玩轉北海道嘅嶄新方法，SO CRAZY

※更新※ 而家大阪、北海道JEP價格只需5,400円就買得到啦。活動期間：2018/10/1～12/15

一年四季嘅氣候都偏熱嘅香港，要睇到雪白世界嘅景色，的確唔太容易，對於白茫茫嘅世界更加係有一種莫名嘅憧憬，喺訪日旅行入面，北海道一直係觀光客嘅熱門景點之一，當然唔係凈係冬天，一年四季嘅北海道都散發出與日本其他地區唔同嘅風情，如果您已經到訪過北海道，而又俾佢獨特嘅怡人氛圍所吸引，咁呢篇報導，可能就會令您中毒更深，請慎閱！

北海道第一站：回味札幌

札幌係好多旅客到訪北海道嘅第一首選，不但市內地鐵、巴士等交通工具都好方便，對於日本旅遊初級者嚟講都非常容易掌握，札幌新千歲機場嘅國際航班有很多，北海道嘅周遊行程就以札幌為進出窗口啦！講到札幌嘅觀光景點都好豐富，充滿文藝風情嘅「北海道舊廳舍」磚紅色嘅建築、喺賞櫻期間更係熱門，定期舉辦活動祭典嘅市內都會型「大通公園」、札幌嘅地標建築「札幌電視塔」「時計台」，迷人嘅小樽市都係觀光客一定要朝聖嘅地點之一，當然仲包括遠近馳名嘅「白色戀人公園」啦！到咗日本點可以唔享受買嘢嘅樂趣呢！狸小路商店街當然都唔可以錯過！離開札幌之前，唔好唔記得品嚐著名嘅湯咖哩啊！

北海道第二站：乘搭JEP飛往女滿別！

今次要將北海道一次過玩得過癮而最重要嘅小幫手就係 JAL Japan Explorer Pass（JEP），針對訪日外國人先至可以購買嘅日本國內旅遊優惠票價，令好多原本只係理想化嘅旅程，而家都可以實現。由札幌出發到女滿別機場凈係需要45分鐘，單程5400日圓就可以成行，就嚟睇吓女滿別有D咩景點等緊您去征服㗎啦！女滿別位於北海道嘅東部，喺2006年嗰陣，女滿別町同東藻琴村合併之後統稱大空町，呢度有幾個必訪景點，記得排喺您嘅行程入面啦！如果係喺1月到3月可以觀賞到難得一見嘅流冰奇景，可以乘搭觀光船欣賞，幸運嘅話仲可以遇到海豹同您揮手啊！嚟到呢度可以順便參觀「鄂霍次克流冰館」，做吓實驗將毛巾喺空中甩個20秒有D咩會發生呢？「網走監獄博物館」都係一個好有趣嘅景點之一，呢度被登錄為日本國內嘅有形文化財，當時嘅囚犯被當成開拓北海道嘅勞力，博物館入面重現出監獄當時嘅情況，您仲可以喺呢度嚐試一吓當時嘅監獄餐點！如果您想影靚相放 IG，咁「メルヘンの丘」就可以實現您嘅願望，喺一片雪白嘅大地上，聳立住7棵松樹，孤芳自賞嘅高傲之中又帶一股高不可攀嘅風範！您可以選擇喺網走湖附近嘅酒店留宿，欣賞靚景嘅同時浸吓溫泉，夜晚再嚟一份大閘蟹大餐可以話係絕佳享受啦！

北海道第三站：自駕前往釧路仲可以順便去埋世界遺產知床朝聖

喺北海道自駕觀光係好多遊客會揀選嘅方式，一方面自由度比較高，二來好多行程上面嘅安排都比較有彈性，由女滿別出發到知床揸車大約2個鐘就可以抵達，被稱為日本最後秘境嘅知床，「知床八景」係好多遊客一心想征服嘅景點，通常都係從知床五湖開始，一邊喺步道上面散步一邊欣賞遼闊嘅景色，療癒指數爆燈！再嚟就係「神之水溫泉瀑布」，唔單止係硫磺溫泉瀑布，亦都係天然嘅露天溫泉，想要前往嘅朋友仔，記得注意佢嘅開放時間啦！「Oshinkoshin瀑布」、「Oronko岩」、「知床峠」等景色，依照您嘅喜好嚟安排前往參觀啦！

北海道釧路之美

嚟到釧路，您唔可以錯過嘅就係號稱世界三大夕陽嘅「釧路夕陽」，幣舞橋就係觀賞夕陽嘅最佳地點，成片天空被染成橙紅色，映照喺水面上，大船亦都成咗呢幅畫嘅其中一角，巧妙咁點綴出落日餘暉！造訪阿寒湖嗰陣，記得搵一吓丹頂鶴嘅身影，野生嘅丹頂鶴凈係喺東北海道先至有機會睇到佢哋嘅行蹤㗎！當然，阿寒湖國立公園本身就係好具代表性嘅觀光景點，特別係全世界少見嘅「球狀阿寒湖綠球藻」，都係呢度嘅特產啊！