赤坂（Akasaka）位於東京，係一個有著悠久歷史嘅街區，呢度有好多高雅傳統嘅餐廳同商店，同時混合咗現代風格建築以及高層摩天大樓。喺赤坂，你可以體驗到日本同東京從江戶時代變遷至現代嘅第一手歷史經驗。以下為你介紹有關赤坂嘅景點、餐廳同酒店。
兩大赤坂景點
迎賓館赤坂離宮同赤坂Biz塔樓大廈係赤坂必去嘅景點。
迎賓館赤坂離宮
迎賓館赤坂離宮係日本兩間接待外國國賓嘅場所之一，同時亦係一個受歡迎嘅知名觀光旅遊景點。最初建於1909年，作為皇太子住所嘅東宮御所赤坂離宮，於1968年至1974年重建，成為接待來自世界各地嘅外國政要訪問日本時提供住宿嘅迎賓館。
喺2009年，迎賓館赤坂離宮受指定為國寶，而家除咗接待外國貴賓之外，亦對一般民眾公開，可進入參觀。建議可於官方網站上預約參觀時間，週末假日等部分熱門時段可能參觀人潮會較多，提前預約者可優先入內參觀。
迎賓館赤坂離宮嘅本館同庭園嘅開放時間為上午10點至下午5點，最後入場時間為下午4點為止。參觀一次大約需要1個小時左右，入場費為成人1,500円、大學生1,000円、初高中生500円，12歲以下兒童可免費入場。
要特別留意嘅係，由於迎賓館赤坂離宮係日本政府接待外賓嘅官方場所，有可能會臨時變更時間或取消一般公開。為確保可以順利進入參觀，建議先行查一下迎賓館赤坂離宮官方網站上嘅行事曆，以確認開放日期。（每逢星期三為休館日，不作開放參觀）
相關資訊
- 名稱：迎賓館赤坂離宮
- 地址：〒107-0051東京都港區元赤坂2-1-1
- 交通方式：JR中央線、總武線、東京Metro地鐵丸之內線、南北線「四谷」站落車後徒步約７分鐘
赤坂Biz塔樓大廈
嚟到赤坂附近，當然唔可以錯過呢棟高聳嘅赤坂Biz塔樓大廈（Akasaka Biz Tower），樓高179.3米，係TBS赤坂5丁目開發計劃嘅一部分。可以話係繼富士電視台喺台場成功開發之後，跟進步伐嘅都市開發。
喺赤坂Biz塔樓大廈底下，有綜合設施「赤坂Sacas」，內有各式餐廳、商店，以及赤坂BLITZ、TBS放送大樓、赤坂ACT劇場等設施。
相關資訊
- 名稱：赤坂Biz塔樓大廈（Akasaka Biz Tower）
- 地址：〒107-6301東京都港區赤坂5-3-1
- 交通方式：東京Metro地鐵千代田線「赤坂」站出口直通
位於赤坂嘅餐廳
如果搵緊美食，咁赤坂有好多餐廳，提供各種料理任君挑選。今次就要為大家精選推薦一間壽司主題餐廳，以及相當特別嘅忍者用餐體驗！
赤坂忍者餐廳
呢間知名嘅餐廳係來自世界各地忍者愛好者嘅必訪景點。所有工作人員都穿著忍者服裝，除咗好似一般餐廳一樣接受點餐同上菜之外，仲會表演隱身忍術同魔術秀等。
忍者餐廳嘅獨特氛圍令人印象深刻，好似回到古代嘅日本城堡，其中安裝咗好多複雜嘅機關。餐點料理完美融合咗日式同西式美食，並加入少少忍者風味。
相關資訊
- 名稱：赤坂忍者餐廳（Ninja Akasaka）
- 地址：〒100-0014 東京都千代田區永田町2-14-3 赤坂東急Plaza 1Ｆ
- 交通方式：東京Metro地鐵銀座線、丸之內線 「赤坂見附」站落車後徒步約3分鐘
