相信有好多人細細個就睇迪士尼卡通片大嘅係咪? 發源自迪士尼動畫，以加州迪士尼同佛羅里達迪士尼為模版，所設計嘅東京迪士尼樂園®入面有七大園區。被譽為亞洲最正嘅迪士尼樂園。充滿歡樂嘅東京迪士尼樂園®，你嚟日本旅行嘅話，可以計劃列入行程呀。
東京迪士尼樂園®
東京迪士尼樂園®分為七大園區：世界市集、明日樂園、卡通城、夢幻樂園、動物天地、西部樂園、探險樂園。我哋FUN! JAPAN Team有位已經去咗東京迪士尼樂園®超過40次嘅成員將會嚴選為你介紹最推薦嘅遊樂設施。就算香港迪士尼樂園有, 但東京迪士尼樂園®嘅都會有啲唔同啦。就睇吓最推薦嘅係乜先!
東京迪士尼樂園®遊樂設施
叢林巡航：勇闖野生世界 （探險樂園）
隨著船長風趣幽默嘅引導，展開叢林探險。沿途有各式各樣野生動物同原始部落，仲有令人想不斷影相嘅美麗綠樹、仲有瀑布前嘅彩虹、熱帶花朵同蝴蝶等等大自然景觀。
加勒比海盜 （探險樂園）
喺漆黑嘅山洞入面坐船探險，仲可以睇到逼真嘅黑珍珠號同傑克船長。一開始同最後結束時都會比較暗，所以都有啲啲恐怖，但係裏面有啲海盜嘅畫面都相當有趣。坐完呢個遊樂設施後，都會想重溫返電影加勒比海盜系列。
巨雷山 （西部樂園）
巨雷山係一個主題過山車，睇起嚟好像係金礦山，帶你入驚險嘅西部世界。永遠都受歡迎嘅經典遊樂設施，就喺西部樂園入面有呀。
飛濺山 （動物天地）
除咗過山車，試玩埋動物天地入面個好刺激嘅飛濺山啦。搭圓木舟、體驗吓急速衝落嚟果種離心快感, 爽呀!
小飛俠天空之旅 （夢幻樂園）
坐住飛天海盜船，向夢幻島出發！環繞著閃曜嘅星光，跟住Peter Pan探索袐境同神袐嘅世界。享受好似懸浮喺半空中望落地下嘅樂趣。仲有同鐵鈎船長對決嘅場景都好有趣㗎。
小小世界 （夢幻樂園）
另外，最近改建重新開放嘅小小世界，係一個適合帶小朋友、輕鬆玩嘅音樂乘坐設施。有超過40位迪士尼經典角色喺入面。呢次新同舊嘅角色都有，例如Anna、Elsa、阿拉丁、Jasmine (茉莉公主)、Cinderella (灰姑娘)、 Ariel (美人魚公主)、Peter Pan以同Moana(慕安娜)一齊加入。
怪獸公司「迷藏巡遊車」（明日樂園）
喺明日樂園嘅入口，就可以睇到怪獸公司「迷藏巡遊車」。喺過程中透過用電筒照射，可以同好多嘢互動。就好似其他遊樂設施一樣，都有好多生動嘅電動主題公仔。
為咗縮短排隊時間，呢啲熱門遊樂施設都有提供「Fast Pass」可以用。
東京迪士尼商店 – 將美好回憶帶返屋企
世界市集點心坊 （世界市集）
店入面嘅設計超可愛，各式包裝精美嘅糖果餅乾睇到都令人興奮。呢啲甜點唔單止可口，可愛無比嘅包裝都令人好有想買嘅衝動！而且，商品嘅包裝設計同種類會隨著節日同季節替換。就好似春天就會係櫻花設計，聖誕節期間就會係綠色同紅色嘅設計等等。
香水小店（探險樂園）
喺東京迪士尼有限定嘅香水以同身體保養品可以買？店內有多種唔同香味，由香甜到優雅嘅都有，或者可以喺呢度搵到一種好岩你心水嘅香味呢。
卡通城速遞公司 （卡通城）
有賣好多有趣商品嘅可愛造型車，絕對要去睇吓！因為實在太可愛喇，唔只係買嘢、仲要去同佢影返張相呀，係唔係可愛到不得了先?
聚寶彗星 （明日樂園）
內部設計係以彗星為主題，賣好多史迪仔為主同其他迪士尼人物嘅玩具、文具、衣服等商品。鍾意史迪仔嘅人絕對唔可以錯過！
東京迪士尼樂園®門票
東京迪士尼樂園®提供以下幾種門票：
- 1日Passport：成人7,400日圓、12～17歲青少年6,400日圓、4～11歲兒童4,800日圓。
- 2日Passport (可連續兩日內進入東京迪士尼樂園®同東京迪士尼海洋®)：成人13,200日圓、12～17歲青少年11,600日圓、4～11歲兒童8,600日圓。
- 3日魔法Passport (可連續三日內進入東京迪士尼樂園®同東京迪士尼海洋®)：成人17,800日圓、12～17歲青少年15,500日圓、4～11歲兒童11,500日圓。
- 4日魔法Passport (可連續四日內進入東京迪士尼樂園®同東京迪士尼海洋®)：成人22,400日圓、12～17歲青少年19,400日圓、4～11歲兒童14,400日圓。
- 星光Passport (週末同假日時，於下午3點後入園)：成人5,400日圓、12～17歲青少年4,700日圓、4～11歲兒童3,500日圓。
- 傍晚6點後Passport(平日下午6點後入園)：均一價4,200日圓。
各式門票都可以喺現場或線上購買。建議提早買就可以慳返喺現場排隊買飛嘅時間, 快啲入園玩。當日門票喺閉園前1個鐘停止販賣。
東京迪士尼樂園®嘅開園時間
早上8點開園營業至夜晚10點
*開園時間會依照時期有所變動。
景點資訊
- 地點：東京迪士尼樂園®
- 地址：279-0031千葉縣浦安市舞浜1-1
- 交通方式：從JR舞濱站步行就到。雖然叫東京迪士尼樂園®，但實際上位於千葉縣，由東京都心搭電車約1個鐘。
(C) Disney
Comments