銀座係東京數一數二嘅著名觀光勝地。大街上唔只林立著世界頂級品牌嘅日本旗艦店、高級百貨公司、世界各地產品雜貨店等，仲有一個可以欣賞歌舞伎等日本傳統表演藝術嘅劇場以及眾多展示前衛藝術品嘅藝廊，可謂一個完美融合傳統與現代文化嘅迷人地區。
關於銀座
銀座位於東京市區東側，以由東北延伸至西南嘅「銀座通」與由西北延伸至東南嘅「晴海通」兩者嘅交叉點為中心，沿路上遍佈多間購物設施及餐廳。
銀座一般會被區分為一丁目到八丁目，銀座一丁目通往東京車站；而八丁目則通往新橋站與汐留站。
銀座推介購物景點
銀座擁有非常豐富嘅購物景點，例如購物商場、百貨公司、高級名牌店、雜貨店等等。以下編輯部就要為大家介紹精選推介購物景點。
| 名稱 | 特色 |
| GINZA SIX | 銀座地區規模最大嘅商業設施 |
| UNIQLO銀座店 | 全球最大規模嘅UNIQLO旗艦店 |
| 東急PLAZA銀座 | 銀座地標之一 |
Ginza Six
「GINZA SIX」係一座位於銀座六丁目嘅複合型商業設施。喺呢棟商業大樓內，您可以搵到世界頂級品牌、日本料理餐廳與時尚品牌聯名咖啡廳等多元化商舖。
云云商舖當中值得特別推介嘅，就有位於6樓嘅「銀座大食堂」。約1,100平方米佔地內進駐著壽司、天婦羅、燒雞肉串等等7家日式料理知名餐廳。
購物之餘，您亦可順便去埋銀座最大嘅屋頂花園「GINZA SIX花園」。寬廣庭園佔地約4,000平方米，遊客就算身處大城市內亦有機會享受大自然感覺，係東京內難得一見嘅療癒放空景點。
另外，商場內針對遊日外國旅客嘅服務更加係相當完善。一樓旅客服務中心提供旅遊資訊、免稅手續、外幣兌換以及行李寄存等服務。同場仲有一家賣手信嘅便利店𠻹！
景點資訊
- 景點名稱：GINZA SIX
- 地址：〒104-0061東京都中央區銀座6-10-1
- 交通方式：東京地鐵銀座站A3出口徒步約2分鐘
- Wi-Fi：有
- 語言：中文、英文、韓文
- 信用卡：可以使用VISA、MasterCard、JCB、AMERICAN EXPRESS、Diners Club International
UNIQLO銀座店
「UNIQLO銀座店」係全球最大規模嘅UNIQLO旗艦店。建築由1樓到12樓全部都係清一色UNIQLO，商品種類堪稱世界上最齊全！
旗艦店內長年擺滿最新嘅當季單品，而「UT」專屬樓層內就則匯聚著世界各地動漫角色合作嘅聯名T恤（「UT」為UNIQLOT恤品牌名稱）。
UNIQLO銀座店亦會不時舉辦特別活動，例如係潮流提案、又或與雜誌動漫合作企劃等等。
店內當然唔少得為外國人而設嘅貼心購物環境啦！所有樓層收銀櫃檯都提供免稅手續，而且仲有多達20幾個唔同國籍嘅員工為您服務𠻹！（資訊截至2018年11月）
景點資訊
- 景點名稱：UNIQLO銀座店 (ユニクロ銀座店)
- 地址：〒104-0061 東京都中央區銀座6-9-5
- 交通方式：東京地鐵銀座站A2出口徒步約4分鐘
- Wi-Fi：無
- 語言：中文（簡體字）、英文、韓文
- 信用卡：可以使用VISA、Master Card、JCB、Diners Club International
東急PLAZA銀座
銀座地標「東急PLAZA銀座」係一座備受注目嘅購物中心。其建築外觀以東京傳統工藝品「江戶切子」切割玻璃為設計主題。
除咗世界知名時尚及化妝品品牌以外，商場內仲有唔少精選品牌店舖進駐；而8樓及9樓則有市區型機場免稅店「樂天免稅店」。
東急PLAZA銀座一樓設有銀座旅客諮詢中心，為遊客提供銀座地區旅遊資訊、各種地圖以及各國語言導覽小冊子。小冊子以英文為主，部分資料更備有中文（繁體、簡體）、韓文、意大利文、德文、法文、西班牙版本。
