唔知大家有無聽過人稱「樹海」嘅青木原呢？喺日本講起恐怖地方，點少得日本最出名嘅自殺地點！就係因為年年都好多日本人去青木原自殺，而又有太多唔能夠用科學解釋嘅怪異現象，青木原嘅神秘感同恐怖氣氛，都好吸引到鍾意恐怖嘢嘅朋友仔。今次就想同你分享２個有關青木原嘅恐怖故事。
「樹海」青木原 恐怖故事之一：千祈唔好亂行路
同你講故仔之前, 俾返啲背景資料你先。呢個故事喺分別2個網頁度睇到，而分別提供嘅資料都可以互補無提到嘅部份。不過整體嚟講, 都係同一個故事嚟嘅, 所以我哋就將主要嘅部份合併, 講呢個故仔俾你知。你係咪真係夠膽睇先？
喺1995年嘅夏天，有3個大學登山學會嘅男學生想去青木原探險。佢哋一早就計劃唔去行已經開拓咗嘅山路，諗住用自己嘅方法喺呢個森林冒險3日。
而其中一個男生因為有一位相熟朋友住喺河口湖，所以決定咗將森林冒險嘅事講咗俾嗰個朋友知。
「如果我哋第四日都無出到嚟，唔該你幫我哋報警，去搵返我哋出嚟吖，你會幫我哋㗎可？」
跟住，就做好哂心理準備進入滿佈樹海嘅森林深處喇。
可能因為佢哋無聽當地人建議同勸告，又可能行錯路盪失路，結果第四日真係無佢哋返出嚟嘅消息。
所以嗰位朋友仔就幫佢哋報咗警，好快警察就嚟到進行搜索行動。
喺搜索行動嘅第二日，救援隊搵到其中一個失蹤者。
但係嗰位失蹤者唔係企或者瞓喺度等待救援….
佢被發現嗰時係赤裸裸嘅，抱住棵樹，睇落個畫面好怪異。
當救援隊再行近啲，就見到位男生下半身前後移動，救援隊開始意識到佢做緊咩...
不過就算同佢講咩都好，男生仍然察覺唔到有人同佢講嘢，繼續佢做緊嘅行為。而且雙眼睇落好空洞，口水直流。
當救援隊拍佢膊頭，佢先有返意識，開始可以同人對話。根據佢所講，佢係遇到一位好靚嘅長髮女生，同個女生渡過咗3日。
咁即係話，佢頭先嘅失禮行為係同嗰位所謂嘅靚女……
無幾耐，救援隊又搵到多一個失蹤大學生。搵到佢嗰時佢係喺乾草上面瞓緊覺。
而根據救援隊講返當時大學生聲稱佢都同一位長髮靚女渡過呢段時間。以佢咁講，咁當時有可能係佢同長髮女生一齊瞓緊覺？
而第三位失蹤者，搵到嘅時候佢係吊喺大樹上，似乎係吊頸死的。無人知佢有無遇過嗰位長髮靚女….
而搵返嘅兩位男大學生，聽聞就算返到大學讀書都好，好似精神都好有問題,，經常要出入醫院。
當佢哋從樹海返嚟之後亦有流傳，聽到佢哋間唔中會講...
「小夏, 你特登過嚟搵我㗎？」
但當時佢哋講嘢嘅方向係無人㗎喎！定係，佢哋同緊一個無其他人見到嘅「人」講嘢呢…….
根據熟悉樹海嘅當地人所講，好似都好多人入咗呢個森林之後就算出得返嚟，都變得好奇怪。同埋建議真係最好跟山路，唔好亂行！假設你真係唔跟山路行，而又遇到人嘅話，最好有定心理準備......嗰個未必係一個「人」。
擇取自FC2網頁Chokowabanasi Blog同Tiki.ne.jp嘅私人Blog
---------------------------------
後記
無人知究竟嗰位長髮美女係一隻鬼定係啲咩，一隻吸人靈魂嘅怪獸？定係一個靠誘惑人類嚟延長自己壽命嘅巫婆…… 網上有好多唔同流傳。又有人話有一個遺留喺嗰度， 被Ubasute (姥捨て)殺死嘅老人，其實識得黑魔術?
有好多報道喺青木原搵到嘅屍體都係刻意咁做到好似自殺死咁。但當佢哋嘅屍體被發現時，所有證據都被拾荒者或者探險尋寶嘅人破壞咗。如果你真係要去樹海，千祈千祈唔好自己一個人去！一定唔可以唔跟路亂咁行。同埋最好喺天黑前就要離開喇。
你覺得呢個故事點呢？其實有關青木原嘅恐怖故事仲有好多，所以就分上下集去講另一個故事啦！但如果你對其他主題嘅恐怖故事，或者係鬼異嘅事、鬧鬼地方等等有興趣，都歡迎同我哋講㗎。
Comments