日本人平均壽命為男性80.98歲、女性87.14歲（出自2016年厚生勞動省調查），因此被稱為世界上最長壽國家之一。到底係咩原因導致國民咁長壽呢？有人話係出於飲食生活，但實際上日本人平日嘅飲食生活係點嘅呢？今次就等我哋走入一般日本人家庭，介紹日本被稱為長壽國嘅部分理由啦！
原來日本以前並唔係長壽國…！
距今大約100年前，歐美各國嘅平均壽命大約為50多歲左右，反而日本平均壽命就只得大約30多歲，同而家「長壽國」嘅稱號可謂天南地北。咁係因為當時罹患肺結核以及肺炎死亡嘅人數眾多，特別係小朋友同埋年輕人都會比較早過身。而且舊時無攝取肉類動物性蛋白質嘅機會，以蔬菜、穀物為主嘅飲食生活導致國民營養不良，直至戰後先出現攝取動物性食品飲食文化，先係令到平均壽命大幅提升嘅最大因素。
營養均衡基礎為三餸一湯！
作為世界無形文化遺產之一，「和食」喺日本嘅主要飲食文化為「三餸一湯」。一般家庭嘅晚飯都會出現白飯、味噌湯，以及含豐富蛋白質嘅肉或魚類等主食，再加上海藻及蔬菜、由豆類製品共兩種附菜組成一個組合。「三餸一湯」具有蛋白質、維他命等多種營養素以及低脂肪含量，有助家庭成員攝取均衡營養。住喺東京嘅A小姐就話，「朝早同夜晚嘅配搭都係一道主食、兩道配菜仲有白飯及味噌湯。最基本嘅家庭餐單組合，大多係參考食譜網頁或料理書而定㗎！」
另外，飲綠茶嘅習慣亦係長壽理由之一。綠茶內含有大量維他命C及兒茶素抗氧化物質，因此仲對預防癌症非常有效𠻹！
充實健康檢查及醫療制度
依據日本法律規定，國民需要一年一次定期接受健康檢查。法例原意為定期檢查身體狀況，就算患上疾病都可以提前應對、達至及早發現、及早治療之效。政府亦有於婦科設立針對女性嘅乳癌及子宮癌檢查，又或規定日本公司等對象必須加入國民保險、又或為公司員工加入「社會保險」，二擇其一。此舉確保職員無論生病或受傷時都有保障可以馬上接受治療，同時本人只需要負擔兩到三成費用，省卻為醫療費為操心嘅煩惱。喺醫療費高昂嘅情況下，制度更設「高額療養費制度」，因此醫療受到保障亦可謂長壽理由之一！
Comments