板前壽司 江戶
嚟到板前壽司 江戶，好似準備進入時光隧道，回到江戶時代。喺呢度嘅壽司用餐體驗不同於一般，進入主要用餐區之前，可以選擇換上浴衣。而當你行到去座位嘅時候，所有工作人員都會熱情且盡心接待你，給予你猶如皇室貴族嘅非凡享受！
廚師會喺賓客面前料理同準備各種魚生同壽司，所有魚貝類食材亦陳列展示供食客揀選。餐點價格合理，並有提供英文菜單，外國旅客都可以輕鬆點餐，建議嚟點一下無食過嘅新口味啦！
相關資訊
- 名稱：板前壽司 江戶（Itamae Sushi Edo）
- 地址：〒107-0052東京都港區赤坂3-9-2 No.R赤坂見附1F
- 交通方式：東京Metro地鐵銀座線、丸之內線 「赤坂見附」站落車後徒步約2分鐘
赤坂嘅酒店選擇
赤坂位於東京嘅市中心，係你喺東京旅遊嗰陣理想住宿地點之一。從赤坂搭車可以輕鬆方便前往東京各大主要地區，因此住宿喺赤坂嘅旅館會係一個好選擇。
東急赤坂卓越大酒店
東急赤坂卓越大酒店緊鄰東京Metro地鐵嘅赤坂見附站，交通便利。為住宿房客提供寬敞且可以好好放鬆休息嘅客房，設有免費Wi-Fi無線網絡，工作人員友善又專業，同時提供豪華嘅貴賓休息室同雪茄吧。
相關資訊
- 名稱：東急赤坂卓越大酒店（Akasaka Excel Hotel Tokyu）
- 地址：〒100-0014東京都千代田區永田町2-14-3
- 交通方式：位於「赤坂見附」站隔離
赤坂陽光酒店
赤坂陽光酒店鄰近赤坂站，同時距離東京中城（Tokyo Midtown）徒步約7分鐘左右，地理位置良好。赤坂陽光酒店係一間商務旅館，提供單人房、雙床房和三人房，不但適合一個人旅行嘅遊客，亦適合家庭旅客入住。所有客房均提供免費Wi-Fi無線網絡，並提供日式同西式自助早餐。
相關資訊
- 名稱：赤坂陽光酒店（Akasaka Yoko Hotel）
- 地址：〒107-0052東京都港區赤坂6-14-12
- 交通方式：距離赤坂站徒步約5分鐘
赤阪格蘭貝爾酒店
如果想稍微升級住宿旅館，可以考慮赤阪格蘭貝爾酒店，提供從單人房到高級雙人大床房等房型。並有都市套房等選擇，提供免費早餐同晚間可以欣賞美麗迷人嘅東京夜景。
相關資訊
- 名稱：赤阪格蘭貝爾酒店（Akasaka Granbell Hotel）
- 地址：〒107-0052東京都港區赤坂3-10-9
- 交通方式：距離赤坂見附站徒步約3分鐘
去赤坂嘅交通方式
要前往赤坂地區，最近嘅車站係東京Metro地鐵「赤坂」站同「赤坂見附」站。
赤坂站
赤坂站喺東京Metro地鐵千代田線沿線上，該線路貫穿日比谷、表參道、明治神宮前…等知名景點以及繁榮鬧區。
相關資訊
- 名稱：赤坂站
- 地址：〒107-0052東京都港區赤坂5-4-5
- 路線：東京Metro地鐵千代田線
赤坂見附站
赤坂見附站位於東京Metro地鐵銀座線同丸之內線沿線，乘搭呢兩條線路可前往新宿、澀谷、淺草、東京…等熱門景點，因此可便捷遊覽東京市區。
相關資訊
- 名稱：赤坂見附站
- 地址：〒107-0052東京都港區赤坂3-1-6
- 路線：東京Metro地鐵銀座線、丸之內線
Comments