景點資訊
- 景點名稱：東急PLAZA銀座(東急プラザ銀座)
- 地址：〒104-0061 東京都中央區銀座5-2-1
- 交通方式：東京地鐵銀座站C2・C3出口徒步約1分鐘
- Wi-Fi：有（G Free）
- 語言：英文
- 信用卡：可以使用VISA、MasterCard、JCB、American Express、Diners Club International、UnionPay
銀座百貨公司
銀座又點會只得購物商場呢？銀座內多間百貨公司都坐擁世界知名時尚品牌及生活雜貨店，地下食品樓層仲有日本國內外精選食品及各地著名手信甜品等您大買特買！
數到銀座地區內最著名嘅百貨公司，就必定係「銀座三越」、「和光」同埋「松屋銀座」。 銀座三越以及松屋銀座都有為遊客提供銀座地區嘅外語旅遊小冊子。
LOFT、東急HANDS等銀座生活雜貨店
銀座內亦有多間大型生活用品雜貨店，由室內裝飾用品、食品至專業人士使用嘅工具等等日本製產品都一一可以喺到搵得到。
「銀座LOFT」與「東急Hands銀座店」商品種類非常廣泛，例如化妝品、文具、服飾用品、餐具等都應有盡有。商品價位最平由幾百日圓起跳，因此合理價格亦係遊客至like嘅特色之一。
而文具用品、和風雜貨專賣店方面，編輯部就特別推薦文具專門店「銀座伊東屋」或日本紙製品專賣店「銀座鳩居堂」！
銀座推薦觀光景點
嚟到銀座，只係爆買shopping就未免太單調，因為銀座內仲有更多觀光景點值得您參觀！以下將為大家介紹區內可以欣賞日本傳統表演藝術嘅地方，以及其他商店、藝術空間等景點。
| 景點名稱 | 特色 |
| 歌舞伎座 | 歌舞伎專門劇場 |
| Ginza Graphic Gallery | 免費向遊客展出日本及國外藝術家作品嘅藝術設施 |
| 中央通 | 銀座主要大街，白晝夜晚各有唔同風情 |
歌舞伎座
歌舞伎座係一座專門表演日本傳統藝術「歌舞伎」嘅劇場。建築物採用和風外觀，以瓷磚製成嘅屋頂屬一大特色。
歌舞伎座每日會上演兩場歌舞伎表演，午晚劇目各有不同。遊客必須預約先能夠完整觀賞每一幕表演，票價根據座位不同，價格從4,000日圓到20,000日圓不等。
如果想更彈性安排行程，我哋建議您可選擇購買當日票、只觀賞一幕表演。只包括一幕座席嘅門票「一幕見席」以先到先得方式發售，一般會喺演出開始前約30分鐘到1小時內販售。重點係票價非常親民貼地，票價由500日圓到2,000日圓不等。（資訊截至2019年11月）
溫馨提示，遊客喺任何座位上都可以租用附設英文解說嘅語音導覽服務㗎。
景點資訊
- 景點名稱：歌舞伎座
- 地址：〒104-0061 東京都中央區銀座4-12-15
- 交通方式：東京地鐵銀座站A6出口徒步約5分鐘
- Wi-Fi：無
- 語言：英文
- 購票方式：網路購票、現場購票
- 信用卡：可以使用VISA, Master Card, JCB / 不接受用信用卡（當日券）
Ginza Graphic Gallery
Ginza Graphic Gallery是一個位於銀座7丁目、專門經營圖形設計嘅藝術畫廊。設施會定期免費公開展出來自日本及國外嘅藝術家作品。
館內亦會舉行藝術家講座及演講活動，為遊客提供了解圖形設計相關知識嘅機會。
景點資訊
- 景點名稱：Ginza Graphic Gallery (ギンザ・グラフィック・ギャラリー)
- 地址：〒104-0061 東京都中央區銀座7-7-2 DNP銀座大樓1F
