歡迎大家繼續收睇【驚慄・奇幻系列】！較早前，我哋就介紹咗日本盂蘭盆節（お盆、Obon）以及日本人喺呢段期間會做嘅習俗。隨著魂魄從另一個世界返到人世，一眾多怪異現象亦隨之出現…廢話唔多講，馬上就等我哋嚟一探究竟啦！
前情提要：
千萬要記得為先人點燃「迎靈火」！
呢個故事係我從我打工同事聽返嚟嘅…
暫且先稱呼呢位同事叫做A小姐吧。喺某一年嘅盂蘭盆節時期，A小姐收到一通來自警局嘅電話。
警察喺電話裡頭同佢講：「妳阿嫲走失咗，唔記得屋企地址。我哋無辦法將佢送返妳屋企，請問妳可以嚟警局接佢嗎？」
A小姐大感震驚，因為佢嘅阿嫲喺前一年已經過咗身！佢將呢件事話畀屋企人聽，屋企人都嚇咗一跳。事後先發現原來係因為有人唔記得點燃「迎靈火」（避免先靈於盂蘭盆節第一日夜晚返屋企時迷路，而於自家門前點燃嘅火種），迎接阿嫲嘅靈魂，於是一家人馬上點燃返「迎靈火」。
當佢咃再打返去警局時，警察就話：「喔，佢好似啱啱又記起屋企地址，已經自己行咗返去囉。」
自此，A小姐一家人每年一到盂蘭盆節時期，都會記得點燃燈火，引領祖先回家嘅路。
以上係一則帶點靈異，但又唔太可怕嘅奇怪故事。
故事內容來自Chikatomo (ちかとも)
---------------------------------
故事主人翁阿嫲前一年啱啱過身，所以嗰次盂蘭盆節或者正因為係佢嘅「初盆」（第一次盂蘭盆節），所以屋企人就忘記先人於門前點「迎靈火」或擺放白燈籠（部分地區亦會有擺放白色燈籠嘅習俗）所致…
接落嚟，就等我哋繼續講其他故事吧...
來自山上嘅靈異發光物
繼續都係要同大家分享一則發生於盂蘭盆節嘅靈異故事，一則由故事主人翁曾祖母所親身經歷嘅故事。曾祖母屋企就喺隔離山上，有一晚，佢突然急著要去廁所，就走到前廳。而由於當時所住嘅屋企仲未有電，周遭完全係漆黑一片、伸手不見五指，因此佢必須等到眼睛完全適應黑暗先敢開始走動。突然佢往山上望去，望見有一個東西喺到發光。嗰一團發光體時而飄動、時而從山坡上滾落，佢雖然一邊覺得奇怪，但又因為尿急，只好趕快衝去廁所。就喺解決「急事」、行返房間嘅途中，佢又再次望上山頭。今次，竟然有無數光團從山上飛過嚟！呢個時候，佢先意識到，發光物就係「鬼火」（ひとだま、Hitodama）！。
聽講曾祖母認為「鬼火」係佢嘅祖先，於是即場雙手合十、拜祭祖先。
故事內容來自山上恐怖故事(山の怖い話)
唔單只要遠離海洋川流，深山野嶺都絕對唔可以亂去！
話說曾經喺某一年嘅盂蘭盆節，有一個男人跑到山形縣・秋田縣嘅鳥海山登山。登山途中，佢同兩個登山健行嘅人擦身而過，就喺嗰一剎那，突然佢聞到一股令人想作嘔嘅惡臭。佢於是轉頭想要望望啱啱嗰兩個人，但係竟然完全唔見人影！短短兩秒鐘，兩人居然消失得無影無蹤…
佢諗返起啱啱嗰幕，驚覺有少少「唔對路」。事關正值盛夏時期，嗰兩個人居然著住冬天登山服裝…。佢不禁懷疑嗰兩個人應該係係喺冬天時嚟爬山，但喺山頭迷路，最後死喺呢個山區…
最後佢選擇迅速跑落山，沿途跌跌撞撞，臉色整個蒼白。而且，從嗰晚開始，佢就一連發咗三日高燒，更被逼要送入醫院！
故事內容來自2ch (2ちゃねる)
老舊大樓大閘竟然自己打開…？
我唔相信有鬼嘅存在，但我曾經經歷過一次奇怪體驗。
故事大概發生喺四年前。
嗰時我住喺神戶，喺一家保安公司打工。
當年嘅盂蘭盆節，我咁啱要返夜更。返工時，收到一通電話打嚟話「新起好嘅大樓前門門禁系統有啲奇怪」，於是我就同一齊返夜更嘅前輩去睇吓到底發生咩情況。
我心諗，或者係小偷吧？係小偷的話，都無算特別吖。
而且據附近居民所述，嗰道門有時都會自己打開。所以可能係門禁系統故障？
我哋去到檢查後發現一切正常，
正當我哋討論要打電話畀電力公司時，就聽到後方傳來一聲巨響。
我哋立即轉身，但發現眼前就只有嗰道門，無自動上鎖、亦無任何人喺到，但好肯定嘅係巨響係從門方向傳嚟。
我哋不禁心裡一寒，而呢個時候又響起三聲嗶嗶聲，宛如機器嘅聲響。
「喂，你睇吓！」前輩突然大叫一聲，我哋望向門禁系統管控嘅大門，門禁系統顯示著「302」，表示有人輸入某間住家門號，所以道門就自己打開。
嗰一刻，我感到一陣寒意，因為當時除咗我同前輩以外，真係完全無其他人喺現場。
到咗第二日，我仍然好想知道到底係邊個住喺302，於是就去翻查住戶資料。
但後來發現302既無人租梗，亦無人住，302根本無任何人！
過咗幾日後，前輩話我聽佢知道邊個住過302—
原來喺大廈起好之前，的確有人住過喺302，但舊址因為一場大火燒毀，而住客亦死於火場之中。
或者，嗰個人就係喺盂蘭盆節期間，突然好懷念佢曾經住過嘅老家，所以返嚟行吓…
故事內容來自恐怖故事館 (怖話ノ館)
---------------------------------
日本嘅大廈通常都會裝設門禁系統，當訪客要探訪住戶時，只需按下要探訪嘅人所住嘅門牌號碼，就可以請對方開門。
但係故事當中，到底係邊個撳咗門牌號碼？又係邊個將道門打開呢...
請期待下次文章刊登…
以上同大家分享咗幾個發生喺日本盂蘭盆節時期嘅故事，大家覺得點樣呢？我哋以後仲會刊登更多日本恐怖神秘相關文章，有興趣嘅朋友記得唔好錯過！
Comments