要點買先最抵？日本超市心得分享！

小編幾乎每日都會去超市購物，而且一直有研究最抵買攻略，都應該可以算得上係一個精打細算嘅專家！所以今日我就會同大家分享幾個喺日本超市購物嘅小秘訣，睇完之後，您都可以一秒變身日本超市達人！

購物前先睇網站或傳單

或者上圖嘅數字同漢字會令您睇得眼花撩亂，但係出發前先睇官方網站或傳單其實係非常重要嘅！因為傳單上通常都會寫有特賣資訊，如此一來，您就可以省卻苦惱點買先最抵、傷腦筋幫屋企人左度右度嘅時間喇！

時間非常保貴，同樣道理一樣可以應用於超市購物。好多人都會特登趁收舖前一到兩個鐘先去超市，因為臨近關門時間，生鮮類或肉類就會開始打折。對於日本超市而言，生鮮食品品質係十分睇重嘅一環，因此超市通常都唔會賣隔夜生鮮類，於是就會由傍晚時分開始促銷。

其他種類如便當類、配菜同壽司都係一樣。雖然日本便利店都一樣會賣新鮮食品，但便利店做法則通常都會係將過期食物直接掉走、並唔會特別減價，所以如果要執著數，超市會比較適合！

超市為咗避免客人所買嘅食品融冰或將其他商品沾濕，通常都會派發細膠袋裝乾冰或冰塊以便保鮮，而小包分裝好嘅豉油或芥末醬等調味料，亦都係免費派發。部分超市更備有微波爐方便客人加熱便當，甚至即棄餐具都係免費提供。此舉雖然唔太環保，但係對於應急或遊客嚟講，就係非常方便貼心嘅服務！