4年一次嘅世界杯，可以話係無分國籍、無分老少，令全世界嘅球迷都為之瘋狂，甚至有好多平時唔睇足球比賽，唔識球賽規則嘅人，都喺呢個時期成為咗一日嘅球迷，寧願熬夜都唔想錯過任何一場比賽。到底係D咩因素，令所有嘅人都為之著迷呢？唔理係咩運動，每一場嘅比賽，都喺運動員長年嘅練習下，竭盡所能咁突破自我、挑戰極限，唔係剩係得個人嘅努力，係成個團體嘅默契同合作，亦都係比賽勝負嘅關鍵原因，觀眾們迷上嘅正正就係呢種全心投入所散發出嘅魅力啊！
運動係世界共通嘅語言
只要係同一種運動嘅愛好者，即使係唔同國家、種族嘅人，都可以透過運動互相嘅交流同溝通，甚至藉由運動嚟了解彼此國家嘅文化差異，互相學習！2021年嘅World Masters Games關西，就係一個非常好嘅國際選手交流嘅機會，開放俾年齡喺30歲以上嘅所有運動好手皆可參賽，彷彿就好似一個世界級嘅嘉年華會，如果您係龍舟、賽艇、馬拉松、曲棍球、壘球同軟式棒球愛好者嘅話，您就絕對唔可以錯過喺日本滋賀縣所舉辦嘅呢個比賽項目啦！滋賀縣都有多好食好玩嘅景點，等我哋嚟一齊睇睇啦！
琵琶湖就係滋賀縣嘅代名詞
滋賀縣係日本少數嘅無海岸線嘅縣份之一，其中琵琶湖唔單止係日本最大嘅湖泊，佢嘅面積仲佔咗滋賀縣大約六分之一左右，以琵琶湖為中心、余吳湖、伊吹山、比良山等等共同構成咗琵琶湖國家公園，可以參觀嘅景點有好多，您都可以揀選乘搭觀光船遊湖，亦可以喺船上用餐，夏天嗰陣，琵琶湖嘅煙火大會都係每年備受期待嘅祭典嚟㗎！2018年係8月7日舉辦！2021年嘅World Masters Games關西，龍舟競技項目都預定喺琵琶湖度舉行，可以喺日本第一大湖參加比賽，可以話係別具意義喇卦！
海津大崎：騎單車沐浴喺櫻吹雪下
位在琵琶湖西北部嘅海津大崎，其實都係非常出名嘅賞櫻景點嚟，相比關東同京都大阪嘅櫻花，呢度嘅櫻花嘅滿開都比較晚，乘搭JR到牧野站（マキノ駅）之後，最熱門嘅方式就係租單車騎過去啦，從車站行到去櫻花大道大約係2公里左右嘅距離，租單車嘅方式除咗比較慳力水之外，沿途睇到美景都可以隨時停低影相喔！喺海津大崎仲可以乘搭觀光船，遊湖賞櫻花嘅方式都別有一番風情啦！
喺滋賀縣嘅世界遺產：比叡山延曆寺
比叡山延曆寺可以話係日本佛教嘅聖地嚟，比叡山上其實無任何一座寺廟係被稱為延曆寺嘅，而係喺桓武天皇時代嗰陣，將當時嘅年號「延曆」賜咗俾比叡山上所有嘅寺廟，作為一個總稱，依加主要分成三大部分：東塔、西塔同埋橫川。可以乘搭比叡山嘅巴士參觀，但係要注意巴士嘅開車時間，如果想一次過全部制霸嘅話，建議一大早就要上山啦，或者您都可以揀選喺比叡山延曆寺會館留宿一晚，除咗可以品嚐「精進料理」﹝素食餐﹞之外，仲可以體驗日本嘅坐禪文化㖭啊！喺呢個腳步快速嘅現代社會，偶爾停低沉澱吓心靈都係有益身心嘅！
日本超人氣吉祥物彥根喵喵就喺彥根城
日本各個縣市都有佢專屬嘅吉祥物，除咗知名嘅熊本熊部長之外，喺日本超級有人氣嘅就係彥根喵喵（ひこにゃん）啦，彥根城係日本重要嘅國寶五城之一，就喺2007年紀念築城四百年嗰陣，彥根喵喵就誔生咗啦！肥肥白白嘅身體，頭上帶住戰國時代嘅武士頭盔，又得意又俏皮嘅模樣，非常之得人鐘意啊，彥根喵喵每日都會安排時間出現喺彥根城嘅唔同地方，去參觀彥根城之前，唔好唔記得查吓彥根喵喵嘅行程，一睹佢迷人嘅風采啦！
彥根喵喵嘅官方網站：http://hikone-hikonyan.jp/
保持固定運動嘅習慣，唔單止對身體健康有益，仲可以舒緩日常工作上嘅壓力，如果您唔係運動嘅愛好者，咁週末假日約吓親朋戚友一齊去大自然散步踏青、或者係結伴出國行走天下，都可以話係一種運動啦掛！
更多World Masters Games嘅資訊請睇 → http://www.wmg2021.jp/en/
Comments