淺草寺係東京最受歡迎嘅景點之一，每年約有3千萬人前來朝聖和觀光。除咗會喺雷門前影相留念、喺仲見世通逛街購物和品嘗美食之外，淺草寺其實仲有更多值得一遊嘅好去處。
今次，小編將為你介紹如何玩盡淺草寺，以及正確嘅參拜方式，等你可以完整體驗淺草寺嘅獨特魅力。
淺草寺係東京都內最古老嘅寺廟？
淺草寺成立至今已接近1400年歷史，位於距離淺草站步行約5分鐘嘅地方。整個寺廟範圍佔地約3,408平方米，包括14個佛堂和門等建築。
呢座寺廟嘅歷史可追溯至628年，當時兩名漁夫喺宮戸川（即現時嘅隅田川）發現聖觀世音菩薩像，當地領袖將其奉為神明，並將私人住宅改建為寺廟作供奉之處，呢個就係淺草寺嘅起源。
隨後，一位名叫勝海上人嘅僧侶喺夢中得到觀音菩薩嘅告示，將主佛定為秘藏佛像，慎重地供奉於御宮殿中。後來，於857年由慈覺大師円仁製作與主佛非常相似嘅聖觀音菩薩像（御前本尊），現時每年12月都會以此御前本尊舉行開扉法事。
另一方面，淺草寺嘅諸堂喺歷史上多次遭遇大地震、崩塌、火災等困境，但每每都由歷史上嘅偉大人物和虔誠信徒們重新修復。
巡遊淺草寺境內必睇位
淺草寺內有眾多令人驚嘆嘅佛教藝術品，包括寫有「雷門」字樣嘅紅色大提燈，以及本堂等建築和佛像等等。其中部分更被指定為國寶、國家重要文化財和國家指定名勝。
淺草寺必睇位 1. 雷門
雷門係淺草寺嘅入口處，亦為其「總門」。雷門可謂淺草嘅象徵性存在，亦係人氣嘅打卡景點。其正式名稱為「風雷神門」，皆因門嘅左右兩邊供奉著風神和雷神而得名。
呢座雷門自建立以來，經已多次遭受火災並重建。1795年進行重建後，先至開始供奉燈籠於雷門。
現今嘅門於1960年重新建造，中央掛著一個底部雕刻著一條龍、高3.9米、重700公斤嘅巨大燈籠。
淺草寺必睇位 2. 寶藏門
穿過雷門，沿著仲見世通前進，就會見到懸掛著寫有「小舟町」嘅大燈籠，呢個就係「寶藏門」。呢座兩層建築嘅門廊兩側各有一尊仁王像，因此亦被稱為仁王門。1964年進行重建時，由於其具備結合藏經閣及收藏寺廟珍寶嘅用途，因此被改名為寶藏門。
喺寶藏門內，收藏著國家重要文化財「元版一切經」。門嘅背面，懸掛著一對長4.5米、寬1.5米，重達500公斤嘅大草鞋。據說呢對草鞋代表著仁王嘅神力，能嚇退魔鬼。
淺草寺必睇位 3. 本堂
穿過寶藏門後，就會去到供奉本佛聖觀世音菩薩嘅本堂。堂內分為內陣和外陣，當中內陣中央係最為神聖嘅空間「御宮殿」。喺御宮殿上層間裡，安放著收藏於佛龕中嘅秘藏佛像本尊，下層間則放置代替秘藏佛像本尊嘅御前立佛像。
本堂外陣及對聯嘅天花板上，可以睇到「龍之圖」、「天人之圖」、「散華之圖」三幅天井畫等書畫作品，為堂內增添不少色彩。
本堂前方設有「手水舍」，供參拜者於進行參拜前淨身之用，另外亦設有「常香爐」，參拜者可以藉著香爐中嘅煙霧去除身上邪氣。據說常香爐嘅煙霧有助於改善身體唔舒服嘅部位。
※內陣：指本堂中央部分；外陣：指內陣嘅外側部分
