體驗京都東山嘅歷史氛圍

東山位於京都東邊，係保存最完好嘅傳統區之一，擁有歷史悠久嘅街道，充滿古老嘅日式木造建築。呢個區域充滿咗傳統風格嘅房屋、商店同餐館，以傳統京都文化而聞名。今次小編要為大家詳細介紹當地嘅一啲景點。

東山區嘅老京都

東山區係京都市較細嘅一個區。北面邊界位於三条通，南面係十条通，周圍被鴨川同東山群山所圍繞。

雖然好多店鋪都改變咗原本嘅室內裝潢設計，但係區內嘅建築規範要求保留店鋪建築正面原本嘅設計，令呢度成為穿著浴衣影相，喺Facebook, Instagram打卡嘅理想地點。

東山區成立於1929年，當時從下京區分出嚟。由於限制咗現代化嘅發展，希望保持其傳統嘅氛圍，人口持續減少同老化。

東山區係京都市所有區中人口最少嘅地區，而且人口數逐年下降。人口主要集中喺東山區內西面嘅住宅區。東面係一個充滿大自然之美嘅地區，綠蔭濃密。北面為商業區，南面則係京都主要嘅藝伎區同迷人嘅觀光景點。

雖然東山區大部分範圍已經隨著時代推移而逐漸現代化，但南面嘅清水寺同八坂神社之間嘅街道仍保留咗傳統。步行探索南東山係最好嘅方式。

可以從京都藝妓區嘅祗園出發，前往保存完好嘅歷史街區，沉浸喺古都嘅氛圍中。街道盡頭寺廟占地廣大，承載著日本悠久嘅歷史，一於嚟呢度漫步好好感受一下。

二年坂係保存完好嘅街道之一，亦係全球首間提供榻榻米坐席嘅Starbucks所在地。呢間Starbucks利用咗屋齡超過百年嘅日式町家建築，同時保留咗其標誌性嘅綠色同西式咖啡飲品。穿過入口處嘅暖簾，點一杯慣例嘅焦糖星冰樂，坐喺藝妓曾經表演過嘅房間入面嘅榻榻米上面啜飲，係喺南東山區先至可以獲得嘅體驗。

如果品嚐Frappuccino唔係你嘅心頭好，你亦可以喺街道上嘅傳統町家店鋪品嚐當地小食，或者喺道路上嘅菓子店買一啲當地嘅糖果餅乾。

到京都旅行嘅時候，一定要參觀神社同寺廟，東山慈照寺，亦被稱為銀閣寺，係一個非常美麗嘅地方。呢座寺廟於1490年完工，原本係作為幕府將軍足利義政嘅別墅山莊。

不幸嘅係，足利義政喺寺廟建成之前就去世，為咗紀念將軍，被改成一座禪寺。雖然喺2008年重新裝修，但寺廟呢種略帶殘缺嘅狀態，仍然同幕府將軍最後一眼睇到嘅時候嘅狀態一模一樣。日本呢種追求不完美嘅美學，被稱為「侘寂」，係佛教精神嘅一部分。

東山慈照寺至今依然係代表室町時代嘅東山文化建築之一。參觀寺廟嘅門票，成人為500円、兒童300則係円。冬季每日上午9:30至下午4:30開放，夏季則係上午8:30至下午5:00開放。可以睇到古代京都最偉大、保存得最完好嘅寺廟，參觀銀閣寺可以話係一個千載難逢嘅機會。