每個國家對於「兒童節」嘅過節方式都有所差異，而喺云云國家當中，相信對大多數人嚟講，日本嘅過節方式算係比較親切或者驚喜。您又知唔知日本人究竟有邊幾種過兒童節嘅傳統習俗呢？就等編輯部喺透過呢篇文章為您大解構！
日本兒童節應該被稱為「男兒節」?
日本政府於1948年製訂每年5月5日為「兒童節」，屬國定假日之一。國民主要會喺當日慶祝全日本小朋友出世（尤其係男仔），同時亦感謝扶養小朋友長大成人嘅父母親。事實上，喺日本政府製訂兒童節之前，5月5日本來係屬於日本五大傳統紀念日之一「端午節句（端午節）」。若然追溯日本歷史，就會發現由奈良時代開始就已經有「端午節句」紀錄，而古代日本亦習慣喺呢一日慶祝男童出生、成長，並且表揚全日本嘅父親呢！
兒童節名物—鯉魚旗
每逢日本兒童節，您都會有機會見到多項傳統慶典行事以及裝飾品。最為大眾熟悉嘅，就必定係鯉魚旗（繪有鯉魚圖案之圓筒狀旗幟）！喺5月5日呢日，家家戶戶往往都會喺門外設置旗杆，將鯉魚旗高高掛於半空中。當風吹過時，鯉魚狀旗幟就會隨風飄揚，遠望就似鯉魚於半空中游水。人民相信鯉魚旗會帶嚟好運並且保佑小朋友平安健康長大，鯉魚逆流而上、躍上溪流嘅習性亦為旗幟附上能量與活力嘅象徵𠻹。
兜（Kabuto）－日本武士頭盔裝飾
除咗鯉魚旗之外，日本往往亦會喺呢一日進行「兜」（kabuto）－日式頭盔嘅展示，另外亦有地區會舉行紙製盔甲活動，鼓勵小朋友用紙親手製作頭盔，並且穿戴於身上作為裝飾。「兜」係一種防禦性裝備，象徵對小朋友嘅保護，民眾相信只要喺呢一日展示頭盔，就能夠保佑小朋友免於危險、平平安安過生活。
日本兒童節有咩慶節食物？
日本兒童節一定要食嘅特別食物，就係「柏餅」。柏餅外圍餅皮以糯米為原料製成，內裡包著豆餡、並且用上橡樹葉包裹表層而成。橡樹葉雖然唔能夠食用，但取「橡樹老葉於新葉長出之前都唔會凋落」之「傳承」寓意，因而被古人大多都選用橡樹葉作材料之一。
日本人會點樣慶祝兒童節？
就如前文提到，兒童節屬於國定假日，所以小朋友一般都會喺呢一日同家人玩樂，用色紙或者報紙製作鯉魚旗、兜，又或用菖蒲花沖涼等等。
雖然兒童節顧名思義，係屬於兒童嘅日子，不過身為大人嘅您都依然可以體驗以上種種日本傳統行事，因為佢哋都係屬於日本文化嘅一部份嚟㗎嘛！您可以嘗試親手製作鯉魚旗或者兜，更可以喺呢一日盡情享用柏餅𠻹！
Comments