東京嘅春天雖然係3至5月，但實際嘅天氣會因每個月變化而有所不同。3月雖然仲係需要穿大衣禦寒，但4月氣溫就會逐漸上升，而5月已經可以著短袖。服裝時尚亦因實際天氣狀況而有所調整。賞櫻、三社祭、兒童節淺草嘅鯉魚旗等等，係可以讓外國觀光客享受好多有趣活動嘅季節。
東京春天嘅特色
雖然日本四季各有風情，但春天係特別受歡迎嘅旅遊季節。因為天氣漸漸暖和起來，係最適合出外行下嘅日子。喺日本，四月係學校嘅新學期，企業亦開始咗新嘅會計年度，好多事情都全新展開，街上嘅氛圍亦感覺變得明朗。
3月天氣
日本冬天嘅平均氣溫喺10度左右，空氣變得非常乾燥，3月上旬嘅東京，仍然好似冬天一樣寒冷。呢段時間，落雨嘅話會覺得凍，有時仲有可能落雪。到咗3月下旬，櫻花就會開始綻放。即使係咁，氣溫都只係得13度左右，喺出面需要穿上大衣，喺房間都需要開暖氣。
4月天氣
你可以感受到「春天真係來臨」。平均氣溫大約19度，朝早都唔再需要著大衣。４月嘅降雨量亦比較低，可以好好享受外出嘅樂趣。櫻花嘅花瓣，4月上旬左右就會開始飄落。不過，凋謝嘅櫻花花瓣喺風中飛舞，創造出美麗嘅景色，喺日本人當中非常有人氣。
5月天氣
5月係東京觀光嘅絕佳季節。平均氣溫上升至23度左右，朝早只係需要著一件短袖就夠。放晴嘅日子亦可以感受到陽光嘅溫暖，建議可以喺公園悠哉咁度過。需要注意嘅係，喺日本有一個「黃金週」嘅假期，喺4月下旬到5月初。呢段時間會有好多日本人都去旅行或購物，所以觀光地嘅大眾交通會非常擠迫。如果黃金週有想睇嘅活動，建議事先查一下資訊。
東京春天舒適嘅服裝選擇
賞花時期穿著溫暖嘅服裝
因為東京春天嘅天氣變化大，服裝亦依照實際狀況嚟準備。3月初仲係有啲凍，需要準備同冬天一樣嘅外套。即使到咗3月下旬，無出太陽嘅話就會仲係感覺到凍。賞櫻嗰陣記得著暖和一啲再出門。一旦到咗４月，氣溫會開始上升，漸漸就唔再需要大衣類嘅冬季服裝。放晴嘅日子外出嘅話，一件長袖就非常足夠。太陽落山後氣溫會下降，建議帶多一件外套傍身。
5月左右穿著薄上衣就OK
5月份因為氣溫上升，只要郁一下身體就可能會流汗。服裝方面，薄上衣就好足夠，亦有人會著短袖。因為日照強，帽同太陽眼鏡都必須準備好。柏油路遍布嘅東京，地面上嘅日照反射強，太陽猛烈嘅日子，小朋友中暑嘅機率較高。所以建議多多補充水分。
東京春天活動 感受日本傳統
東京鐵塔：333隻「鯉魚旗」
5月5日係日本嘅「兒童節」。呢一日會食和菓子嘅柏餅、擺設盔甲。好多地方會掛起「鯉魚旗」，呢個係從以前到而家嘅習俗，祈求細路仔健康長大，將畫有鯉魚圖案嘅布掛喺空中。東京嘅觀光地「東京鐵塔」，以鐵塔嘅高度333公尺嚟命名並舉辦「333隻鯉魚旗」活動。眾多嘅鯉魚旗喺空中飄揚，景色非常壯觀，好適合家庭旅遊。
三社祭
所謂嘅三社祭，係喺東京市中心嘅淺草，於5月第三個禮拜嘅週末舉行，係一個傳統祭典。因眾人一同抬神轎、有活力嘅姿態而聞名，喺呢個祭典，會有三個神轎登場，大家節奏一同喺街上遊走。有活力咁抬轎嘅姿態稱為「粋(iki)」。神轎搖晃得越激烈，代表世上會變得更美好，因為有咁樣嘅講法，每年都會招攬好多觀光客前往。當日非常擠迫，注意唔好同同行嘅朋友走散。
上野櫻花祭
日本人非常鐘意賞櫻花！一邊賞櫻花一邊同屋企人或者係朋友食下嘢飲下酒。上野公園有一條非常出名嘅櫻花步道，呢個區域會聚集大量人潮，享受賞櫻樂趣。賞花無固定格，準備自己鐘意嘅食物或飲品，依照自己嘅諗法進行，自己開心就得。輕鬆愉快同坐喺隔離嘅人搭話都唔錯。傍晚開始會有啲凍，小心唔好感冒。
肉料理節
東京係一個每個禮拜會舉辦好多活動嘅城市。喺黃金週期間嚟旅行嘅話，記得到台場舉辦嘅肉料理節睇睇啦。肉料理節係喺戶外舉辦嘅活動，可以品嚐到各式各樣嘅肉料理，會場有好多店家攤販林立。可以食到嘅料理有牛排、日式炸雞、壽司、餃子等等，使用嘅肉類有牛、雞、羊、豬等等。另外，仲有喺度先至食得到嘅限定版豪華菜餚，係一個可以自由入場嘅美食活動。
Comments