世界上全年銷售量最多嘅汽車係邊部？答案係TOYOTA嘅「Corolla」汽車。2018年6月，TOYOTA喺日本發表咗Corolla最新款「Corolla Sport」。2015年喺TOYOTA嘅油電混合車「Prius」上首次採用嘅新一代汽車架構「TNGA」再進化而製造出嚟嘅全球款車型。呢款車型嘅目標係為求戰勝福士（volkswagen）嘅「Golf」等歐洲強敵嘅車款。
我哋就喺日本試吓揸呢部脫胎換骨嘅全新Corolla Sport先。
優越嘅舒適度，而且安靜無聲嘅油電混合動力
Corolla Sport提供兩種動力選擇，分別係最高輸出122匹馬力嘅Hybrid（油電混合動力）同最高輸出116匹馬力嘅1.2升渦輪引擎。一開始我哋所坐嘅就係Hybrid車款。
坐喺已預先開咗暖氣嘅試坐車輛，啟動系統開關。由於係油電混合動力車，引擎唔會啟動。一踩油，就會聽到極細聲嘅電動摩打聲，接近無聲咁開始運行。
令人驚訝嘅係車軚行駛時嘅聲音都係極細聲，完全唔輸俾動力傳動系統嘅細聲，兩個根本好似喺度比緊邊個細聲啲咁。唔單單係滑潺潺嘅路上，就連鋪滿石仔嘅路，車軚嘅噪音都低到好似高級車咁寧靜。
一開到去啲寬敞嘅路度，就即刻試吓全力加速。到目前為止都係單靠電動摩打運行，喺呢度首次啟動咗引擎。TOYOTA嘅油電混合動力系統能夠自由自在咁將引擎動力切換喺電力同直接驅動兩者之間。而單靠引擎行駛嘅車就唔同喇，踩油果刻，就可以去到最高輸出馬力。車速一下子就加速到高速。
1.2升嘅渦輪引擎行駛順暢，就好似賽車咁兜風
再嚟就係1.2升嘅渦輪引擎車款。呢部配備咗等紅綠燈時會自動熄引擎嘅START/STOP自動熄火系統。但部車本身嘅動力其實係啲極為普通嘅類型，所以佢嘅動力比起Hybrid版本就差少少咁囉。
但係呢，呢部1.2升渦輪引擎車款又表現得比預期好喎。喺引擎低速轉嘅狀態下，渦輪增壓運作夠唒力，加速時順暢又強而有力。
變速系統雖然係CVT，但喺高馬力時扭力轉換器式嘅有段自動變速箱會改變個變速比。令到佢行駛嗰時好有賽車嘅感覺。
我哋試咗喺山路之間揸呢部車。懸吊系統唔會太硬，坐落嘅舒適度都同Hybrid版一樣咁舒服。喺山路間行駛會比想像中柔軟順暢，簡直覺得自己好似「頭文字D」啲賽車手咁。前軚抓地力強，過啲半徑咁細嘅彎都淨係靠軚盤就夠唒力，係預期中咁順暢轉彎。
擁有Hybrid（油電混合）同Turbo（渦輪）兩種動力傳動系統嘅新款Corolla Sport，名符其實咁好似運動車款咁行駛。雖然先前提到嘅福士Golf為首嘅歐洲車廠係強敵，但係相比之下一啲都唔輸蝕。呢款Corolla Sport唔單止喺歐洲同日本發售，亦預定喺世界各地都會發售。如果呢款Corolla Sport喺香港發售嘅話，就一定要去試坐吓啦！
Comments