京都係一個好有歷史氣息嘅城市，而且四季分明、每一個季節都有唔同嘅靚景可以欣賞到。而數到京都最最最出名嘅秋天行程，就必定係去神社或者寺廟睇紅葉喇！滿山漸變紅色嘅紅葉，又或日式庭園映照秋楓落池塘水面嘅醉人畫面，實在係不容錯過！
染上一片紅色嘅京都紅葉
秋天時喺京都嘅神社同寺廟都好容易搵到紅葉嘅倩影。呢個時期通常都會吸引咗好多遊客嚟一睹又橙又紅嘅紅葉風采。賞楓時期因地區而有所不同，通常京都嘅觀賞時期都係11月頭至11月底。但氣溫或者環境嘅變化都會好大幅度影響楓葉嘅顏色同賞楓時間。不過就算你咁唔好彩錯過咗滿開時期，紅葉飄落嚟好似一塊地毯咁鋪滿成條路都係一個靚景嚟㗎！
永觀堂禪林寺夢幻夜楓點燈
好多寺廟同神社都會喺秋天舉辦夜間秋楓點燈活動，而其中一個出名地點就有永觀堂禪林寺，每年都會吸引好多遊客專程過去賞楓！喺呢個時期，會有大約3千棵樹染上紅色，呈現一個漸變紅色美景；而每年11月，你更可以趁夜晚欣賞到永觀堂向公眾展示嘅歷史文化珍品。一邊置身於點燈秋楓下，一邊漫步閒逛，場景真係十分浪漫呢！
景點資訊
- 景點名稱: 永觀堂 (禪林寺)
- 地址: 京都府京都市左京區永觀堂町48
- 交通方法:
- 從東西線「蹴上」站行15分鐘
- 乘搭5號市營巴士, 於「南禪寺永觀堂道」站落車後徒步3分鐘
於秋祭觀賞紅葉
要更加享受紅葉時期，就梗係唔能夠錯過唔同地方舉辦嘅活動啦！深入地道祭典，係另一體驗京都文化嘅不二途徑。
嵐山紅葉祭
嵐山地區最出名莫過於渡月橋，但其實附近都有好多寺廟同神社都會開滿無數紅葉，可以滿足你賞楓嘅願望！嵐山紅葉祭舉行期間，你可以一邊欣賞紅葉、一邊參觀「狂言」（日式喜劇）同「日本舞」（日式傳統舞蹈），如果你有時間嘅話，呢個係一個大好機會畀你去親身體驗日式傳統活動！同場仲有喺河流行駛嘅船上表演，通常朝早都會比較少人，而夜晚就預計係比較人多擠迫，所以如果你可以早啲去霸返個靚位，咁就可以輕鬆咁睇表演啦～
景點資訊
- 景點名稱: 嵐山
- 交通方法: 從JR嵯峨嵐山站行15分鐘
時代祭
「三大京都祭」之一嘅時代祭係一個歷史悠久嘅祭典，期間會有大約2千人著住著名古代裝束、並騎住馬車同牛車圍住京都巡遊。難怪時代祭巡遊喺外國遊客之間都非常出名，實在係秋天京都頭號必睇！
景點資訊
- 景點名稱: 時代祭
- 巡遊路線: 從京都御所到平安神宮
- 巡遊日期: 10月22日
賞楓最佳時機係幾時…？
每年接近紅葉季節時，京都都會變得人山人海，所以建議揀平日日子，避開周末或者11月日本連假（呢啲日子都係唔講得笑地迫到痴線）！
而最輕鬆嘅欣賞紅葉嘅時間，就係朝早同埋紅葉季尾聲。如果你想避開京都車站交通繁忙時間，咁就記得唔好賴床、早啲起身出門喇～
通常喺天氣唔好，例如係預計會落毛毛雨嘅日子，去觀光嘅人數都會少啲，所以不妨出發之前check吓天氣報告會比較安心。喺京都最輕易嘅交通手法就係搭電車或者行路。巴士因為會遇上塞車，所以時間表成日都會同實際有啲出入；相反電車因為無論發生咩事都會好準時跟足時間表，所以會比巴士方便快捷。
Comments