東京都內最正嘅植物園

遠離大城市嘅喧囂，嚟東京植物園探索一下大自然啦！係東京嘅主要旅遊景點附近其實有好多植物園，今日我哋要介紹嘅兩個植物園雖然唔係咁出名，但都好值得一去!

東京嘅植物園

其實有好多植物園位於東京都內，如果想沉浸喺日式大自然嘅美麗當中，又唔想去到京都嗰啲咁遠嘅地方，咁接落嚟小編要為大家介紹嘅兩間植物園一定好適合你!

位於東京西側嘅神代植物公園以玫瑰聞名。事實上，呢個公園擁有全東京最大嘅玫瑰園，秋天左右會有400種，共5200朵玫瑰開花，吸引咗來自全國各地嘅人前來參觀!

雖然神代植物公園歷史悠久，但其實1961年先至向公眾開放。成個花園有48萬多平方公尺，大約有十萬種唔同類型嘅樹木、灌木同植物。

東京嘅春天，因為梅花同櫻花盛開，所以呢個時期特別受歡迎。另外，你仲可以喺五月睇到杏樹同杜鵑花園嘅美景。

喺呢個植物園入面，仲可以搵到一間溫室，入面有好多1984年開始種植嘅熱帶植物。而且公園內仲有一個好正嘅草坪俾你放鬆, 一於從陽光明媚嘅底下欣賞大自然美麗。

神代植物公園亦有免費入內嘅園區，包括位於神代寺隔離嘅水生植物園。另一個園區喺主要花園區域嘅北面有一個植物多樣化中心。喺嗰度可以搵到好多不同種類嘅植物，並可以瞭解更多關於花園中嘅植物資訊。

入園時間為9:30至17:00(水生植物園至16:30), 最後入園時間為16:00。公園喺每個星期一, 12月29日至1月1日休館。一般入場費為500円, 初中及高中生200円(東京都民或就讀於東京嘅學校, 出示身份證明後可以免費入園)，65歲以上嘅長者為250円，小學生則免費入園。

如果想享有免費入場，請唔好錯過5月4日嘅「綠之日」同10月1日嘅「東京都民之日」, 呢兩日都可以免門票入園。

小石川植物園嘅歷史可以追溯到1684年, 最初被稱為「小石川藥草園」, 由德川幕府建立, 係日本最古老嘅植物園之一。

呢度有好多唔同種類嘅植物, 其中包括來自日本嘅植物，仲有來自韓國、中國、台灣同世界各地嘅植物。

小石川植物園於每年三月下旬至四月上旬會開滿一排美麗嘅櫻花, 園內遍布粉白色花瓣。呢度係賞花嘅好地方, 因為無咁多遊客知道呢個地方，所以唔會好似其他熱門景點咁擠迫。

花園每日9:00至16:30開放, 16:00為最後入園時間。每個星期一, 及從12月29日至1月3日休館。如果星期一係紅日, 咁花園將會喺下一個工作日先至作休息。

小石川植物園嘅入園費為成人400円, 中學生及小學生都係130円。有機會嘅話一定要早啲去, 因為公園內有好多嘢可以睇同體驗！