去BBQ燒吓嘢食。
唔想咁頹又可以打開部Mac機做吓嘢。啊~ 係喇! 介紹返。呢位男生係出生於神奈川縣, 早稻田大學畢完業之後嚟到南伊勢做漁夫, 而家每日都享受緊漁村生活。做呢個決定全因學生時期突然有一個咁樣嘅疑問。
「超市入面賣緊嘅魚，到底係咩人同點樣去捉嘅呢？」佢本來就對漁業、農業有興趣，於是就嚟到南伊勢實習。「我哋食緊嘅係活生生嘅生物」，呢句係佢喺實習時領悟到嘅一句話。
佢覺得能唔能夠真正瞭解呢一點去生活落去，係好大分別㗎。
喺Guest House可以體驗鹽焗整條鯛魚。
好似好好味咁喎！
我都食咗一啖。嘩! 估唔到原來鯛魚食起嚟居然咁鮮甜多汁！
吖! 係喇! 張相入面嘅女生係由喺三重縣範圍，但隸屬和歌山縣嘅「北山村」過嚟呢度玩㗎。而佢本身都係關東地方搬過嚟住嘅。
而佢本身都係關東地方搬過嚟住嘅。
佢推介咗北山村嘅特產「Jyabara柑橘」嘅果汁俾我飲。
對佢嚟講，呢款果汁就好似就係北山村版嘅寶礦力呢啲運動補充飲品咁。
喺漁夫所經營嘅魚店度仲可以買到南伊勢嘅美味海產添。
然後自己整成剌身食又得, BBQ燒嚟食都得, 得咗!
將漁村嘅樂趣傳到世界各地。
民宿嘅主人橋本純先生係阿曾浦土生土長嘅漁夫。
後生時遊遍世界，最後返到老家。
而家橋本先生都接受咗阿曾浦面臨人口減少嘅事實。
照片出處: MARUKINMARU Facebook
喺呢度開設咗啲大人細路都啱玩嘅嘅漁業體驗活動。
俾人體驗做吓漁夫、學吓點調理魚、將漁獲曬成魚乾、仲可以學整鹽焗鯛魚、喺海邊挖貝類等體驗，無論參加邊項感覺都好好玩。
照片出處: MARUKINMARU Facebook
一傳十, 十傳百。而家海外遊客都逐漸認識呢度而多咗遊客嚟參加體驗活動。
橋本先生：首先係想俾大家知道之後去參加體驗活動，玩得開心就好喇。最後產生興趣嘅話就會繼續再嚟。我諗咁樣就可以令多啲人鍾意阿曾浦。
感覺就好似所謂嘅「地方創生」就係「點樣建立相關人口」嘅範本。
不過, 咁難嘅事就唔好理住喇...
只係好單純咁諗，如果佢哋嚟到呢度玩得開心，仲想再嚟就好喇。
係只有呢度先感受到嘅快樂。
照片出處: MARUKINMARU Facebook
橋本先生：睇到自己養鯛魚喺海度暢泳，就好開心呢。
就算係大人，有時想好似個細路仔無憂無慮咁去盡情玩。
而且，如果大人全程投入咁去玩，話唔定會俾小朋友笑得更開懷添。
漁夫嘅GUEST HOUSE民宿
MARUKINMARU (まるきんまる)
- 三重縣南伊勢町阿曾浦345
- 電話：090-7850-4064（8:00〜21:00）
- 網站：http://marukinmaru.boo.jp
- Facebook：https://www.facebook.com/yuuei.fish/
作者：Yusuke Murayama
- 村山祐介。OTONAMIE代表。OTONA MASTER。
- 雖然佢被人叫做Son San，但其實佢係個純正日本人。職業係平面設計家同作家。興趣係散步同踩單車。以前曾經組過一個無紅過嘅band叫做South★Hill。
- OTONAMIE http://otonamie.jp/
- *此網站附有Google網頁翻譯功能
Comments