好喇! 我哋又繼續返阿菊嘅皿屋敷故事先。上次講到阿菊被男主人--主膳奪走芳心之外, 阿菊仲受到所有人冷淡對待。而佢被挖空嘅心就更加為佢帶來不幸......
唔知講緊乜? 未睇故事上篇? 即該俾你Click去重溫 驚悚 & 奇異系列: 阿菊的故事, 皿屋敷 上篇。
播州皿屋敷版本: 嫉妒, 殘酷與復仇嘅故事 (續)
匿埋喊完一場之後, 阿菊就認命去清潔一隻又一隻嘅珍寶南京碟。但係阿菊腦海始終揮之不去嗰晚主膳緊緊攬住佢嘅一幕。就喺佢心不在焉嘅嗰一刻, 突然有隻大貓偷入咗去, 仲想偷走碟上條魚, 所以跳到碟上。阿菊見到之後驚慌失措, 本想趕走隻貓但唔小心將手上拎住嘅碟跳咗落地......
啪一聲......
阿菊好驚, 塊臉瞬間嚇得蒼白。更不幸嘅係, 被阿菊最唔想被佢見到嘅人見到呢一幕......
「阿菊...你睇你做咩好事! 你呢個笨蛋!」
砰一聲
「呀!!!!」
主膳正如佢之前所講一樣, 而家暴打緊阿菊。
「主膳主人, 我求你! 我求你放過我吖!」
企喺主膳隨離嘅夫人冷眼望住阿菊:
「佢竟然闖咁大禍呀! 用你條命嚟賠都唔夠呀! 我諗你應該要自己切腹自盡道歉!」
「我唔理之後係點! 呢一刻我淨係知我唔可以放過呢個女人! 我都同你講咗呢啲碟有幾重要㗎啦! 你仲敢整爛佢?!」
主膳一拳又一拳咁不停打阿菊
「求下你....放過我....我知係我錯....對唔住呀....」
阿菊喺主膳拳腳揮舞之下, 好唔容易先講出一句求情說話。
「你真係好可惡呀!」主膳怒氣難忍, 拔出佩劍, 揮向阿菊......阿菊極力閃避, 嘗試用雙手去保護自己塊臉。
一斬
「呀~~~~!!!!!」
尖銳嘅刀鋒從阿菊嘅右手腕劃過，斬甩咗阿菊嘅中指......
「滾! 我唔想再見到你呀!」
「呀哈哈哈, 呀哈哈哈哈哈」夫人好陰毒咁大聲笑。
事發突然, 阿菊跌落深淵, 佢好悲傷, 好孤獨, 好疼痛, 好驚慌。佢覺得啱啱發生嘅一切都好難以置信。
主膳走咗之後, 阿菊根本無心處理傷勢, 用血淋淋嘅手去執拾地上一塊又一塊嘅碎片。其他婢女都完全無打算伸出援手, 無論係事發時定係事發後都只係冷眼旁觀, 有人甚至冷言冷語......
「真係大快人心呀! 咁就啱喇。就咁落地獄把啦!」
阿菊開始數剩餘嘅碟, 用佢嗰隻無咗中指嘅手......
「1隻....2隻....3隻....4隻....5隻......」
咁就係, 一晚過去了。
「噢, 真係慘喇。佢痴咗線呀!」
但係阿菊就不斷數不斷數, 血流不止...... 而啲碟都染滿咗佢嘅鮮血......
「6隻....7隻....8隻....9隻.... 啊! 主人! 呢度少咗1隻呀! 主膳主人!」
「我唔要好似佢咁呀! 阿梅已經夠慘啦。而連阿菊都變成咁! 我唔想再留喺度喇!」
就係咁, 有一晚有個婢女打包袱偷走。但同時, 無人發現嘅係, 阿菊都無再出現喺平時會出現嘅地方, 就咁人間蒸發咗......
(潑水聲)
個井傳出啲聲......
「咩聲嚟㗎?」
主膳被聲音嘈醒, 起身行埋去個井度, 突然有個蒼白嘅藍色身影飄出。
「你....你......」
主膳返房拎埋把劍去返個井度, 但個藍色身影已經消失咗。
「我頭先明明見到......夫人! 你喺邊呀?」
「我喺呢度呀, 主人!」
「你可唔可以去睇吓阿菊而家喺邊呀?」
夫人吩咐工人同婢女都去搵阿菊嘅跡影, 但無論佢哋點搵, 都係搵佢唔到......
「我哋搵過成間大屋嘅每個角落但都係搵唔到佢呀。」
聽到咁樣, 主膳覺得阿菊已經離開咗大屋, 所以鬆返口氣。
但係奇怪嘅事無停止發生......
自從阿菊失蹤後, 每一晚都聽到個井口度傳出一把女人聲。
「1隻....2隻....3隻....4隻....」
「呀! 我又聽到怪聲喇! 有妖怪呀! 救我呀!」
「主人! 你做咩呀?」
「個井呀! 你快啲去睇吓個井! 好似有人喺嗰度呀!」
「....5隻....」
「呀!!!!!!!!!」
「....6隻....7隻....8隻....9隻....」
「嘩!!!!呀!!!!!」
「主人, 呢度無人喎!」
「無理由㗎! 一家有人喺嗰度! 你聽唔聽到呀? 把聲係咪...係咪阿菊呀?! 係阿菊嚟㗎!」
主膳再去望吓個井, 點知真係俾佢見到阿菊喺嗰度! 阿菊塊臉好蒼白, 嘴角仲滴緊鮮血, 而右手更係血淋淋一片。仲有佢對眼, 用冷冰冰嘅眼神及充滿仇恨咁望住主膳......
