以自殺熱門地點成名，喺日本無人不識嘅「樹海」青木原，有太多關於呢個地方嘅恐怖故事。繼上篇之外，今次再分享多個故事先。
樹海」青木原 恐怖故事之二：樹海嘅邪惡幽靈
背景：喺青木原，每年都會舉辦一次「尋找屍體」嘅行動，當地警方、消防隊同義工都會參加。呢度有一個習俗，就係將屍體帶返警局後，瞓喺被發現嘅屍體隔離，藉此希望佢哋半夜無人時，都唔會變成厲鬼或者移動物品。而呢個故事係其中一個參與行動嘅義工分享……
-----------------------------------------------------------
我有次由熟人介紹參與咗「搜尋行動」。
而呢個搜尋行動非常唔簡單，實際上係同埋警方同消防一齊進入樹海搵屍體，每年一次嘅行動。
森林入面有好多條路可以行，喺夏天行或者會覺得好涼爽好好行。但只要一行錯路，就會變得好危險！
因為熔岩層上嘅泥土只有幾厘米，所以啲大樹要扎根抓地嘅話，就要將樹根伸展得又遠又闊。而且地面嘅熔岩層又有好多大洞隱藏喺落葉低下。
若果唔小心差錯腳，就有可能跌落一個幾米高嘅深淵。對於唔熟識呢度地形嘅人嚟講，真係一步一驚心，好易「行差踏錯」㗎。
每年都有參與呢個行動嘅人會做先鋒，喺一個特定範圍進行搜索。所以其實都唔算去行哂成個樹海。
為咗唔想大家迷失喺呢個森林之中，搜索隊會分成幾個小隊，用繩綁實喺入口處，入樹林時會一直拉住條繩，咁最後回程時就可以沿住條繩返出嚟。
我嗰時要求咗要同朋友編埋同一隊。而途中，我發現有一個藍色臨時帳篷。入面有雜誌、男裝銀包，同埋散佈一地嘅零食。就咁睇，好似有人喺到一段幾長嘅時間。
雖然喺帳篷入面搵唔到任何屍體，但就喺幾米外附近嘅樹根上發現到一具屍體。我諗應該就係帳篷嘅主人喇。我哋用對講機報告咗呢件事之後就繼續前進。
呢一日5小隊發現咗總共12具屍體。喺就快日落時我哋就要結束搜尋行動。當我哋拉住條繩沿路行返去時，我發現有個人影喺幾米距離嘅前方，但係好明顯佢唔係我哋搜索隊嘅人。
但嗰個「人」喺咁攪我哋條繩。
我哋突然覺得唔多對路，於是即刻大嗌:「喂！邊個喺前面！！！？」
嗌完之後，嗰個模糊嘅身影就迅速消失喺樹海之中。我哋都覺得好不安。咁我就話：「如果我哋再唔快啲，好快就日落啦！」所以就決定快快手跟住條繩沿路返起點。
之但係...…
當我哋行到頭先個人影企嗰個位置時，就發現綁喺樹條繩嘅另外一邊被人剪斷咗。
無錯，條繩被人剪斷咗......呀！！！！
我仲要搵唔返被剪斷嘅繩頭。
睇嚟，我哋已經無咗條可以返出去嘅路。
條繩望上去唔似係被利器剪斷，而係好似被人用力撕爛咁。我哋都好驚，諗返起之前搵到嗰具腐爛嘅屍體，就覺得自己都可能會就咁玩完……！我驚到完全冷靜唔到！
最後，我用對講機聯絡其他小隊，好彩最終可以遇得返其他小隊。
當我哋逃出生天後，我哋隊其中一個成員話，嗰個人影應該係樹海嘅死靈。話個死靈就係想要多啲「朋友」喺身邊，所以整斷咗我哋條繩......
不過從此以後，每一個搜索成員都一定要拎3條沿繩，先可以入去樹海行動。
擇取自Cocolog-nifty網頁嘅Kowai-Hanashi Blog
-----------------------------------------------------------
後記
喺鬼故世界，見到鬼或者鬼影係一回事，但係物件移動或者消失又係另一回事。雖然故事作者呢位當時人嘅其他成員話係死靈，但作者形容佢似係一個怪獸咁樣爬行,，或者可能佢嘅直覺先啱呢…..
今日睇完個故事覺得點呀？如果對恐怖系列有興趣嘅話，或者對邊方面嘅鬼故事有興趣，都可以留言同我哋講㗎！
其他驚慄 & 奇幻系列嘅文章:
Comments