每當踏入迪士尼世界，總係令人流連忘返、唔想返屋企。東京迪士尼海洋®有非常正嘅酒店，可以俾您盡情由朝玩到晚，而且返到酒店房間，仲可以繼續享受夢幻樂園嘅氛圍。特別嘅係，東京迪士尼海洋®係一個為咗令大人細路都可以玩得盡興，所精心規劃嘅樂園，尤其可以喺園區各處，搵到好多浪漫嘅景點。而呢度絕對係嚟到東京旅遊嗰陣，唔會想錯過嘅景點。
東京迪士尼海洋®
東京迪士尼海洋®有七大園區：世界市集、美國海濱、發現港、失落河三角洲、阿拉伯海岸、美人魚礁湖、神袐島。每一區都各有獨特嘅景色、令人倍感浪漫，但當然唔可以只係行下睇下，一定都要試以下呢啲好玩嘅遊樂設施。今次FUN! JAPAN嘅小編就以超過20次嘅入園經驗，精選以下各區最推薦嘅施設，仲唔快啲嚟睇睇！
東京迪士尼海洋®遊樂施設
驚魂古塔 （美國海濱）
呢個設施其實就係乘搭電梯，從最高處有極佳嘅視野，俯瞰東京迪士尼海洋®園區，尤其晚間嘅夜景更加美麗。但點解話”驚魂”呢？好簡單，因為你所乘搭嘅電梯將會從最高處，以極快嘅速度跌落去。只會令人想驚聲尖叫！但又非常值得一玩！
龜龜漫談 （美國海濱）
呢個係一個劇院型施設，俾你可以遇見以及同海龜對話！而同你見面嘅海龜仲真係識回答你嘅問題，可以話係呢次日本行中難忘嘅體驗！唔好唔記得學一啲簡單嘅日文單字，同海龜對話啦！
海底巡遊艇：尼莫＆好友的海洋世界 （美國海濱）
乘搭海底巡遊艇，縮成小魚嘅尺寸，用同尼莫以及朵麗一樣嘅視角，睇其他各式各樣嘅海底生物。大人細路都可以一齊坐喺呢個夢幻世界中同樂！
印第安納瓊斯冒險旅程：水晶骷髏頭魔宮 （失落河三角洲）
由印第安納瓊斯嘅助理引導你進入神廟，體驗同電影中一樣，令人興奮、驚險又帶浪漫嘅情節！
辛巴達傳奇之旅 （阿拉伯海岸）
與辛巴達及水手一同出航，探索阿拉伯海岸、尋找稀世珍寶！仔細聽會發現，配樂係迪士尼傳奇配樂大師亞倫‧孟肯 （Alan Menken） 嘅作品！
跳躍水母 （美人魚礁湖）
坐喺上方有大水母嘅貝殼入面，猶如喺海底上下飄浮，享受一段神袐又歡樂嘅時光。旅設嘅移動唔會太快，適合兒童乘坐。
地心探險之旅 （神袐島）
唔係凈係得刺激嘅過山車，仲可以俯瞰東京迪士尼海洋®嘅景觀以及體驗火山。一旦乘搭過，就會令人欲罷不能，想一坐再坐。
為咗縮短排隊時間，熱門施設仲有提供快速通行證可以使用。
東京迪士尼海洋觀海景大酒店
位於東京迪士尼海洋®入口處，令你美夢成真嘅東京迪士尼海洋觀海景大酒店！於盡興暢玩迪士尼海洋之後，可以直接返到酒店房間內，繼續享受夢幻樂園嘅氛圍。同時，從房間仲有絕佳嘅視野眺望園區以及東京灣，係唔係超級浪漫呢！
入場票券價錢
東京迪士尼海洋®提供咗以下幾種入場票
- 1日護照：成人7,400円、12～17歲青少年6,400円、4～11歲兒童4,800円。
- 2日護照（可以於連續兩日內，進入東京迪士尼樂園®以及東京迪士尼海洋®）：成人13,200円、12～17歲青少年11,600円、4～11歲兒童8,600円。
- 3日魔法護照（可以於連續三日內，進入東京迪士尼樂園®以及東京迪士尼海洋®）：成人17,800円、12～17歲青少年15,500円、4～11歲兒童11,500円。
- 4日魔法護照（可以於連續四日內，進入東京迪士尼樂園®以及東京迪士尼海洋®）：成人22,400円、12～17歲青少年19,400円、4～11歲兒童14,400円。
- 星光護照（星期六日及公眾假期下午3點後入園）：成人5,400円、12～17歲青少年4,700円、4～11歲兒童3,500円。
- 傍晚6點後護照（平日下午6點後入園）：均一價4,200円。
各式票券可以喺現場或者喺線上購買。推薦提早購買，咁樣就可以省咗現場排隊買飛嘅時間，多咗時間入園遊玩。當日票於閉園前1小時停止販售。
開園時間
朝早8點開園營業至夜間22:00
*開園時間會依照時期有所變動。
景點資訊
- 地點名：東京迪士尼海洋®
- 地址：279-0031千葉縣浦安市舞浜1-1
- 交通方式：從JR舞濱站步行抵達。雖然名為東京迪士尼海洋®，但實際上位於千葉縣，由東京都心乘搭電車約需1小時。
Comments