去東京大家都一定會去澀谷、原宿行街買嘢，其實明治神宮就喺原宿車站隔離，既然咁近，不妨順道去埋榮獲米芝蓮三粒星、可以感受日本之心嘅明治神宮，拜吓日本嘅神明，提升吓運氣啦。而且每年1月1號去明治神宮新年參拜嘅人數都號稱全日本第一，係東京都內數一數二出名嘅能量景點，而且有好多必睇嘅地方。以下就為大家介紹一下點樣遊明治神宮啦。
明治神宮嘅入口 通向神明嘅結界
從原宿站行過嚟，過咗神宮橋之後就會見到鳥居。鳥居代表一個結界，區隔出俗世同神明所居住嘅神社。大家會喺鳥居前面鞠一鞠躬，先至穿過鳥居。進入神社境內同離開嗰陣喺鳥居前面鞠躬示意都係基本禮儀。參拜結束回程嗰陣，喺鳥居前面低頭鞠躬一次，轉過身朝住神社方向再行一次禮之後，先至可以穿過鳥居離開。
參拜道路嘅中央係神明所通行嘅道路，喺上面行嗰陣記得靠邊行。穿過鳥居之後，往南門參道行，會睇到一個大鳥居。呢個大鳥居就係明治神宮嘅象徵，係日本最大嘅木造鳥居。
於幽靜的中庭悠遊地渡過 治愈一下身心
穿過咗鳥居之後，向神社境內行，參拜道路上鋪滿咗小石。呢啲小石被稱為「玉砂利」，係為咗保持清淨而鋪設美麗嘅特別小砂石，係神社不可或缺嘅東西。腳踏小石行過去，整頓好自己嘅心情，向神明所在嘅神聖場所邁進。
南參道嘅深處有一處廣闊嘅御苑，亦都係觀光景點之一（入場費：500円），入面有茶室、小池塘、和清正井等等，仲有美麗曲折嘅樹林小徑。而當中，好靚嘅玉蟬花田每逢6月中正值盛開，好值得一睇。順帶一提，將清正井嘅相設定為手機嘅待機畫面，話唔定幸福就有可能降臨？
御守咁靚 買一個作為到明治神宮一遊嘅紀念
明治神宮嘅御守，有好多種用途，祈求身體健康、疾病康復、全家平安、交通安全、生意興隆、學業順利、考試合格、順利就業、除厄運、旅遊平安、結緣、開運、安產等等。御守可以喺神樂殿對面嘅授與所取得到。參拜人數多嗰陣，喺南神門前都可以獲得。喺購買御守之前，記得誠心咁向神明參拜。據聞御守要貼身配戴，或者係放喺銀包入面經常隨身攜帶先至有用㗎。
明治神宮佔地原來係咁廣闊？
明治神宮係城市入面範圍廣大嘅神社。明治神宮有好幾個入口，從靠近原宿站、明治神宮站嘅南門入嚟參拜，行過神宮橋，穿過鳥居。沿住玉砂利小路行，左手邊會睇到往御苑嘅入口，就喺美麗嘅庭院入面散吓步，放鬆一吓心情啦。
再行返到參道，穿過大鳥居，喺手水舍洗淨身心，再向主殿前進。喺主殿向神明致意，參拜完畢之後，再到社務所獲得御守。神宮境內北面有廣闊嘅草皮同池塘，非常適合喺嗰度悠閒咁渡過。而春天嗰陣仲可以欣賞櫻花。喺北門離開神宮之後，可以喺代代木站乘搭電車。
明治神宮開放時間
參拜時間
- 1月：6:40 – 16:20
- 2月：6:20 – 16:50
- 3月：5:40 – 17:20
- 4月：5:10 – 17:50
- 5月：5:00 – 18:10
- 6月：5:00 – 18:30
- 7月：5:00 – 18:20
- 8月：5:00 – 18:00
- 9月：5:20 – 17:20
- 10月：5:40 – 16:40
- 11月：6:10 – 16:10
- 12月：6:40 – 16:00
景點資訊
- 名稱：明治神宮
- 地址：東京都澀谷區代代木神園町1-1
- 交通：
- JR山手線原宿站、東京Metro千代田線、副都心線「明治神宮前<原宿>」站徒步大約1分鐘
- JR、都營大江戶線代代木站、東京Metro副都心線北參道站徒步大約7分鐘
- 小田急線參宮橋站徒步大約5分鐘
Comments