日本鐵道系統方便就係人都知，可以輕鬆快速咁帶你去到各大城市同周邊地方，但係總有啲時候，由A地點去B地點時無電車直達，又或者你太「好彩」遇上電車停駛…呢個時候點算好？不如就搭的士啦！
好多人驚搭的士，因為驚會遇到啲唔正當嘅司機，見係外國人就當你水魚。
但好消息係，呢度係日本！的士會列明收費，好少聽到收多錢或者專登呃人嘅情況，所以你可以毫無顧慮咁截的士，因為無論您目的地係邊到，司機都會收取按車錶收取費用。以下，立即為您講解日本的士計價方式！
點樣截的士好?
大部分日本的士都會清楚標明｢TAXI｣喺車身。您可以喺任何地方截的士，只要唔係企喺禁區嘅路邊，都可以舉手截車。
當然，您都可以喺的士站搭的士。的士站係指定接載乘客嘅地方，通常都會有清楚標示係的士站，而且通常都會有一堆的士排隊等住為您服務，只要走到最前面搭第一架的士就OK。
要注意嘅係，有啲地區係禁止的士當街接載乘客，例如銀座，因此乘客必須去的士站搭的士。
開始旅程！
成功截的士之後，如果你見到車門自動打開，都唔使太過驚訝。因為日本的士門係由司機控制，開門閂門一切自動，乘客唔需要特登自己伸手去開門閂門，如果唔係被車門整親就唔好啦。
如果您拎住行李箱，司機就會打開後車廂，並幫手將您行李擺上去。因為日本無畀貼士嘅習慣，所以呢項服務係唔駛畀額外收費嘅。
如果您想要用信用卡俾錢嘅話，記住喺開車前話畀司機知，因為有啲地方嘅的士未必接受信用卡，如果落車時先發現用唔到卡、無錢畀就唔好啦。上車後，請清楚話畀司機您嘅目的地。如果唔識日文，可以直接比佢睇地址或者地圖，大部分的士司機都會用GPS搵目的地同埋計劃路線。
的士起錶收費係點樣計算？
的士前面座位設有「里程計錶」，乘客可以睇住個錶就知要幾錢。每架的士都會有基本起錶價同跳錶價。2021年東京23區（及武蔵野市、三鷹市）起錶價為430円，乘搭1,052米里之後，每233米會再跳錶80円。
每個城市地方都會有唔同嘅價錢同計算方式，但基本原理同系統都一樣，所以上車望住的士錶就知有無被亂收費用！
除咗按錶收費之外，日本的士亦會設有部分額外費用，例如高速公路費用、或者深夜的士嘅加價收費「深夜割」。喺東京，過左夜晚十點就會加收20%車費。
應該點畀的士錢？
到達目的地後，司機會話你知車錢以及遞上收錢小托盤。呢個時候您可以選擇畀現金或者信用卡。（大部份的士都接受Suica及信用卡，不過記得上車時同司機講好）。只需要將現金或者信用卡放喺托盤上，等司機找錢同畀收據就得！
落車時，記得要再三確認有無漏嘢，特別係放喺車尾廂嘅行李。司機通常都會落車打開車尾廂幫你拎出嚟，但如果司機一時忘記，您都可以禮貌地叫司機打開車尾廂。的士車門會自動閂，所以就唔需要特別自己閂門。
今次文章就到呢度。如果覺得呢篇文章實用，或者您想知道仕何日本交通資訊，都歡迎留言啊。下次再見！
Comments