- 交通方式：東京地鐵銀座站A1出口徒步約5分鐘
- Wi-Fi：無
- 語言：英文
銀座中央通
銀座中央通為銀座主要街道。白天時擠滿前來購物及用餐嘅群眾，入夜後氣氛則截然不同， 由舖頭燈光為城市增添光彩，形成一幅璀璨堂皇嘅城市美景。
尤其係冬季期間，銀座中央通更會於入夜點燈，大至高級名店、小至街上雕刻紀念碑等，整個街區屆時將變成絕佳打卡景點。
景點資訊
- 景點名稱：銀座中央通
- 地址：〒104-0061 東京都中央區銀座
- 交通方式：東京地鐵銀座站徒步即達
- Wi-Fi：有
- 語言：英文
- 信用卡：可以使用VISA, MasterCard, JCB, American Express, Diners Club International（依店家而異）
銀座周邊觀光地區及景點
一場嚟到銀座，不妨預多啲時間將周邊地區都一網打盡。銀座毗鄰多個區域，全部都係徒步即可到達，非常方便。
以下我哋將介紹銀座周邊地區嘅特色及推薦景點。
| 東京車站周邊 | 日比谷 | 築地 |
| 有樂町 | 新橋 | 汐留 |
東京車站周邊
東京站距離銀座站僅約15分鐘步行路程。東京站係當地一個巨型轉運站，車站建築充滿特色。
JR車站內及地下街雲集多間日本料理食肆，例如拉麵、壽喜燒、壽司、蕎麥麵都一一可以喺站內品嚐得到。另一方面，站內日本手信舖及服飾用品店亦琳瑯滿目，特別係「東京站一番街」以及「GRANSTA MARUNOUCHI」，更加人潮絡繹不絕嘅超人氣舖頭。
東京車站附近仲有放置噴泉及瀑布等紀念碑嘅「和田倉噴水公園」、收藏並展出西方藝術品嘅「三菱一號館美術館」等景點。
日比谷
遊客從銀座站步行約10分鐘即可到達日比谷。日比谷內眾多購物及觀光景點，想要購物或用餐的話，「Hibiya Chanter」(日比谷シャンテ)與「日比谷東京中城」(東京ミッドタウン 日比谷)就係兩大重點推介。
著名觀光景點方面，想要欣賞橋樑、櫓等歷史遺跡的話，您可以考慮「皇居外苑」；想要欣賞全女班歌劇表演的話，則推薦「東京寶塚劇場」；日本第一座現代西式公園「日比谷公園」亦係不容錯過嘅休閒好去處。
有樂町
有樂町位於銀座旁邊，步行約5分鐘即可到達，區內林立眾多購物設施。與銀座相比，有樂町內有更多走休閒風格嘅店舖。
例如「ITOCIA」，就係一座綜合型商業設施，從時尚服飾店、生活雜貨店到戲院、柏青哥等娛樂設施都一應俱全。同區仲有以時尚為主嘅「LUMINE 有樂町」、販售各式家電用品嘅「BIC CAMERA」，以及匯集日本各地特產及美食嘅「東京交通會館」等等。
築地
築地位於銀座南側，距離銀座約15分鐘步程。
提起築地，最受歡迎嘅景點非築地場外市場莫屬。遊客可以喺市場內搵到多種海鮮或加工食品，仲可以即場品嚐壽司或丼飯。由於築地市場以前曾係東京數一數二嘅繁華漁市場，遊客現時有機會喺場內參觀漁獲拍賣及專業漁獲交易。
除咗漁市場，附近一座以印度古代佛教風格為設計藍本嘅「築地本願寺」亦係必睇景點。
新橋
新橋距離銀座約10分鐘步程，屬東京數一數二嘅寫字樓地區，車站周圍林立著一幢又一幢辦公大樓。
亦因為如此，新橋區內開設咗多間餐廳，當中不乏居酒屋或定食等價格親民貼地嘅醫肚選擇。
汐留
汐留從銀座徒步約15分鐘即可到達，與新橋同屬寫字樓地區，但同時亦有唔少購物中心及觀光景點。
購物設施方面，汐留內有「Caretta汐留」、「Pedi汐留」及「汐留SIO-SITE」等商場。所有設施都有多間服飾店、生活雜貨店以及餐廳進駐其中。
其他著名景點，仲包括歷史可追溯至17世紀嘅「濱離宮恩賜庭園」及「電通四季劇場」等。遊客可於「電通四季劇場」內欣賞到世界上最大型嘅歌劇表演劇團。
