本篇文章內容由Relux Magazine提供。
北海道二世谷（ニセコ）嘅雄偉自然景色十分之吸引人。而佢嘅滑雪場擁有品質極致嘅粉雪，非常之出名，對二世谷嘅冬天印象比較深刻嘅人或者唔少。雖然二世谷係喺北海道，但係可以享受夏天清爽嘅觀光景點更加係多不勝數！蔚藍嘅天空同雄偉廣闊嘅綠意，二世谷充滿咗自然恩惠所賜予嘅景色，就等我哋推薦一吓二世谷嘅觀光景點，希望令您計畫旅程嗰陣可以有得參考吓啦。
1. 羊蹄山
羊蹄山又稱為「蝦夷富士」，代表北海道嘅山岳，都係日本百大名山之一嚟嘅。係典型嘅層狀火山，山頂有一個大約2公里左右嘅橢圓形火山口，佢美麗嘅姿態，無論你去企喺二世谷嘅邊度都可以眺望到佢。6月下旬開放登山，7月上旬到8月上旬，位於標高1,700米以上嘅地方會有超過100種以上嘅高山植物群花齊放。除咗登山，嚟呢度觀察自然同從事戶外休閒活動嘅人都絡繹不絕，係一個十分之受歡迎嘅景點嚟嘅。
- 地址：北海道虻田郡京極町
- 交通資訊：喺京極中央巴士站度開車大約10分鐘
2. 京極Fukidashi公園（京極ふきだし公園）
喺呢個公園入面，有一度「羊蹄嘅Fukidash湧水」被環境廳認定為名水百選，慕名而嚟嘅觀光客絡繹不絕。設置咗「名水之鄉京極」嘅道之驛（道の駅），有商店同遊樂器材、BBQ燒烤區等等設施，除咗可以休息一陣，仲可以喺附近嘅步道度散步，買手信都好方便。從停車場行到湧水嘅地方只係需要3分鐘，水溫全年都係6.5度左右，1日大約有8噸嘅水湧出嚟，提供30萬人左右嘅生活用水。規劃咗多個泉水口，大家可以自由取用。喺呢度飲一啖美味嘅水，呼吸新鮮嘅空氣，徹底放鬆身心啦。
- 地址：北海道虻田郡京極町字川西
- 電話號碼：0136-42-2292 (名水之鄉京極)
- 交通資訊：從京極公車總站徒步約15分鐘
- 詳細請睇 http://www.town-kyogoku.jp/kanko-event/fukidashi-park/
3. 牛奶工房
鄰近二世谷高橋牧場嘅甜品店，製作甜點所使用嘅牛奶全部都係現擠嘅新鮮牛奶。廣闊嘅占地上有年輪蛋糕工坊、乳酪工坊、芝士工坊、紀念品店同咖啡店，仲有餐廳，係嚟到二世谷觀光絕對唔可以錯過嘅景點。喺店嘅露枱同庭園所眺望嘅代表二世谷嘅羊蹄山美景都堪稱一絕。喺呢個雄偉壯觀嘅大自然入面最適合影相做紀念啦。夏天嗰陣可以欣賞一大片向日葵花田，同蔚藍晴空形成強烈對比。真係好想喺呢度一邊食住鮮奶味十足嘅雪糕，一邊盡情呼吸呢度嘅清新空氣啊。
- 地址：北海道虻田郡二世谷町曾我 888-1
- 電話號碼：0136-44-3734
- 營業時間：09:30～18:00（冬天營業到17:30）
- 交通資訊：喺二世谷車站乘搭的士大約10分鐘
- 詳細請睇 http://www.niseko-takahashi.jp/milkkobo/
4. 有島紀念館
「與生俱來的煩惱」、「一個女人」、「該隱的後裔」等著作而聞名嘅大正時期白樺派代表作家—有島武郎，為咗紀念佢同佢嘅著作而建立嘅紀念館。建喺有島武郎爸爸所有嘅農地舊址上面，館內嘅形狀好似北海道，非常時尚，而館藏大約有600件展品。為紀念有島武郎嘅誕辰110週年，喺紀念館周圍建造咗一個寬廣嘅公園，設有適合散步嘅步道，好推薦喺呢度散吓步欣賞吓風景。展望台望出去嘅景色都非常之靚，睇得到二世谷嘅象徵—羊蹄山，真係一大美景！推薦俾參觀紀念館嘅同時，都想悠遊地感受大自然嘅你。
