日本最大嘅露營車博覽會—2018年日本露營車大展已於2月2日至4日完滿結束。今年一共有330架車於現場展出，從由汽車拉動嘅移動式房屋、到內部改裝成住宿空間嘅露營車等各款露營車都共聚一首，三日之內足足吸引將近7萬名粉絲入場！
但日本本身對露營車嘅需求其實並唔算太高。由於日本人放長假嘅時候並無長期逗留度假地嘅習慣，因此可供汽車露營嘅設施唔多；然而近年來，退休人士慢慢開始識得享受慢活生活，於是日本各地揸車旅行嘅人越嚟越多，露營車銷售亦逐漸成長。2016年，日本全國各地嘅露營車數量就首度超越10萬架，而家就等我哋嚟睇吓露營車展上有邊啲車款啦！
大受歡迎！由貨van改裝而成嘅簡易型露營車
提到最優雅嘅露營車類型，就必定係移動式房屋－一種總重量超過3噸、備有車轆、由車拉動嘅「屋企」；其次則係由巴士或大型卡車改裝而成嘅露營車，呢種車內部一般都具有睡房、餐廳、淋浴間、廁所等完善設備。
但係由於日本狹窄嘅道路並唔方便上述體積較大嘅車種行駛，而且司機亦較難搵到停車位，因此喺日本熱賣嘅露營車，大多數都係體積比較細嘅車款－由貨車改裝而成嘅貨車改裝露營車「Van-con」（van conversion之略稱）。
同場亦有由小型車改裝成之露營車
會場上展示咗各式各樣嘅Van-con型車款。同大型露營車相比，前者內部空間比較狹窄，因此就有必要將狹窄空間有效運用至極致、靠日本式空間設計量身訂做出既豪華又舒適嘅內裝。如果係出自優秀改裝車商之手，日本迷你車規格嘅小型汽車甚至都一樣可以變成華麗露營車𠻹！
此外，喺本次展會上，日產汽車亦推出咗一款8千Wh嘅鋰電池露營車。8千Wh，即足夠中等規模住宅一個晚上所使用嘅電量，而呢款車內更裝有家庭用空調，夏天有冷氣、冬天有暖氣，非常適合自駕人士任何時候都可以舒適地喺車上度過！
即使無廁所、淋浴設備都可以成為露營車！？
即使Van-con銷量正喺日本持續增加，但其實呢款露營車本身好多都無廁所以及淋浴設備。即使欠缺舒適設備，點解都仲可以成為露營車呢？呢個就係日本獨有嘅特殊情況。
首先講講廁所。無論您去到日本全國邊到，都唔難喺周圍搵到公共廁所、公路休息站（附設販售農產品以及民藝品等國營購物中心嘅停車場兼休息設施，全國共有1100處以上公路休息站），以及24小時營業便利店、加油站、公園等，因此喺日本揸車可謂根本無需擔心搵唔到廁所！考量到清潔上嘅麻煩，因此喺車上裝設廁所嘅必要性就變得唔高。
咁淋浴又可以點辦呢？日本各地同時坐擁多座溫泉，若果您有機會喺日本各地自駕旅行，通常都唔難喺行車路上見到溫泉，而且種類仲由山中森林溫泉到望海溫泉等變化豐富，比起特登去酒店或使用車上淋浴有趣得多！
由於以上原因，因此喺日本、比普通Van-con型露營車更簡單、只有簡易臥床設備嘅露營車近年越來越受歡迎。「車上過夜（stay in a car）」指嘅係針對移動或睡覺設計、適合旅行而成嘅車款，追加設備頂多只有電視或暖氣。由於只係喺普通私家車上加設床鋪，所以價格相對就會較平，可以話係一種日本先有嘅產品呢！
精心設計、小型但係方便嘅日本露營車，唔知大家又覺得點呢？記住同我哋分享您嘅意見啊！
Comments