※對聯：於通往本堂階梯嘅柱子，以及外陣區域上，放置刻有對聯詩句嘅雕刻作品
淺草寺必睇位 4. 五重塔
實藏門和本堂西側嘅五重塔，其鮮豔朱紅色，係淺草寺境內眾多景點當中格外引人注目。現今嘅五重塔係於1973年喺原有建築物（塔院）之上，以塔院造型重建而成。
五重塔有五個寬闊度相約嘅屋頂，但從底層至頂層逐漸收窄，與塔院和頂層嘅九輪相互呼應，呈現出美麗嘅輪廓。塔的外形因其屋簷邊緣彎曲向上嘅曲線而呈現生動感。夜晚時分嘅五重塔，會與本堂、寶藏門一同進行亮燈，散發出一股夢幻嘅氛圍。
五重塔嘅最頂層供奉著從斯里蘭卡「Isurumuniya寺院」所繼承嘅佛舍利（釋迦牟尼佛遺骨）。
淺草寺必睇位 5. 傳法院（日本庭園）
位於仲見世通西側傳法院通嘅淺草寺本坊「傳法院」係淺草寺境內佔地較大面積嘅日本庭園，亦係東京都內少數傳承自江戶時代初期嘅寺院庭園之一。呢個日本庭園係由兩個分開嘅大池泉圍繞著小徑組成嘅遊園式庭園，並被列為國家名勝。
呢度有六棟被列為國家重要文化財嘅建築，包括客殿、玄關、大書院、小書院、新書院和台所。可享受四季不同季節風情嘅同時，亦可感受以上提及到嘅建築物所彰顯著嘅歷史氛圍。
遺憾地，建築物目前並未對一般公眾開放。只會不定期地進行特別公開活動，如果想知道相關嘅公開日期，可以查閱淺草寺嘅官方網站。
※「本坊」係指住持們生活和處理寺廟事務嘅地方
介紹淺草寺祈願和參拜方法。願您願望成真！
淺草寺主祀受人們信仰所支持嘅係聖觀世音菩薩，被視為最慈悲嘅佛祖，神力據稱可以實現各種願望。以下落嚟，小編將介紹參拜本堂嘅方法，下次有機會不妨抱著一顆願望成真之心前往參拜吧。
參拜方法
- 雷門：喺淺草寺嘅山門——雷門前雙手合十鞠躬，然後進入參道嘅仲見世通。
- 手水舍：用水淨身。先用杓舀水，先淋洗左手再淋洗右手，使用左手含水漱口後，再淋洗左手，最後用剩餘嘅水洗杓嘅把手。
- 常香爐：獻上香，並藉香爐嘅煙霧去淨化身體。
- 本堂：①鞠躬致敬，將錢放入賽錢箱。②雙手合十祈願，再次鞠躬。③再輕輕地鞠躬。
- 雷門：離開山門（雷門）時，面向本堂，雙手合十鞠躬一次。
淺草寺除咗本堂之外，仲有其他不同佛堂，各個佛堂皆有不同嘅祈福效果。參拜完本堂之後，不妨繼續參拜其他佛堂吧。
- 影向堂：祈求生意興隆與財運亨通。
- 藥師堂：祈願病痛痊癒與身體健康。
- 淡島堂：求子、安産順產，女性疾病康復、裁縫技藝進步等與女性相關嘅祈願。
- 錢塚地藏堂：祈願生意興隆。供奉鹽巴並進行祈願，可帶來好嘅財富運。
- 鎮護堂：祈求消除火災、防止竊盜，以及各種藝術技能進步。
- 久米平內堂：祈求緣份結合與美好姻緣。
一場嚟到到淺草寺，不妨抽個籤、將御朱印、御守帶返屋企！
參觀完淺草寺本堂和各種佛堂後，記得去抽籤，籤文上面記載寫著珍貴嘅建議，相當獨特。另外，小編建議大家入手御朱印和御守，將神聖庇佑帶埋返屋企。
御神籤
可以喺寺內各授與所抽御神籤。據聞淺草寺嘅御神籤中，凶籤比率較高，皆因其凶籤比率自古以來從未改變過，採用傳統「觀音百籤」方式去分配御神籤。