銀座美食與餐廳
購物以外，銀座亦係東京內著名嘅美食天堂。由使用高質新鮮食材嘅壽司店，以至拉麵、居酒屋、燒雞串等人氣平民美食都應有盡有、種類繁多。當然，您亦可以喺銀座內搵到咖哩等各國美食啦！
而本文，編輯部就要為您以下多個值得bookmark嘅美食類型及餐廳。
- 壽司
- 日本料理
- 拉麵
- 牛排、肉料理
- 居酒屋
- 早餐、午餐
- café、甜品
銀座壽司店
銀座內壽司店林立。大部分壽司店都屬於吧檯式小型餐廳，但亦不乏米芝蓮星級名店以及明星藝人都會幫襯嘅高檔餐廳。
午市一般價位大約為5,000至8,000日圓，而晚餐時段人頭預算則最低都要大概10,000日圓，平均價格約為30,000日圓。（資訊截至2019年11月）
唔使擔心，銀座內一樣有價格相對比較經濟實惠嘅壽司餐廳，而其中一間就係「銀座久兵衛」。想要嘗試價位較高嘅，推薦名單則有「銀座ONODERA」(銀座おのでら)、「銀座IWA」(銀座いわ)以及「數寄屋橋次郎」(すきやばし次郎)。
銀座日本料理店
銀座內有多間可以食到懷石料理、天婦羅及炸豬排等日本料理嘅名店。想食炸豬排的話，編輯部就會為您推薦「銀座梅林」；想食天婦羅的話，「天婦羅山之上 銀座」（てんぷら山の上 Ginza）就係不俗選擇。
想要品嚐懷石料理的話，您可以前往獲米芝蓮星級認證嘅「銀座奧田」、「銀座一二岐」（ぎんざ 一二岐餐廳），或「銀座小十」。
一餐炸豬排預算大約3,000日圓；而天婦羅、懷石料理嘅午市價位，就大概需要10,000日圓以上。晚市費用會更高，一般由20,000日圓起跳。（2019年11月資訊截至）
銀座居酒屋
如果想要以貼地方式享用日式料理，居酒屋就係您嘅最佳選擇。嚟到居酒屋，您唔單只可以食到炸豬排串燒、shabu shabu、烤魚，仲可以同場試埋日本酒等當地清酒。單點一份料理嘅價錢大概由幾百日圓到一千日圓不等。（資訊截至2019年11月）
順帶一提，銀座居酒屋大多集中於東京Metro「銀座站」或東京Metro「銀座一丁目站」附近。
銀座拉麵店
銀座拉麵店眾多，店舖大多集中於數寄屋通、三原通以及東銀座站前。與銀座其他餐廳相比，拉麵店價格並唔算太貴，大約850到2,000日圓就可以食到一碗。（資訊截至2019年11月）
編輯部推薦拉麵店有米芝蓮指南「必比登推介」評選嘅「銀座 篝 本店」、「麥子與橄欖 銀座店」（むぎとオリーブ 銀座店）。「烤飛魚鹽味拉麵 高橋 銀座店」（焼きあご塩らー麺 たかはし 銀座店）、「銀座 風見」等亦係唔錯嘅實力分子。
銀座牛排店、肉料理店
如果您想喺銀座內享用牛排或肉類料理，不妨去區內嘅鐵板燒或牛排餐廳。
遊客可以喺鐵板燒餐廳享用到肉類套餐，午市價位大概為5,000到15,000日圓；晚市價格則大概為20,000日元左右。（資訊截至2019年11月）
鐵板燒同牛排嘅推薦餐廳，有獲得米芝蓮兩星評價嘅「銀座UKAI亭」(銀座 うかい亭)以及「DONS de la NATURE」(ドン・ナチュール)。另外，您亦可以喺「牛庵」或「Bifuteki Kawamura東京銀座店」(ビフテキのカワムラ 東京銀座店)以合理價錢就食到高質料理。
銀座早餐、午餐
銀座內嘅餐廳唔單只會經營晚市，有唔少店舖其實亦有提供早餐及午餐。
例如，如果您想喺銀座食早餐，酒店或café就係兩大選擇。如果去酒店，您可以揀日式或西式料理自助餐放題或套餐。酒店早餐時段一般於朝早6:30就開始，對部分遊客嚟講絕對係一大福音。
