仁和寺位於京都西北部，隣近龍安寺同舉世聞名嘅金閣寺。 仁和寺同皇室家族好有關係，係真言宗御室派嘅總本山，而且每年四季都可以欣賞到又靚又獨特嘅風景。
有關仁和寺
仁和寺於仁和4年（888年）被創建，係真言宗御室派嘅總本山，擁有作為培育住持嘅長久歷史。仁和寺被日本列為古都京都的文化財，亦被聯合國科教文組織列為世界遺產。喺日式庭園，你可以欣賞美麗景色，例如仁和寺著名嘅五重塔。而寺廟後面更係御室八十八所靈場嘅其中一個行山經，不過唔需要太擔心，呢條行山徑相對地較短，用兩個鐘就應該可以完成。
四葉草
如果係漫畫《我的初戀情人（僕の初戀をキミに捧ぐ）》嘅粉絲，咁應該會認得仁和寺喇！因為喺故事情節中都出現過幾次。
喺仁和寺，你可以買到兩款四葉草嘅裝飾品，其中一款係求愛情運，另一款係求開心快樂。呢個裝飾品被認為真係有四葉草在內，如果你買咗都希望佢能夠發揮力量，令你得到好運啦！
歷史
仁和寺係於平安時代，光孝天皇下令所開始興建，但一直至888年宇多天皇嘅年代下才建造完成，並被命名為仁和。當天皇退位時，仁和寺就變為首個「門跡」直至江戶時代，即所有住持都係由皇族貴族擔任。
1467年，仁和寺於應仁之亂中被摧毀。而喺接近100年後嘅1634年，喺幕府將軍德川家光嘅資助下，呢座寺廟得以重建恢復原貌。時至今日，當中仍然有好多建築物係從17世紀就保留至今，仁和寺亦成為其中一個喺1994年被聯合國科教文組織列為世界遺產。
仁和寺一年四季各種迷人景色
春季櫻花
如果你想睇令人嘆為觀止嘅日本櫻花，咁春天去拜訪仁和寺就係最佳時機喇。寺內唔止有好多吉野櫻花樹同垂柳櫻樹，仁和寺亦以其獨有嘅櫻花樹而聞名。而呢個就係「御室櫻」，係比較遲開花嘅櫻花品種。如果你大約4月中至底去遊京都，咁你可能都仲有機會可以喺仁和寺賞到櫻花呢！
秋天楓紅
秋天係其中一個遊仁和寺嘅好季節。呢個時期進入寺廟就可以睇到又紅又黃又橙嘅楓葉。影相時將紅葉同五重塔影埋一齊就最完美喇！
冬天景色
而喺冬天去仁和寺都係一個非常獨特嘅體驗。如果京都落一場有返咁上下份量嘅雪，咁去到仁和寺見到一地白雪，再加上寺廟建築物，呢個景色都好令人難忘㗎！
仁和寺住宿體驗
信不信由你！其實仁和寺係有客房可以俾人留宿，而且呢個體驗係任何人都可以一試。不過當然係需要事先預約先啦，有興趣可以去仁和寺官方網頁辦理預約手續。
仁和寺嘅「御室會館」總共有12間和室可供預約留宿。建議同朋友或屋企人一齊去，因為單人房只有一間。而住宿價錢方面，一晚附兩餐（晚餐及早餐）為每位大人11,000円、小童（小學生）8,900円；一晚附一餐的話每位大人7,200円、小童6,600円；只住一晚唔附餐就係大人6,200円、小童5,600円。
從16:00開始可以辦理入住手續，23:00會有門禁。晚餐由18:30開始可以享用，第二日嘅早餐於07:30開始提供。而退房手續請喺09:00前辦理。請注意付款只可以使用現金，同埋需要同其他住客共用廁所同浴場，如果介意者就請考慮清楚先喇。
景點資訊
- 名稱：世界遺産 真言宗御室派總本山 仁和寺
- 地址：〒616-8092京都府京都市右京區御室大内33
- 交通方法：嵐電北野線 御室仁和寺站落車徒步2分鐘
Comments