日本四季變化唔同，各有值得一去嘅觀光景點。其中秋天來臨之際、樹葉凋零前，紅葉喺秋高氣爽清澈天空下閃耀嘅場面，更係宛如一幅美麗畫作。呢篇文章內，我哋會為您推薦7個必去賞紅葉景點，由最先開始染紅嘅北海道，到各位遊客可以輕鬆抵達嘅東京周邊地區都一應俱全！
北海道 定山溪溫泉
有「札幌後花園」之稱嘅定山溪，從溪谷到溫泉街沿途延綿不絕嘅散步徑兩旁開滿漫天紅葉，場景非常美麗。滿片紅葉嘅溪谷間有一條紅色二見吊橋，更係當地必睇景色！日間您可以輕泛獨木舟欣賞赤紅，晚上則可以飽覽點燈之下嘅奇幻紅葉姿態，一次過欣賞千姿百態！植物從9月底開始轉紅，到10月中開始就會迎來最佳賞紅葉時期。
景點資訊
- 景點名稱：定山溪溫泉
- 交通方式：新千歲機場乘搭直達巴士大約100分鐘，或札幌站乘搭「河童Liner號巴士（かっぱライナー号）」大約60分鐘
- 地址：北海道札幌市南區定山溪溫泉
青森縣 奧入瀨溪流
因風景秀麗而揚名嘅十和田湖奧入瀨川，其自然美景獲指定為國家天然紀念物。全長大約14km嘅奧入瀨溪流，沿途有紅葉點綴嘅「阿修羅之流」湍急溪流、14道瀑布同奇岩怪石等等無數玄奧精彩之處，令人深深感受到大自然神秘。樹木由10月上旬開始轉紅，直到11月上旬為最佳賞紅葉時機。
景點資訊
- 景點名稱：奧入瀨溪流
- 交通方式（往燒山）：JR新青森站乘搭巴士大約120分鐘、或JR八戶站乘搭巴士大約90分鐘
- 地址：青森縣十和田市
栃木縣 日光伊呂波山道
日光內遍佈世界遺產日光東照宮、神橋等人氣觀光景點。連接日光街道到中禪寺湖嘅伊呂波山道全長15.8km，海拔高度差500m，越去到高處，沿住伊呂波山道盛開嘅紅葉顏色就越紅，倒映於中禪湖湖面嘅美景更堪稱最精彩壓軸！樹木從10月頭開始變色，到11月底就係最佳賞紅葉時機。
景點資訊
- 景點名稱：日光伊呂波山道
- 交通方式：JR、東武日光線日光站乘搭往「中禪寺溫泉」或「湯元溫泉」東武巴士大約40分鐘
- 地址：栃木縣日光市細尾703
東京都 明治神宮外苑
講到東京嘅紅葉，就不得不提從青山通到聖德紀念繪畫館嘅全長300m銀杏樹。146棵銀杏樹一次過化作金黃色，景色就好似係一條黃金隧道咁閃閃發亮。而喺呢度舉辦嘅神宮外苑銀杏祭，更成為東京秋天例行年度盛事。往年最佳賞銀杏時機為11月底到12月頭。
景點資訊
- 景點名稱：明治神宮外苑
- 交通方式：東京Metro銀座線外苑前站、都營大江戶線、東京Metro半藏門線青山一丁目站徒步大約3分鐘； JR中央總武線信濃町站徒步大約10分鐘
- 地址：東京都港區北青山2丁目
東京都 國營昭和紀念公園
總面積達180公頃嘅國營昭和紀念公園內有一條全長200米嘅運河，運河兩旁座落銀杏大道、兒童森林水杉、同可以品茶嘅日式庭園等等眾多景點，園內氣氛完全就好似漫步喺童話世界入面咁！往年最佳嘅賞紅葉時機為10月底到11月底。
景點資訊
- 景點名稱：國營昭和紀念公園
- 交通方式：JR青梅線西立川站徒步2分鐘、JR中央線立川站徒步大約10分鐘
- 地址：東京都立川市綠町3173
神奈川縣 三溪園
令人感覺身處喺古都之中嘅三溪園內設置咗多棟建築物，當中包括從京都鎌倉等移建過嚟嘅10棟重要文化財。無論遊客喺園內邊個角落取景，都可以影出如畫靚相。除咗到園內待春軒品嚐正宗抹茶以外，秋天限定開放參觀嘅「聽秋閣」亦絕對不容錯過！往年最佳觀賞紅葉時機為11月底至12月中。
景點資訊
- 景點名稱：三溪園
- 交通方式：JR根岸站乘搭巴士至本牧落車大約10分鐘，橫濱站乘搭市區巴士8・148號系統到三溪園入口大約35分鐘
- 地址：神奈川縣橫濱市中區本牧三之谷58-1
山梨縣 河口湖北岸
從河口湖北岸，您可以眺望到映照紅葉嘅湖泊以及富士山同框靚景。湖邊為大約150米長嘅紅葉隧道同大約60棵巨大楓樹嘅紅葉迴廊，點燈時嘅迴廊美景屬必睇之處。此外，場地更係富士河口湖紅葉祭舉辦會場。往年最佳觀賞時期係11月頭至11月中。
景點資訊
- 景點名稱：山梨縣 河口湖北岸（楓葉迴廊）
- 交通方式：富士急行河口湖線河口湖站乘搭河口湖周遊懷舊巴士大約25分鐘，於久保田一竹美術館落車
- 地址：山梨縣南都留郡富士河口湖畔河口
Comments