日本嘅街道禮節

當去日本旅行時，如果可以了解同遵守以下幾個行人道路上嘅基本禮節，就更加可以喺互相尊重下感受日本文化嘅樂趣啦。

唔好用手指指人

喺日本街頭，你絕對唔會鍾意被唔識嘅陌生人隨便用手指指著。呢個係非常無禮貌嘅行為，請儘可能避免做呢個動作。用手指指人會被解讀為有威脅對方嘅意思，所以請小心避免咁做。通常喺問路時，啲人都會習慣用手掌嚟指示方向，或者用講嘅方式嚟說明，而唔係用手勢。

喺街上邊行邊食或飲嘢係好無禮貌㗎

雖然話就話隨著時代變遷，而家有時都睇到啲後生仔女喺街上食嘢，但喺以前，呢個行為被認為係好無禮貌㗎。有啲店舖會提供座位或者喺店隔離劃一個區域，方便俾佢哋客人食嘢同休息。雖然而家有好多店舖都有外賣點心，但係大多數仍然唔鼓勵喺路上邊行邊食。

喺路上靠「右」行

呢個係比較有爭議性嘅一點，有好多關於喺行人道路應該行邊一邊嘅討論。多數日本人喺學校被教育必須要行道路右邊嘅行人道，或者年輕世代嘅日本人都靠右行。最主要係因為車係靠左邊行，而走喺右邊嘅話，就可以睇到迎面而來嘅車以防止意外發生。雖然我曾經都被年長嘅人士喺路上提醒過數次，因為我行〝錯〞嘅一邊。但老實講都有好多例外，有時會見到有人都靠左走，尤其係喺較寬闊嘅行人道路上面。所以我嘅建議係，跟著前面嘅路人行，或者憑經驗判斷啦！總之跟著人做就應該唔會錯嘅。

請勿邊行邊食煙

雖然話唔定日本比較多人食煙，但喺街上可以見到好多商業場所係禁煙嘅。喺好多地方，邊行邊食煙嘅行為被認為係違法嘅。呢個其實都相當合理吖，因為都發生過唔少意外，曾經有個細路女塊臉被煙燙傷，而引發公眾對呢個行為嘅關注，最終導致喺千禧年後嘅某年，政府通過咗一條禁止邊行邊食煙嘅法例。喺現今，一般公共場所己經習慣咗呢條規則，而且可以見到喺街上設有食煙專區。如果喺專區以外嘅地方食煙，或者被捉到喺路上邊行邊食煙，依照所在地區或城市，將可能會被處罰最多2萬日幣不等嘅罰款。

以上介紹嘅都只係你嚟日本時，應該要知嘅日本禮節同規範之中嘅幾個例子。如果你唔小心無遵守呢啲規範禮節時，都唔使咁緊張，唔係被強制一定要遵守嘅。但至少都請去理解背後嘅原因，呢啲都可能幫到你進一步了解日本文化以及日本人呢。