嚟到東京旅遊個個都會去新宿，而去新宿就更加無理由唔去參觀新宿御苑啦。新宿御苑嘅迷人之處，除咗有日式庭園風格之美，作為處於市中心內嘅一片清淨之外，每逢日本櫻花季，更加係美不勝收！新宿御苑究竟點樣可以簡單抵達？日式風格嘅賞櫻方式又係點嘅呢？千萬唔好錯過啦！
東京市區嘅後花園：新宿御苑國立公園
如果話紐約嘅中央公園係紐約市中心一片與市隔絕嘅淨土，咁東京市區嘅後花園就要數「新宿御苑」喇。佔地約58.3公頃，橫跨新宿區及澀谷區，1949年新宿御苑作為國立公園正式開放俾一般民眾進場參觀。
園內種植咗大約1萬棵左右嘅樹木，包含首次喺日本裁種嘅百合樹等，仲有約1000棵櫻花樹，春天百花齊放、夏季綠意盎然，入秋秋色宜人，就連天寒地凍嘅冬天景色都別有一番風味。
東京賞櫻好去處
日本嘅櫻花季可以話訪日旅遊嘅大旺季，日本嘅櫻花之美，令好多國外內遊客爭相一睹風采，而新宿御苑正係東京賞櫻嘅大熱門！每年3月左右，大家就開始關注櫻花嘅滿開情報，深怕錯過豔麗動人嘅一刻，新宿御苑嘅腹地之大，滿滿人潮都唔會令人覺得擁擠。
而日本人最愛嘅賞櫻方式就係喺櫻花樹下野餐，無論係三五好友、屋企人或者係公司同事，都會喺呢個時候相約野餐賞櫻，觀光客可以喺園內購買賞櫻便當，亦新可以喺新宿百貨樓下美食街選購自己鐘意嘅食物外賣，再喺附近超市，商場或者係百円店買一張野餐墊，就可以享受呢種日式嘅賞櫻風格！要特別注意嘅係，新宿御苑係唔可以攜帶酒精飲料入園㗎！
日式庭園中賞楓
講到另一個令人無法抗拒嘅美景，必然係秋天嘅楓葉以及黃色嘅銀杏！比起春天嘅賞櫻熱潮，秋天嘅新宿御苑則係換上另一種蕭風瑟瑟嘅面貌。園內嘅日式庭園風格建築，同楓葉可以話係絕配！坐喺湖邊長凳上，享受入秋後嘅涼意，就連寒風刺骨嘅冬天，仍然阻擋唔到遊客前來一親芳澤！下次造訪東京嗰陣，一於嚟見識一下新宿御苑嘅迷人風采啦！
去新宿御苑嘅交通及開園資訊
開放時間
開放時間為09:00～16:00（16:30關園，另外亦會有延長開放時間嘅時段，詳情請瀏覽官方網頁）。每星期一為休園日，星期一為公眾假期嘅話開放入園，改為第二日休園，但而3月25日～4月24日及11月1日～11月15日期間，星期一照常開放入園。另外，新年前後（12月29日～1月3日）都會休園。
入園費用
門票價錢為成人500円，中學高中生以上250円。
交通資訊
新宿御苑有三個入口，分別係「新宿門」、「千駄谷門」及「大木戶門」，分別嘅交通方法如下。
新宿門
- JR京王小田急線 新宿站南口 徒步10分鐘
- 京地鐵副都心線 新宿三丁目站E-5出口 徒步5分鐘
- 西武新宿線 西武新宿站 徒步15分鐘
- 東京地鐵丸之內線 新宿御苑前站出口1 徒步5分鐘
- 都營地下鐵新宿線 新宿三丁目站C1/C5出口 徒步5分鐘
千駄谷門
- JR總武線 千駄谷站 徒步5分鐘
- 都營地下鐵大江戶線 國立競技場站A5出口 徒步5分鐘
大木戶門
- 東京地鐵丸之內線 新宿御苑前站出口2 徒步5分鐘
Comments