九州嘅櫻花大約會喺3月中逐漸開花，最佳欣賞時間往往只得4月第一個禮拜。不過！好彩都有啲地方係直到4月底都仲可以睇到滿開櫻花。正如日本流傳著一句「最美嘅花總係最後先開」諺語—以下福岡、大分、鹿兒島嘅遲開賞櫻景點，就非常適合各位把握最後賞櫻機會，趁花季尾聲欣賞最色彩絢麗嘅櫻花之美！
1. 白野江植物公園（福岡縣）
以樹齡500年嘅縣指定天然紀念物「櫻樹」為首，白野江植物公園園內種有多達約60種、800多棵櫻花樹，並保存著福岡縣內現時所有品種嘅櫻樹。花期一般為每年2月中至4月尾，而除咗櫻花之外，4月份都係牡丹、石楠花、杜鵑等繁花花期，配搭春天新綠一齊爭妍齊放，場景唯美療癒。
景點資訊
- 名稱：白野江植物公園
- 地址：福岡縣北九州市門司區白野江2丁目
- 往年櫻花滿開時期：2月中旬～4月下旬
2. 烏帽子公園（大分縣）
位於大分縣淨水寺入面嘅烏帽子公園，係牡丹櫻名勝地點。園內種有約500棵牡丹櫻，花期為每年4月中至4月尾左右。而4月尾，烏帽子岳則會舉辦牡丹櫻祭典，現場會上演神樂演奏、太鼓表演等活動，場面非常熱鬧！
景點資訊
- 名稱：烏帽子公園
- 地址：大分縣豐後大野市大野町藤北
- 往年櫻花開花時期：4月中旬～4月下旬
3. 一心寺（大分縣）
大分縣一心寺位於山谷內、四面被山林包圍。從寺院往外眺望，只見山下牡丹櫻加上日本最大規模佛像組成夢幻景色，場面可謂櫻花界世外桃源！綠色、黃色、紫色等15種類以上、品種珍貴嘅八重櫻一齊綻放，隨著谷底微風吹起，花瓣就如櫻吹雪般飛舞；而舖滿腳下嘅粉紅花瓣，則好似一張櫻花地毯，大片絢麗粉紅沖擊眼球，震撼得叫人屏息靜氣！另外，場內仲有日本最大型、高達20米嘅不動明王像，本堂裏面亦有日本國內最大嘅念佛鐘，因此此處亦係當地一大著名能量景點。入夜後，寺院將會舉行亮燈活動，為遊客打造欣賞夜櫻體驗。
景點資訊
- 名稱：不動尊 一心寺
- 地址：大分縣大分市廻栖野1305
- 往年櫻花嘅開花時期：4月上旬～4月下旬
4. 扇山櫻之園（大分縣）
扇山櫻之園佔地廣闊，園地內一共約有6,000多棵、14款種櫻樹。由於園地位處海拔400米高處，因此遊客可以眺望整個別府灣風景，亦非常適合作為遊車河或自駕遊休息景點！
景點資訊
- 名稱：扇山櫻之園
- 地址：大分縣別府市大字鶴見字大平4550-3
- 往年櫻花的開花時期：4月上旬～4月下旬
5. 臼杵市木之畑（大分縣）
臼杵市木之畑內嘅牡丹櫻由當地居民花上20年時間與心機細心照料而成，每年4月中開始就會逐漸滿開。天氣好嘅話，您仲可以喺山頂遠望由布岳同鶴見岳等地標，賞櫻之餘仲可以欣賞迷人山岳風景，一舉兩得！
景點資訊
- 名稱：臼杵市木之畑
- 地址：大分縣臼杵市高山
- 往年櫻花開花時期：4月中旬～4月下旬
6. 霧島神宮（鹿兒島縣）
歷史悠久嘅霧島神宮社殿於西元6世紀建造，並於1715年重建。神宮範圍內可見據稱樹齡長達800年嘅神木杉樹，成為唔少當地人嘅信仰對象。另外，境內亦種有約200多棵唔同種類嘅櫻樹，花期橫跨3月尾至4月中，其中又以大殿為背景綻放嘅枝垂櫻最為壯觀！
景點資訊
- 名稱：霧島神宮
- 地址：鹿兒島縣霧島市霧島田口2608-5
- 往年櫻花開花時期：3月下旬～4月中旬
7. 霧島高原國民休養地（鹿兒島縣）
霧島高原國民休養地內嘅約有2,000多棵櫻花，將會從4月頭一直開花至4月尾。賞花之餘，您亦以喺櫻樹下享受露營樂趣，兼且欣賞同場綻放嘅鬱金香，將百花齊開景色一網打盡！
景點資訊
- 名稱：霧島高原國民休養地
- 地址：鹿兒島縣霧島市牧園町高千穗3311
- 往年櫻花開花時期：4月上旬～4月下旬
Comments