參觀日本神社同寺廟無疑係遊日旅客最想體驗嘅事情之一。試幻想身處千年歷史古蹟建築之中誠心參拜，肯定會係一個非常難忘嘅經驗！
當然，當您嚟到份外莊嚴嘅地方嘅時候，絕對唔會想做出對在地文化或宗教不敬嘅舉動。
所以喺本文中，我哋將會為大家介紹參觀日本神社及寺廟時要留意嘅事項，等各位都可以如當地人一樣參拜！
神社同寺廟有咩唔同呢？
驟眼睇，神社同寺廟或者睇上去一樣樣，但事實上兩者其實大有不同。
神社係日本神道教建築，所奉之神稱為「Kami」。「Kami」可以係大自然中嘅任何元素或物質，甚至已過世人類嘅靈魂。
另一方面，寺廟則可謂佛教特色。寺內有和尚修道，係一處向佛祖祈求嘅地方。
大多數日本人都會參加神道教以及佛教式，換句話講，即係無論神社或寺廟都會參拜。
話雖如此，兩者參拜流程都各有不一，例如：
進入大門
當您抵達神社或寺廟前，您通常會見到一個大門入口。如果係神社的話，您會見到鳥居；而寺廟的話則會係石頭大門。基於禮貌，您必須在門外停低並且稍微鞠躬，敬禮時更要留意除帽以及太陽眼鏡。
大門被視為神聖區域之開端又或通往神靈世界嘅入口，因此請沿著道路兩側而非正中間步入範圍，民眾一般相信道路中間係畀神明或佛祖通行嘅地方。
淨化手口
當您走入大門之後，就會發現神社入口不遠處會有一個小水池稱為「手水舍（temizuya）」畀您淨化雙手及口部。呢個淨化嘅動作稱為「禊（misogi）」，係參拜前做準備嘅其中一個步驟。（並非所有寺廟都會有「手水舍（temizuya）」，所以如果無見到的話就請跳過呢個步驟啦！）
潔淨過程中請先拎起小勺子將水𢳂起。因為只需要𢳂一次水，所以請盡量𢳂滿啲！
然後就請先用少少水沖洗左手、再沖洗右手。
跟住將少少女倒於左手，用掌心接起漱口。
再沖洗一次左手，
並倒少少水於左手掌心，將剩低嘅水倒走後放回勺子。
最後用左手嘅水洗淨勺子上啱啱揸住嘅部分。
而家您己經做好進入神社或寺廟嘅準備喇！前面等待著您嘅會係好幾間建築，尤其係做為祈求用嘅主要神壇。
前往神壇
於寺廟內，您或者會見到一區有多支香或爉燭嘅地方，呢啲其實都會獻畀佛祖嘅。您亦可以自己獻上香或爉燭，但請確定您唔係用其他人嘅爉燭嚟點自己枝香，因為咁會令您接收到嗰個人嘅業障㗎！
如果您唔想的話，參觀寺廟時都唔一定要參拜。但係如果希望好似日本嘅參拜者咁向神明參拜、祈求的話，就要首先先將一個硬幣投入香油錢箱（請禮貌地輕輕投錢）。
香油錢箱前方會有一條繩、上方繫有鈴鐺，請您拉繩並搖動鈴鐺，通知神明您嘅到訪。
若係神社，然後就請躹躬兩次再拍兩下手以表示感謝；若係寺廟，就請躹躬一次但就唔需要拍手。
最後就係雙手合十於心中靜默祈求。好多參拜者同時會向神明提到佢哋姓名住址，令神明知道自己係何方人物。
記住離開神壇前要再躹躬一次以表達禮貌。行出大門時亦要回頭再次躹躬作為結束，表示返回人界區域呀！
-----
從今日起，您就可以學當地人到日本神社或寺廟一齊參拜喇！
Comments