曾被稱為日本荷里活，東映太秦映畫村係一個電影主題樂園，同時都係日本電影日劇嘅拍攝場地，位於京都嘅太秦一帶。目前仍有好多電影會喺呢度拍攝，以江戶時期背景為特色，打造出武士、忍者、藝妓所生活嘅世界。場地開放俾遊客參觀，仲可以打扮成時代劇裝扮，融入成個景色之中，就好似乘搭咗時光機穿越時空來到古色古香嘅日本。
東映太秦映畫村
如果話迪士尼樂園係迪士尼夢幻世界嘅主題樂園，咁東映太秦映畫村就係京都嘅電影主題樂園，映畫村亦稱為電影村，打造出日本武士世界，現今都使用緊嘅電影造景，好多日本電影都喺呢座映畫村嘅各處拍攝，重現江戶同明治時期嘅景色。
京都太秦一帶曾經設立多間電影製片公司，隨著時間推移，製片公司所製造嘅電影產量不如當年極盛時期，而身為日本電影產業嘅巨頭之一，東映電影公司決定將呢啲電影場景打造成一個主題樂園，為求保留日本電影產業嘅傳統。
東映太秦映畫村儼然就係日本電影嘅博物館，入面介紹咗好多日本電影相關嘅知識，展現京都電影產業嘅歷史，電影嘅拍攝手法同技巧，以及好多動作武術指導同特效等等。
東映電影公司製作咗好好多經典作品，無論古代或現代電影都非常受歡迎，仲有製作好多特攝片，如幪面超人，以及多部動畫電影。
東映太秦映畫村電影造景
隸屬於日本最大嘅電影攝影所，東映京都攝影所，係唯一一間同電影相關嘅主題樂園，嚟到呢度你可以自由漫步喺各個電影場景之間。而工作人員都會穿著歷史服裝，更加增添日本傳統嘅氛圍。
如果想更加融入太秦映畫村之中，亦可以變裝。打扮成武士、忍者、或藝妓，影相留念。另外有好多比較特別嘅服飾可以租用，穿著呢啲特定年代嘅服飾漫步喺園區之中，想像自己就生活喺從前嘅日本，絕對會係一種有趣嘅經驗，不妨同屋企人朋友一齊穿越時空探索江戶日本啦。
如果幸運嘅話，話唔定會撞上電影拍攝，可以睇到螢幕裡入面嘅演員活生生喺你面前演出。園區成年都會有電影日劇拍攝，話唔定你就係咁幸運，咁啱撞到小栗旬喺度拍攝電影㖭吖！
講到小栗旬，鐘意佢嘅粉絲，或者係鐘意銀魂嘅粉絲更加唔可以錯過東映太秦映畫村，銀魂拍攝場景就喺呢度!！
東映太秦映畫村適合大家同樂
如果歷史電影唔啱你心水都唔洗擔心。東映太秦映畫村仲有恐怖鬼屋、機關忍者屋、太秦幻視藝術館等等各種各樣遊樂設施，等住大家嚟玩，適合各種年齡層同樂。
鐘意幪面超人或超級戰隊系列？咁就唔好猶疑，一定要嚟東映太秦映畫村，入面仲有英雄樂園等住大家嚟，一齊擊退壞人。
玩到又攰又餓都唔使擔心。園內設有餐廳同商店，俾遊客開心玩之餘，仲可以食得開心、買得開心。
營業時間：09:00-17:00（依月份不同，營業時間有所調整）
相關資訊
- 名稱：東映太秦映畫村
- 地址：京都市右京區太秦東蜂岡町10
- 交通方式：
- 從JR京都站乘搭市營巴士75號往太秦映畫村道
- 從JR京都站乘搭嵯峨野線至太秦站，徒步約15分鐘
- 從四條大宮站乘搭嵐電嵐山線至太秦廣隆寺站，徒步約7分鐘
Comments