「呢度少咗隻碟呀....主人....主....人.... 主人!!!!!!!!」
「嘩呀!!!!好恐怖呀!! 係妖怪呀!!!」
「主人, 發生咩事呀?!」夫人問。
主膳拔出佢把劍, 「你個該死嘅妖怪!」
手一揮
「嘩! 好危險呀!」
不斷揮動手上嘅劍
「主人, 冷靜啲啦!」
「呀!! 你個恐怖嘅女人!」
「好....好危....好危險呀!」
「主....主人.....主膳.....」
「睇你仲敢唔敢!!!!」
主膳繼續揮動佢把劍。企圖殺死眼前嘅幽靈。
但最佢斬到嘅, 唔係阿菊......係夫人。
「呀!!!!!」
「夫....夫人? 夫人!!!!」
「主人.....我....死不暝目呀.....!」
夫人帶住對主膳嘅仇恨同怒火喺主膳懷中死去。主膳之後又喺夫人身上拔出長劍, 又繼續亂揮把劍。啲工人同婢女見到咁都好驚, 個個都執好唒包袱趕快逃走。除咗一個, 阿稻, 呢個時候走去主膳同佢講:
「主膳主人, 阿菊已經唔再喺呢個世界, 夫人又走埋。但係阿稻喺度呀, 我可以喺你身邊陪住你㗎, 主人。」
阿稻慢慢接近主膳, 出現喺主膳視線範圍內......
「啊! 主人! 主人呀! 我真係好愛你㗎! 主膳主人!」
但當主膳再睇清楚, 就發現佢右手血淋淋, 仲無咗隻中指......當佢再向上望, 發現嗰個唔係阿稻, 係口吐鮮血嘅阿菊呀!
「唔好呀! 呀! 走開呀!」
「主人....我....好....愛你㗎! 主膳主人....」
「停手呀! 走開呀! 走開呀!!!!」
「主人....點算呀.....呢度少咗1隻碟呀! 主膳主人....」
「你你你! 阿菊! 你隻妖怪! 快啲走開呀!」
唰!
「主人! 我恨你! 我恨死你!!!!」
「嘩! 呀!!! 阿菊....原諒我! 求吓你原諒我啦! 係我錯! 唔係你錯! 係我! 係我呀 哈! ..... 哈哈哈! 呀哈哈哈!」
主膳突然乖乖就範仲開始瘋狂大笑。唔知咁做對佢有無幫助, 但係呢個時候酒井藩主行過青山主膳個大宅, 仲入咗入去見到呢一幕:
「正常嚟講, 要執正嚟做就要捉呢個男人去認罪受刑罰。但太益咗佢喇。應該要俾佢繼續生活落去, 唔應該咁快結束佢嘅痛苦! 佢受嘅折磨都係抵佢嘅! 等佢好好承擔返自己犯過嘅錯啦。」
講完之後酒井藩主行去個井度望落去。見到嘅, 係阿菊, 阿菊都回望佢, 仲輕輕地鞠咗個躬。
結事結尾
根據酒井藩主嘅手下旗本先生所說, 青山主膳已被除去所有職務, 仲被軟禁喺親戚家中。而青山一旅原本同上流社會有好長期嘅良好關係都已經中斷晒。最後酒井藩主去搵咗個和尚:
「我想請你幫我一個忙。」
「係咩事?」
「你可唔可以幫我去青山主膳個大宅走一趟? 你去到就會明發生咩事, 亦會知點樣做先好。」
和尚就即刻去咗青山大宅。和尚喺一個佈滿蟲蛹同枯葉嘅花園當中, 搵到2具女人屍體。仲聽到一把淒楚嘅聲音喺井中傳出。
「呢個係......」
和尚將2具屍體放好, 再誦經超渡佢哋。然後阿菊就從井中出現, 用一把淒厲悲傷嘅聲音講:
「鳴~ 1隻....2隻....3隻....4隻....」
阿菊嘴角滲出血水, 面靈痛苦, 一邊望住和尚, 一邊數碟......每次佢一數到第9隻, 佢都會話少咗1隻, 跟住就會傷心流淚, 之後又再重覆咁數碟。見到佢咁, 和尚去搵返隻爛碟出嚟拼返好之後放落個井度, 然後開口誦經。
「阿菊小姐, 第10隻碟喺呢度呀, 請你安息啦。」
佢講完之後, 阿菊欣慰咁微笑:
「噢....太好喇! 」
跟住, 佢個靈魂就逐漸消失。 突然, 一股香味包圍花園，無數嘅蟲蛹破繭成蝶，化作一隻又一隻嘅黑色蝴蝶飛走了。
講到呢度, 阿菊皿屋敷故事都差唔多完喇。
而最後為咗安撫其他被殺嘅亡靈, 和尚喺嗰度起咗間神社, 負責超渡呢班枉死嘅亡靈......
完。
Comments