冬季東京之旅精選3大燈飾活動&保暖貼士

東京嘅冬季相當寒冷，出外一定要做好保暖工作。呢個時候有好多節慶活動，例如聖誕節、慶祝新年等，出門時建議採取多層次穿搭方法。冬天時嘅東京街頭，到處都可以睇到美麗嘅燈飾，其中位於東京Midtown、讀賣樂園、丸之內、澀谷嘅燈飾特別出名特別靚。

東京嘅冬天

東京嘅冬天，即使最高氣溫都唔超過10度，季風又強又凍。呢個時候嘅降雨量少、濕度低，空氣相對乾燥。晴朗嘅日子，可以睇到蔚藍澄淨嘅天空美景。呢個城市喺聖誕節同新年嘅時候特別熱鬧，有好多凈係得呢個時候先至可以體驗得到嘅特色活動。

當強烈冷氣團來襲、低氣壓接近嘅時候，甚至連東京市中心都會落雪。通常，東京每次落雪只係得短短幾日，但有時候冰雪令路面凍結。出發前唔好唔記得查一查天氣預告，因為有時候，落雪嘅日子會令人容易滑倒受傷，亦會造成交通癱瘓。

由於東京11月份嘅平均氣溫只係得攝氏15度左右，連日頭出門都需要著上長袖同毛衣。呢個時候幾乎唔多落雨，季風都唔係好強，正係適合展現時尚嘅完美天氣。但係，太陽落山後就會變得好凍，如果夜晚要外出，最好穿上保暖嘅外套。

從12月份開始到年底，天氣會越來越嚴寒。平均溫度約10度，最低溫嘅時候會感到刺骨凍寒，所以室內一定需要開暖氣。早晚則要穿上保暖衣物，例如羽絨衣等。

早從11月份起，六本木就開始慶祝聖誕節。位於六本木嘅一座大型商業設施・東京中城嘅周圍會設置好多燈飾。開放式草坪廣場上嘅燈飾特別受到注目。呢個係一個非常熱門嘅燈飾活動地點，當參觀人潮眾多嘅時候，會進行入場人數限制，因此需要預留多一啲時間去遊覽。

丸之內嘅燈飾活動於每年11月到2月之間舉行，距離東京車站只係幾步之遙。在喺呢條氣氛優雅、各國名牌精品店林立嘅街道兩旁，裝飾咗美麗嘅燈飾。街道上仲有好多餐廳同café，可以一邊用餐一邊欣賞燈飾。

呢個係澀谷非常受歡迎嘅燈飾活動。通往代代木公園嘅街道，搖身一變，變成咗藍色燈海，奇幻又絢爛。因為實在太浪漫，會令人忍唔住想影低呢條藍色隧道，並分享到社交網絡上面。燈飾地點位於澀谷，所以好多年青人、學生同觀光客都會前來觀賞。

讀賣樂園係一座距離新宿25分鐘電車車程嘅主題樂園，喺呢度可以玩過山車以及欣賞動物表演。冬季嘅燈飾係一場大型活動，多達500多萬粒燈泡將園內裝飾得五彩繽紛。喺日本國內亦屬於高人氣嘅燈飾活動。

由東京搭電車30分鐘就到達嘅橫濱港未來。全長約1.5公里嘅區域都會有閃閃生光嘅熣燦燈飾。而係橫濱美術館附近嘅「美術之廣場」仲設有特別嘅鋼琴，只要彈呢個鋼琴，就會有燈光配合，同音樂一齊表演！

而喺Landmark Plaza就會有巨型嘅聖誕樹登場。直至12月25日，每逢星期六日，每日都會有兩次白雪飛舞嘅夢幻燈光表演。