- 地址：北海道虻田郡二世谷町字有島57番地
- 電話號碼：0136-44-3245
- 營業時間：09:00~17:00
- 休館日：星期一、日本新年假期期間
- 入場費用：一般 500円、高中生 100円、初中生以下免費
- 交通資訊：喺二世谷車站徒步大約30分鐘
- 詳細請睇 https://www.town.niseko.lg.jp/arishima_museum/outline
5. 北海道二世谷希爾頓度假酒店（Hilton Niseko Village）
喺二世谷安努普利山麓嘅頂級避暑渡假山莊「北海道二世谷希爾頓度假酒店」，連續4年獲得世界滑雪大賞，獲得日本最佳滑雪酒店四連霸。設有採用町家建築嘅購物同用餐區域，亦都歡迎非入住嘅客人使用。仲有喺地底直接流入溫泉池嘅源泉掛流溫泉（源泉掛け流し温泉），可以順便去浸吓溫泉，浸喺二世谷森林環繞嘅泉池入面，盡情地享受。對於二世谷嘅印象都係冬天居多，但係，呢間度假酒店所規劃嘅夏季活動都相當之充實，可以打高爾夫球，或者係參加尻別川划船活動。喺「Pure」自然體驗區域，可以騎登山單車，或者係乘搭導覽車，漫步喺自然當中，仲有野外山訓體驗同高空滑索等等項目供參加，無論大人細路都可以盡情享樂㗎。
- 地址：北海道虻田郡二世谷町東山溫泉
- 電話號碼：0136-44-1111
- 交通資訊：喺二世谷站乘搭免費接駁巴士大約15分鐘
- 詳細請睇 http://www.hiltonnisekovillage.jp
6. 二世谷安努普利國際滑雪場
「二世谷安努普利國際滑雪場」喺二世谷安努普利嘅南方寬廣嘅斜坡嗰度，以緩降坡度為主體嘅課程規劃非常之廣泛，無論對一家大细，或者係滑雪初學者嚟講都係可以享受滑雪樂趣嘅人氣滑雪場嚟。夏季期間纜車喺7月15日開始運行，喺山頂站附近可以睇到廣闊嘅羊蹄山同洞爺湖嘅靚景。6月下旬開始有登山同熱氣球嘅乘搭體驗、高空動力彈跳等等嘅娛樂活動項目可以玩。喺山麓站徒步大約5分鐘左右嘅地方，有一個俾大自然環繞嘅露天溫泉，仲有販售纜車來回乘搭同溫泉入浴嘅優惠套票，滑雪之後都可以一解運動所帶來嘅疲勞啦。
- 地址：北海道虻田郡二世谷町字二世谷485
- 電話號碼：0136-58-2080
- 交通資訊：從二世谷站乘搭的士大約10分鐘
- 詳細請睇 http://annupuri.info/summer/
7. 二世谷格蘭比羅夫滑雪場（NISEKO Grand HIRAFU）
由比羅夫同花園兩個滑雪場組合而成嘅格蘭比羅夫滑雪場，擁有極為細緻嘅優質粉雪，係一座世界聞名嘅滑雪渡假勝地。使用設施共通票券嘅話，可以來回二世谷安努普利滑雪場，山腰仲有巡迴巴士通行非常之方便啊。夏天嗰陣建議乘搭一口氣直衝海拔差異500米之上嘅夏季纜車，可以一眼飽覽二世谷區域嘅雄偉全景。仲可以參加大自然行程同導覽人員一齊學習大自然嘅知識㖭。仲有BBQ燒烤場區，同正規嘅登山越野車下坡路線都會喺夏天開放，可以盡情享受屬於夏天嘅休閒娛樂。
- 地址：北海道虻田郡俱知安町字山田204
- 電話號碼：0136-22-0109
- 交通資訊：從俱知安站搭乘計程車約15分鐘
