可以享受駕駛樂趣作為最大目標嘅汽車，就係跑車。日本都有幾款跑車，但可以講得上係日本跑車嘅就係車身輕嘅小型跑車。而當中，Subaru同TOYOTA共同策劃所誕生嘅Subaru「BRZ」同TOYOTA「86」兩款車型。佢哋嘅重量都非常之輕，約1200公斤多，再配最大輸出207匹馬力嘅排氣量2公升水平對臥4缸自動進氣引擎，係一款能夠全力奔馳享受揸車快感嘅車型。
喺2012年首次發售，都已經過咗六個年頭嚕，但每年車款都會新增唔少改良，現今呢款跑車嘅魅力比起當時都大咗好多。今次，我哋就喺日本街道上，試揸咗呢款企喺頂端嘅Subaru「BRZ STI」。
Subaru Technica International （STI）性能調校
喺「BRZ」呢個名後面加嘅「STI」，就係Subaru Technica International嘅簡稱。呢個STI，實際上喺1990年代創下世界拉力錦標賽（World Rally Championship，WRC）連續3年蟬聯車廠總冠軍嘅霸業，係世界上數一數二嘅賽車廠嚟㗎。但現時Subaru唔再參加WRC比賽，而繼續針對各種賽事設計去製作汽車，例如針對德國嘅紐堡林24小時耐力賽(Nurburgring 24 hours)等比賽。
「BRZ STI」係由呢啲STI工程師反覆測試而製造出嚟嘅跑車。汽車價位設定喺3百多萬日圓以下，咁究竟可以帶到幾多強勁性能同樂趣俾我哋呢？
撻著引擎就去開始呢段試揸嘅旅程喇。懸吊系統注重極限行走時嘅性能，所以行緊果時都好穩坐得好舒服。而懸吊系統最重要零件嘅避震器，同一般等級嘅避震器相比，製作得好精密細緻。而去承受車身重量所使用嘅樹脂嘅彈性都睇得出下咗唔少功夫。堅固得嚟又順暢，行緊果時都唔會影響到坐喺入面嘅舒適度。
BRZ STI喺彎路都能夠自由自在咁行駛
入咗好多彎道嘅高原山路時，BRZ STI突然龍精虎猛咁行得好暢快。而試駕呢日，大半日幾乎都落雨，到後面先開始好天。而BRZ STI就算喺濕滑嘅路面上都可以行得咁快、咁舒服、而且仲安全添。
同一般BRZ車款最大嘅分別就係，懸吊調校係好著重前輪嘅抓地力。一般BRZ轉彎時，隨著速度越高，由前輪分散到外側嘅力量就會越大，咁樣就會降低安定性。
但係，BRZ STI轉彎時，前輪嘅抓地力強，就算係好高速嘅情況下，都只係邊剎車，邊扭軚盤，車頭就會向彎道內側好順暢咁轉彎。唔單單只係乾燥嘅路面，就算落雨濕淋淋嘅路面都可以保持到咁高水準。就因為佢前輪抓地力係咁強，喺好險峻嘅山路兜風都能夠自由自在咁操控部車啦。
剎車系統係義大利名品牌Brembo所製。對於1千2百多公斤重嘅汽車嚟講，呢個剎車系統嘅性能已經夠唒，甚至超出需求添喇。就算俾你10次緊急剎車，剎車系統都唔會因為過熱造成剎車力道減弱嘅跡象。
BRZ STI 就係一款俾你可以享受暢快奔馳樂趣嘅車。佢咁卓越嘅性能，都唔係淨係盲目咁改良汽車就可以造到出嚟。而係活用咗STI工程師多年嚟製造汽車累積返嚟嘅經驗而得出嘅精品嚟㗎。
Comments