相傳即便抽中凶籤，只要堅持忍耐和誠實地生活，好運會隨之降臨。另外，就算抽到大吉籤，亦有可能出現相反現象……因此，御神籤並非單純地以吉、凶去判斷喜憂，建議以一顆接受建議之心去抽御神籤。
御朱印
御朱印係日本神社或佛寺授予嘅一種參拜證明，淺草寺嘅話，可以喺影向堂購入。而淺草寺授予嘅係主佛「聖觀世音菩薩」、以及七福神之一「大黑天」嘅御朱印。主佛嘅御朱印上是「聖觀世音菩薩」，而大黑天嘅御朱印上則是「大黑天」，並皆會以墨水書寫上參拜日期等資訊。
御守
御守和御神籤一樣，可以喺淺草寺各個授與處購得。淺草寺嘅御守正如淺草寺其多樣嘅祈福效果，擁有開運、財運、姻緣、疾病康復等御守，可謂種類繁多。喺眾多御守中，相傳可保佑防災除厄、避雷和保佑交通安全等嘅「金鱗守」，為經典人氣御守。「金鱗守」有聖觀世音菩薩和十二生肖守護主神兩種版本，皆以金龍鱗片設計。
淺草寺舉辦的活動或祭典
新年大祈禱會、初詣（元旦〜1月7日）
淺草寺會喺元旦午夜零時，敲起除夜鐘聲，一同迎接新年，並由108位信徒輪流敲響鐘聲。一般開放時間為上午6時至下午5時，但除夕日為上午6時30分至晚上7時，元旦日則從午夜0時開放至晚上8時，因此唔少人會於響起除夜鐘聲時段，前來參拜。
從元旦至1月7日期間，本堂內陣嘅御宮殿前將舉行「新年大祈禱會」。新年大祈禱會上，會將信徒嘅「祈禱札」排列整齊，並由僧侶進行加持祈禱。
另外，平日已經係吸引觀光遊客和參拜者前往嘅人氣景點淺草寺，去到元旦呢一日嘅人潮比平時更加擠擁。尤其係午夜0時左右至凌晨3時左右，係最為擠迫嘅時間。到早上6時左右，情況會相對緩和，但從上午10時開始，又會再次變得非常擠迫。因此，若果想喺元旦參拜，建議一大朝早或下午5時以後前往。
四萬六千日、酸漿花市（7月）
淺草寺嘅夏季風物詩之一就係「四萬六千日、酸漿花市」。淺草寺會於7月9日和10日舉辦酸漿花市活動。據說喺7月9日或10日至淺草寺參拜，便能獲得等同於46,000日（相當於一生）嘅功德，因此被命名為「四萬六千日」。
「四萬六千日、酸漿花市」嘅舉辦可追溯至約1764年～1772年間。受到芝愛宕神社舉行嘅四萬六千日酸漿花市所影響，淺草寺便開始舉辦此活動。當時酸漿花被視為藥草，其效用使得淺草寺四萬六千日嘅活動變得更加熱鬧，一直延續至今。另外，當日仲會有風鈴和各種攤位，讓人更能享受得到江戶時代風情。
※功德：指善行或善事。相信積累功德能夠獲得神明加持和庇佑
景點資訊
- 名稱：淺草寺
- 地址：東京都台東區淺草2-3-1
- 交通：從東武Skytree Line、東京Metro、筑波快線、都營地下鐵 淺草站步行約5分鐘
- 參觀時間：
- 寺內：全天候開放
- 本堂：06:00～17:00（10月～3月：06:30～17:00）
- 參觀費用：免費
- 網站：https://www.senso-ji.jp/
Comments