- 詳細請睇 http://www.grand-hirafu.jp
8. 二世谷車站觀光介紹所
好似童話咁嘅場景活生生咁出現喺眼前，不禁令人噤快門留念嘅二世谷車站。萬聖節期間嗰陣車站前會擺放大量南瓜，更增添佢嘅可愛。站入面設有觀光介紹所兼等候區，放置咗觀光小冊子。員工都好親切，旅途中途路過，或者係迷路，都可以嚟呢度㗎。附近仲有「綺羅乃湯」嘅二世谷站站前溫泉，呢度係露天溫泉，可以感受大自然嘅氣息，非常之受到歡迎嘅。
- 地址：JR二世谷站入面
- 電話號碼：0136-44-2468
- 營業時間：09:00〜17:00
- 休息日：全年無休，會暫時離開崗位
- 交通資訊：從二世谷站徒步好快就到
- 詳細請睇 http://www.niseko-ta.jp/index.php?id=72
9. NAC Niseko Adventure Centre
二世谷第一間經營規劃划船活動嘅一間店，堪稱二世谷激流划船嘅先鋒。其他仲有立槳衝浪、溯溪、划獨木舟、爬山健行等等可以徹底咁盡情投入大自然懷抱嘅娛樂活動一應俱全。將舊有體育館重建而誕生嘅NAC中心，1樓係爬山用品店，2樓則係開放嘅露天平台，有時尚嘅咖啡店，開放空間仲設置咗大約11米高嘅攀岩牆同抱石區域。只要係3歲以上嘅小朋友就可以參加嘅家庭攀岩同1歲細路都可以玩嘅製作牛奶糖同番薯麻糬等等各種室內活動，適合全家大細一同享樂㗎。
- 地址：北海道虻田郡俱知安町字山田179-53
- 電話號碼：0136-23-2093
- 營業時間：8:00〜21:00
- 交通資訊：喺俱知安站度開車大約10分鐘
- 詳細請睇 http://www.nacadventures.jp
10. 神仙沼
神仙沼喺超過海拔750米嘅高原上，俾高山植物同赤蝦夷松環繞嘅水面美輪美奐，係非常熱門嘅觀光景點嚟嘅。完善設置咗散步步道同森林周遊嘅路線，夏天嚟呢度健行，秋天嚟欣賞湖面照映嘅楓葉美景嘅觀光客人來人往。喺二世谷嘅山岳入面，有個可以稱為最有神秘美感嘅沼澤，隨住四季嘅變化展現出不可思議嘅魅力，吸引咗每個人嘅目光。喺停車場去到神仙沼需要行一段路，幾乎都係平坦嘅道路。無論係細路或者係年長嘅人士都可以放心咁行，係一個適合三代同堂一齊嚟玩嘅觀光景點嚟㗎。
- 地址：北海道岩內郡共和町前田
- 電話號碼：0135-73-2011（分機127）（共和町公所 產業課商工觀光科）
- 交通資訊：喺小澤站度開車大約30分鐘
- 詳細請睇 http://www.town.kyowa.hokkaido.jp/kankou/spot/shinsennuma.html
無論夏天定冬天都可以盡情咁享受二世谷嘅自然風光！
以上嘅介紹，大家覺得點呢？可以飽覽北海道大自然風光嘅二世谷，除咗冬天滑雪之外，夏天一定要玩嘅娛樂活動簡直都多采多姿啊！
涼爽嘅微風、蔚藍嘅晴空、一片綠油油嘅景色，淨係睇住呢個靚景，身心都可以頓時變得輕飄飄啦。無論係同情人、朋友、屋企人都好，嚟到呢度旅遊一定可以玩得好開心啦。唔使多講，美食都係應有盡有嘅，大家一定要嚟呢度玩啦。
Relux
你可以Click呢度註冊成為Relux網站會員。
Relux會員優惠包含：
- 特別優惠折扣券
- 5%回饋獎勵積分
- 最優惠價格保證
Comments