另一方面，銀座café則係您品嚐比利時鬆餅等西式餐點嘅好去處。酒店早約為2,000到3,000日圓，café早餐則大概500到1,500日圓就有交易。（資訊截至2019年11月）
至於午餐，編輯部就會推薦您去café、居酒屋、鐵板燒或壽司店等地方享用。喺café內您可以享用到麵包、意粉等等西式料理；而比較高級嘅餐廳，就會提供鐵板燒或壽司等菜式。值得一提嘅係午市市段分量一般都會比晚市較少。
喺挑選午餐地點時，不妨揀選一啲比較高級嘅餐廳，因為午市客人普遍都會比晚市較少，而且價格亦比較划算。
去café食一餐午餐嘅價錢約為500到2,500日圓，高級餐廳則約為1,500到6,000日圓。（資訊截至2019年11月）
銀座café、甜品
您亦可以喺銀座搵到多間咖啡店或甜品店，從世界一流甜點師傅主理嘅實力名店到西式或日式甜點名店都應有盡有。如果想嘗試和風口味，我哋就會向您推薦日式甜品，即餡蜜(あんみつ)、麻糬、抹茶、銅鑼燒等等一眾款式。
如果想品嘗上述日本甜品，「鹿乃子本店（和喫茶室）」、「中村藤吉本店」、「虎屋菓寮」等都係唔錯嘅選擇。價位約為1,500到3,000日圓不等。（資訊截至2019年11月）
銀座歷史悠久餐廳
銀座內有唔少餐廳都極具歷史價值。例如「銀座獅子」(銀座ライオン)就係一家建於1930年代、屬日本最古老嘅啤酒館；而「銀座木村家」則擁有150年歷史，係全國首家將紅豆麵包發揚光大嘅老字號麵包店。
銀座酒店
銀座地區嘅酒店大多集中於東京Metro「銀座站」到都營新宿線「東銀座站」之間。酒店類型從膠囊旅館、經濟型酒店到提供全方位服務嘅酒店都有。
價格範圍因酒店而異。膠囊旅館與經濟型酒店標準房每晚費用約3,000日圓；至於提供全方位服務嘅酒店，就會比標準房價格稍貴，每晚約盛惠4萬日圓。（資訊截至2019年11月）
銀座周邊酒店
除咗中心地段，銀座周邊亦有唔少酒店選擇。有別於銀座區內嘅酒店，銀座周邊地區嘅住宿設施不乏四星級甚至五星級酒店。例如日比谷「帝國飯店」或「東京半島酒店」、汐留「東京康萊德酒店」、東京站「丸之內四季酒店」等。
以上高級酒店價格不斐，標準房住一晚大約6萬日圓，但換嚟嘅則係帶有日本風格嘅室內裝修，保證遊客可以喺寬敞房間內好好放鬆一番。（資訊截至2019年11月）
如何從銀座前往東京市區內主要車站
銀座係東京主要旅遊目的地之一，但東京值得順便觀光嘅地區又點此咁少呢？
下表就為您整理出從銀座到東京其他主要車站嘅交通方式以及所需時間。
| 主要車站名 | 乘車路線 | 所需時間 |
| 銀座到新宿 | 東京地鐵丸之內線 | 約17分鐘 |
| 銀座到澀谷 | 東京地鐵銀座線 | 約15分鐘 |
| 銀座到東京 | 東京地鐵丸之內線 | 約2分鐘 |
| 銀座到秋葉原 | 東京地鐵日比谷線 | 約13分鐘 |
| 銀座到台場 | 東京地鐵銀座線/百合海鷗線(ゆりかもめ) | 約25分鐘 |
如何前往銀座站
如果要從羽田機場前往銀座，請先前往JR濱松町站。從JR濱松町站出發，搭乘山手線或京濱東北線，然後喺下一站JR新橋站轉車。從新橋站搭乘東京地鐵銀座線，約2分鐘即可到達銀座站。
相關資訊
- 景點名稱：東京地鐵銀座站
- 地址：〒104-0061東京都中央區銀座4-1-2
- 交通方式：羽田機場→[東京モノレール]約13分→JR浜松町駅[山手線・京浜東北線]約3分→JR新橋駅→[東京メトロ銀座線]約2分→東京メトロ銀座駅
- Wi-Fi：有（G Free）
- 語言：中文、英文、韓文、泰文、法文、西班牙文
- 信用卡：可以使用（僅限購買Tokyo Subway乘車券時可以碌卡）
Comments