您對東京車站前方嘅丸之內地區有咩印象？充滿光鮮亮麗嘅上班族？熙來攘往嘅旅客？定係氣派嘅高樓大廈？其實呢度有好多CP值好高又有文藝氣息嘅隱藏版必去景點！丸之內必玩必去景點，一次過話俾您知！
東京嘅玄關口 擁有百年歷史嘅東京車站
西元1914年啟用嘅東京車站，係明治時代名建築師辰野金吾嘅代表作品之一，每日迎接數以萬計嘅上班族同旅客。紅磚瓦嘅東京車站氣派宏偉，2017年12月完工開放嘅丸之內站前廣場，同埋車站前方嘅行幸通，都係正面拍攝車站嘅絕佳攝影點，每到11・12月左右行幸通兩排嘅銀杏樹就會變成金黃色，令人感到濃濃秋意！
車站本身就係一件藝術品，左右對稱嘅兩大圓頂大有玄機，企喺圓頂正下方抬頭向上望，鵝黃色嘅牆面上有著展開雙翼嘅鷲，同鳳凰、花、劍...等好多精美嘅雕刻，既古典又優雅。最為人所津津樂道嘅係，牆面上仲有十二生肖嘅動物雕刻，仔細一數凈係得八種動物，點解嘅？原來佐賀出身嘅辰野金吾好蠱惑咁將其中嘅鼠、兔、馬、雞四種動物，放喺九州佐賀武雄溫泉嘅地標「武雄樓門」上面吖！
從郵局大樓變身為購物商場嘅KITTE
由丸之內南口徒步10秒嘅白色建築物KITTE，可以買到充滿個性嘅嚴選伴手禮同雜貨，仲有來自日本各地嘅餐廳、下午茶名店，都係丸之內行街購物、食美食嘅好地點。2、3樓嘅博物館INTERMEDIATHEQUE、4樓嘅舊郵政局長室、6樓嘅屋上庭園均可以免費參觀，行街之餘仲可以隨時補充大家嘅文藝氣息同小知識，屋上庭園更加係距離東京車站圓頂最近嘅拍攝點！
隱身喺丸之內大樓、新丸之內大樓嘅絕佳攝影點
丸之內兩大雙塔地標：丸之內大樓5樓、新丸之內大樓7樓嘅展望台係絕佳嘅拍攝點，其中新丸之內大樓可以影到東京車站、丸之內站前廣場同KITTE同框嘅景色，偷偷哋話您知啦，呢度仲係知名日劇《半澤直樹》最後結尾嘅拍攝地㖭啊！記得喺丸之內安排返一整日嘅行程，影完日景之後到周邊區域吃吃喝喝逛逛，夜晚再返嚟影夜景，反正都係免費開放，想嚟幾多次都得，完整收藏東京車站各種迷人嘅姿態。
喺丸之內仲通散步 欣賞世界級嘅藝術作品
丸之內大樓、新丸之內大樓後方嘅丸之內仲通，連接咗大手町同有樂町，聚集咗日本海內外高質感嘅購物品牌同餐廳。街道兩旁有一整排嘅綠樹同長椅，不時會睇到坐喺長椅上食午餐嘅上班族，偷得浮生半日閑來散步嘅老夫婦，或者係推著嬰兒車嚟親近大自然嘅日本媽媽。喺餐車買杯咖啡觀察丸之內嘅日常風景感覺十分愜意。
不過，記得張開您嘅眼睛，因為日本知名雕刻家草間彌生、三澤厚彥嘅作品就喺您身邊，展覽內容會不定期更換，宛如一座戶外嘅雕刻美術館。丸之內仲通聖誕燈飾係每年嘅重頭戲，行道樹裝飾咗數十萬顆燈泡，各式各樣嘅餐車提供熱食同美酒，成條丸之內仲通被點綴得非常燦爛，充滿喜氣洋洋嘅氣息。
都會叢林中嘅綠洲 丸之內BRICK SQUARE
丸之內BRICK SQUARE嘅核心概念為丸之內最舒適嘅地方，呢句百分之百所言不假，因為有世界知名嘅美食、香氛同都會綠洲療癒您嘅身心靈。世紀名廚侯布雄嘅甜點麵包店La Boutique de Joël Robuchon、西班牙皇室御用朱古力專賣店Cacao Sampaka、法國奶油品牌喺東京首家甜品烘焙店Échiré Maison du Beurre，仲有各式各樣嘅排隊名店林立，不僅如此，全世界熱賣嘅英國香水品牌Jo Malone都有據點。最令人驚訝嘅係，喺呢個都會叢林中有個綠洲般嘅小公園，食飽飽喺呢度攤抖吓，人生至此、夫復何求。
明治時代半澤直樹嘅辦公室 三菱一號館美術館
三菱一號館（而家嘅三菱一號館美術館）係英國名建築師康德嘅知名作品之一，原建築物建於1894年，因為受到戰爭天災毀損不敷使用而拆除，好彩後來依據設計原圖復原重建。三菱一號館係當時丸之內第一棟洋風辦公室建築，可以免費參觀嘅歷史資料室內展示咗當時辦公室嘅擺設、銀行員嘅穿著打扮同建築模型。三菱一號館美術館以19世紀後期至20世紀前期嘅近代美術為主題，每年開設三次唔同嘅企劃展，雖然唔係免費景點，同樣值得您去睇睇。同建築嘅咖啡館Café 1894同販售獨家紀念品嘅Store 1894亦不容錯過。洋溢著英倫復古風嘅紅色磚瓦建築，無疑係丸之內最美麗醒目嘅存在。
★☆丸之內吃喝玩樂一網打盡通通都喺「丸之內.COM」☆★
東京車站前方嘅丸之內，竟然有咁多免費又好玩嘅地方，十分富有文藝氣息，非常值得您用一整日細細品味。快D留言話俾我哋知您最鐘意邊D丸之內嘅景點啦！
Comments