去池袋搵食其實好簡單，甚至唔使離開車站就可以食到各式各樣嘅美食！為咗令你嘅池袋之旅更加順利且豐富，我哋為你介紹池袋百貨公司裡同街上嘅美食！
尋找池袋最好嘅餐廳
池袋嘅壽司
每份壽司只係100円(未稅)咋！只要從池袋車站出來，行一陣就到「無添くら壽司 池袋東口店」，呢度以平價享受多款壽司而出名。
營業時間為星期一至星期五早上11點至晚上11點，週末早上10:20至晚上11點。呢間餐廳位於地下一樓，要落一層先可以搵到㗎！
餐廳資訊
- 名稱：無添くら壽司 池袋東口店
- 地址：東京都豐島區南池袋1-19-5 G大樓南池袋01 B1F
- 交通方式：池袋站東出口步行6分鐘
池袋嘅居酒屋
池袋係一個尋找平價美食嘅好去處，例如居酒屋連鎖店「鳥貴族」，喺池袋站附近就有好幾間分店，可以滿足當地人及遊客嘅用餐需求。呢間店餐單上嘅所有食品，一律都係298円(未稅)咋！
呢間店有好多串燒同飲料可以揀，仲有可以任食椰菜！每日下午5點營業到淩晨5點。所以，如果想喺朝早趕搭第一班電車之前食啲嘢，呢度係個好地方！
餐廳資訊
- 名稱：鳥貴族Metropolitan口店
- 地址：東京都豐島區西池袋1-10-8 3F
- 交通方式：池袋站南出口步行1分鐘，或東京Metro有樂町線 池袋站3號出口步行1分鐘
池袋嘅拉麵店
雖然可以喺東京好多地方搵到豚骨湯底嘅拉麵，但喺池袋有一間使用雞湯湯頭作為招牌嘅人氣拉麵店。「雞之穴」呢間店有幾款拉麵可以揀，如果鍾意試新嘢嘅話，可以試一試呢度嘅沾麵呀!
呢度嘅湯底係又濃郁又柔滑嘅肉湯，還附有幾片烤雞肉片，非常好味。一食簡直係停唔到呀! 店家每日上午11點營業至晚上10點，午餐時段會非常擠迫，建議最好下午去食。
餐廳資訊
- 名稱：雞之穴(Torinoana)
- 地址：東京都豐島區東池袋1-39-20 慶太大樓1F
- 交通方式：池袋站東口步行5分鐘
池袋嘅印度料理
如果想試吓池袋嘅印度料理，咁就一定要去Saffron喇！餐廳位於池袋太陽城Sunshine City旁邊，提供嘅午市套餐種類眾多，晚餐更多，可以滿足你想食唔同食物嘅胃！
價格方面，從680円起嘅雞蛋咖哩午餐，至4,500円嘅晚餐套餐都有。餐廳每日營業, 午餐時段由11點半至下午3點, 晚餐由下午5點半至晚上10點。
餐廳資訊
- 名稱：Saffron池袋
- 地址：東京都豊島區東池袋1-28-1 Takuto TO大樓201
- 交通方式：池袋站東口步行5分鐘
池袋車站嘅美食
池袋最正嘅其中一個地方就係連車站內都可以發掘到好多美食! 車站可以直通好幾間百貨公司，就好似有東武百貨、西武百貨、LUMINE百貨，每間百貨公司入面都有好多餐廳！
池袋東武百貨嘅美食區
可以喺東武百貨嘅高樓層搵到各式各樣嘅餐廳！池袋東武百貨嘅餐廳，從法國料理FAUCHON PARIS Le Café，到義大利料理Amico Bio ‘e Napule，甚至係TORITON迴轉壽司都有。
根據你當日嘅心情，喺下午茶時段嚟杯紅茶，或者到Starbucks買杯咖啡享受一下都唔錯呀! 百貨公司每日朝早10點營業到晚上8點，有部份餐廳可能會夜啲先閂門，詳情可以參考各百貨公司嘅資訊。
景點資訊
- 名稱：池袋東武百貨公司
- 地址：東京都豐島區西池袋1-1-25
- 交通方式：池袋車站嘅西面
池袋西武百貨嘅美食區
池袋車站嘅東面有西武百貨，有更多餐廳或咖啡店呀! 我哋建議由最低樓層開始行上去，去發掘一下日本稱作Depachika嘅「地庫百貨」。
喺呢度有種類非常豐富嘅食物。從日本當地食材、手信或者零食都有。喺「地庫百貨」(Depachika)其實可以搵到各種意想不到嘅驚喜!
行完地庫樓層後，可以到8樓及9樓，由幾間餐廳組成嘅「西武餐飲美食區」。依個人喜好，可以揀洋式、中式、日式或其他料理。
西武百貨從早上10點營業至晚上9點 (星期日營業到晚上10點)，但好多餐廳都係從早上11點營業至晚上11點。可以先查清楚每間店嘅營業時間再出發呀!
景點資訊
- 名稱：池袋西武百貨
- 地址：東京都豐島區南池袋1-28-1
- 交通方式：池袋車站東面
池袋LUMINE餐廳
就好似東武同西武百貨一樣，你可以喺LUMINE百貨嘅餐廳享受各式美食。大部份嘅餐廳位於百貨公司嘅8樓同9樓，有日本料理，甚至有混合中式泰式嘅料理。
LUMINE每天早上11點開放至晚上９點半(週末則於晚上９點關門)，好多餐廳都係由早上11點開始營業至晚上10點半(最後點餐係晚上10點)。呢度好容易到達所以非常推薦!
景點資訊
- 名稱：池袋LUMINE
- 地址：東京都豐島區西池袋1-11-1
- 交通方式：池袋車站嘅西面
池袋有間MARHABA餐廳所使用嘅肉類都係受到官方認證嘅清真食品。價格普遍從1,000円起跳。從池袋車站只需要行一小段路就會到達，有興趣可以一試呀。
午餐時段係平日早上11點至下午3點，晚餐時段則由下午5點至10點半。星期日嘅營業時間由早上11點至晚上9點半。
景點資訊
- 名稱: MARHABA
- 地址:東京都豐島區西池袋2-63-6
- 交通方式: 池袋站20A出口步行8分鐘
Comments