歡迎大家收睇FUN! JAPAN嘅日本驚慄&奇幻系列。今次我地嚟講日本嘅盂蘭節（又叫盂蘭盆節，日本為「お盆」）。呢篇文章我地會揭開有關日本盂蘭節嘅神秘面紗，探究佢嘅起源同埋現代日本人過盂蘭節時嘅習俗同準備。
日本盂蘭節（お盆、Obon）即係？
お盆（Obon）或盆（bon），本身字面上嘅意思係，類似托盤一樣平坦嘅容器，可能大家都聽過，將植物種喺器皿入面，稱為盆栽（盆栽、bonsai）。但お盆（Obon）亦指「日本盂蘭節」，即係香港稱為嘅「鬼節」。喺日本嘅盂蘭節期間，日本人會表達對祖先嘅懷念同敬意。呢個日本盂蘭節嘅習俗，係源自邊度呢？
起源：佛說盂蘭盆經，宴請餓鬼
佛說盂蘭經是係一則大乘佛教嘅經文，經文內容描繪咗目連（釋迦牟尼佛嘅大弟子）同釋迦牟尼佛之間嘅對話，對話係關於目連聽從佛陀指示，解救已故母親脫離餓鬼道嘅苦難。佛陀指示目連要喺7月15日滿月之日，供養十方大德眾僧，而嗰時就係大乘佛教正逢夏日靜修結束。
融入中華文化
佛說盂蘭盆經，梵名Ullambana Sutra，又稱盂蘭經。喺香港嘅盂蘭節已經演變成鬼門關大開嘅日子，所以儀式唔單止藉由供養眾僧，借助功德普渡，而係直接普渡眾生靈魂。「お盆」係指扁平盆狀，用嚟裝食物嘅容器。好巧妙咁將「盆」字融入咗祭祀活動之中。
小小觀察：上座部佛教亦有類似故事，故事發生喺鬼節，描述人物係舍利弗（釋迦牟尼佛嘅另一個弟子）。而中國農曆和其他陰曆嘅週期間時有唔同，同樣係鬼節，喺唔同地方嘅年歷裡面，最早係7月，最遲係10月會慶祝。雖然祭祀普渡嘅日子唔同，但精神不變，都係靈魂返咗人間，喺人世間嘅人就提供食物嚟普渡佢地。
探討日本盂蘭盆節
中國文化喺奈良時期傳入日本，後來到平安時期日本結束咗同中國嘅交流，開始發展自己嘅文化。而盂蘭盆會縮寫成「お盆（Obon）」或盂蘭盆節。原本舉辦期間係於農曆7月15日左右，但到咗明治6年（1873年）採用咗西曆之後，計算日子嘅方式有變，所以好多地區都變成喺新曆嘅8月15日左右舉辦盂蘭盆會，亦有啲地方，例如東京，就直接喺新曆嘅7月15日舉辦盂蘭盆節。
日本人喺盂蘭盆節期間會做啲乜？
正式嚟說，靈魂會喺盂蘭節嘅第一日回到人世。所以喺鬼月嘅1號，稱之為鬼門開，地獄嘅大門開啟，日本嘅講法係叫「地獄嘅大釜蓋子揭開」，所以鬼月嘅第一日稱為「釜蓋朔日（釜蓋朔日、かまぶたついたち、kamabutatuitachi）」。由於靈魂會穿越海洋、山脈、河流等許多通道，日本人仲有一種說法，就係呢期間不要去海洋、池塘、湖泊、河流附近。
七夕，原本亦係日本盂蘭節嘅一部分
盂蘭節融入咗神道同日本社會，所以可以觀察到，神道儀式中亦有同盂蘭節有關嘅事物。神道儀式中，有一位巫女喺7月7日用織紉機（たなばた）編織出特別嘅衣裳，用於盂蘭時期，係呢段期間供養祖先，感謝豐收。
而織女穿針乞嘅故事喺日本江戶時期開始流行，大家發現織女嘅故事同巫女縫紉衣裳都喺同一日。所以將兩者融合成為咗日本嘅七夕。七夕嘅詞發音就係來自日本織紉機嘅發音（たなばた、tanabata）。
不過而家大多數日本人都會喺新曆8月先舉行盂蘭節，所以七夕同盂蘭節兩個活動獨立咗，但仍然依舊沿用相同嘅節日名稱。
迎靈火、送靈火同祭祀普渡
日本喺鬼月嘅13日傍晚，會點燃迎靈嘅火焰（迎え火、Mukaebi），同提供食物普渡鬼魂。供奉嘅食物會有白玉丸子、素麵、同埋夏天當季食材（例如茄子、青瓜等），仲有將茄子同青瓜整成牛同馬嘅造型，迎送祖先。甚至會有人製咗成隻專裝滿食物嘅小船。同中華文化最唔同嘅係，日本人並無焚燒衣紙或者紙紮供品嘅習俗。
送靈火嘅前一日稱為「中日」，日本人會去掃墓拜山，然後喺第二天日燃點送靈火（送り火、Okuribi）或獻上盆舞（盆踊り、boodori），由日頭一路舉辦到夜晚，歡送祖先返去另一個世界。如果呢段時期去京都，就可以見到出名嘅五山送火（五山送り火）。
初盆
日本仲有另一個傳統介紹，就係對剛過身嘅人來講，第一個盂蘭節會有特別禮儀。喺過咗後49日過後迎接嘅第一個盂蘭節，日本稱之初盆（初盆、はつぼん、hatsubon）或新盆（新盆、にいぼん、Niibon），通常會喺西方入口、祭壇或墳墓，掛上白色燈籠，指引先人歸家嘅路。
有興趣閱讀更多？
關於日本驚慄＆奇幻系列，仲有好多有趣話題同恐怖故事，將陸續介紹畀大家。若果有某啲日本故事或者傳說想深入探究，歡迎留言畀我地。
Comments